Read Huli Iba Gana 43 Bible Online

Iba Gana 43 - Huli bible

Iba Gana 43

¹Ngode Datagaliwabe-o í̱ erembira ngialu piaga karume i̱ bope hole manda bialu ka. Tini koore howa tinaga bi ke̱ halu la hole bialu kago i̱na mana tigabi bialu kogo tigua hendelo í̱na mo walia habe. Í̱na i̱ biamogo bialu agali ko uruninaga giha howa yamibe laro.

²Í̱nime hangu i̱ handayaho haga kegonigo irane aginaga í̱na i̱ mo embedaho kebe. I̱naga waitigi bu karume i̱ bope halu i̱naga mini mo ko haga kagonaga i̱ tandaga haabo haruligo irane agibe.

³I̱ heyalu Hari Saiono í̱ninaga hari loma bia hene wedagoria tigatiga puabo halu poliyabi í̱ninaga anda í̱ kegoria ibuliyabi í̱na í̱ninaga wá holenemebi henene lolenemebi i̱ haru haabo habelo hameledo.

⁴Ngode Datagaliwabe-o í̱ninaga lomabu delaga dabu bu heledagoria polebero. Í̱na i̱ mo turu halu miniha dungulo helariligodago anidagua bibe laro. I̱naga Ngode Datagaliwabe í̱ore kegoni. I̱na ngida ale balu í̱naga mini yaraga halu iba ganaru lalu holebero.

⁵Ai nde áyu i̱ore miniha turu naheore haabo kogoni aginagadabe. I̱naga miniha genda bialu lungulungu biaruagoni agiorenagadabe. Ani biaruagoni bilo i̱na i̱naga Ngode Datagaliwabeni mini hanaho holebero. I̱na i̱naga Pele Ngiagabi i̱naga Ngode Datagaliwabebi kagonaga mini i̱na lone mo yaraga holebero.