Read Huli Iba Gana 44 Bible Online

Iba Gana 44 - Huli bible

Iba Gana 44

¹Ngode Datagaliwabe-o í̱na biabe hongoheore bialu harigo inanaga haleme hale harimagoni. Ina mamali ala dindini heneyarume bamba heneyangi í̱ni binigo te inahondo langiya.

²Í̱na dindi aba ala ogoria hene hearu bo taliatagi halu inanaga mamaliru dindi ogoriani haru íbu helariya. Wali agali tara tara bu hearume biyagonaga í̱na ti pani mialu inanaga mamaliru biamogo bialu mo dewa halu bayale helo helariya.

³Inanaga mamaliru tigua wai bialu howa tininaga wai biaganeme dindi ogo karulene ndo. Tininaga hongome wai buwa wayali hene ndoore. Í̱nime ti gubalini ho howa í̱naga wá holene helarigomebi í̱naga hongoni howa ti wayali ho hene.

⁴I̱naga Kinibi i̱naga Ngode Datagaliwabebi í̱ore kegoni. Í̱nime bi ledegola Yagabanaga hameigini karume wai bialu wayali haga.

⁵Í̱naga hongoni howa iname waitigi bu karu bo batagitagi beramali. Ina í̱naga minini howa waitigi bope halu wayali haramali.

⁶I̱naga danda timu yandareru wia ngogo urunime i̱na wai bialu wayali harodalo manda nabiore kogoni. Wai bialu ayu tibu yu ha kogonigo ogonimebi i̱ wayali holiyanaga biamogo nabiaga manda bidogoni.

⁷Mbirale urunime ndo í̱na ina biamogo birigola waitigi bope harima. Waitigime ina handabe manga ho hearia í̱na ti bope haga bialu mo taga harigoni.

⁸I̱name Ngode Datagaliwabe í̱ninaga mini dege yaraga halu í̱na birigonaga ka̱i̱ lalu haabo holeberema.

⁹Ani birigoyu ai í̱na ina mo nagalone halu erembira ngirigoni. Inanaga ami agaliru heba í̱ wai nape. Anidagua bialu kego irane aginagabe.

¹⁰Í̱na ogonidagua birigome inanaga waitigiru ibiyagola ina ibida pirimagoni. Ibida pirimagola tigua inanaga mbirale wimaru mo yalu piai haya.

¹¹Tigua nogo sibi bo wahagadagua ina bo homelelo ale helarigoni. Inane dindini hemaria í̱na ina bo taliatagi halu wali agali dindi tara tarani bu hearu ti dege dombeneha hama pelarigoni ndobe.

¹²Í̱naga wali agali biaru wali agali dindi tara tarani bu hearunaga garabaya biabe ale bialu helo pelarigoni. Dindi tarani hearu tigua í̱ yolo emene hangu bigi biyagome í̱na muni timbuni namo yi kegoni.

¹³Í̱na ogonidagua birigola wali agali ina baba mandagi haga karume ina hondo mege bialu ka. Wali agali bu hama pedarume inahondo oba haga birago í̱na ina mo taga helo birigoni.

¹⁴Í̱na wali agali dindi tara taraha karu mo heya harigola tigua ina mini lalu mo taga halu ka. Inaha mbirale mbira biragola tigua ina hondo oba halu kagoni.

¹⁵Agalime i̱hondo mege bialu bi koru lalu kagola i̱ tagabi howa handa dindi ho kogoni. I̱naga waitigirubi agali i̱ handabe manga haga karubi i̱na ti handarodagua i̱naga miniha mo ko halu i̱ taga timbuni ho kogoni ndobe.

¹⁷Ngode Datagaliwabe-o iname í̱ embeda nahe howa í̱naga habo nalolene bi lowini biagobi mo habo nale kama. Ani birimagola mbirale genda uruni inaha anda ibiragoni.

¹⁸Iname í̱ erembira ngialu pu nabi í̱naga harigani polenegobi yu wanahe kamagoni ndobe.

¹⁹Ina ani bialu kamagoyu í̱na ina gabua tara tara haga ngagoha helowa arumaha homolene ngagoria helaridagoni.

²⁰Iname inanaga Ngode Datagaliwabe kago erembira mialu puwa mbirale gime wabini ngaruhondo bi pupu wialu henedale nde í̱nime manda bidele. Ina bu kamarunaga miniha wia do hene ngamaru bibahende í̱ni manda biai ho kegonigo í̱ ani manda bidele.

²²Ina í̱ninaga wali agaliore kamagonaga tigua ina bo wahalu haabo kagoni. Tigua ina handalu karia nogo sibi ale dege bo waholene ale kamaria hendedagoni.

²³Anduane Homogo-o í̱ abale heyabe. Aguanaga paliahondo kebe. Ina wahalu erembira ngialu puabo nahabe.

²⁴Irane aginaga ha do ho kebe. Agali bu karume ina mo ko haragola ina tandaga timbuni halu genda dewaore yu kamago embeda nahabe.

²⁵Ina dindini pilo ibira halu inanaga tingini homene ale dindi himuni wima pedemagoni ndobe.

²⁶Ngode Datagaliwabe-o abale heyalu ina biamogo bule ibabe. Í̱naga gubalini haabo holene ngegome ina mitangi bialu ina homoligo abale pele ngibe laro.