Read Huli Iba Gana 45 Bible Online

Iba Gana 45 - Huli bible

Iba Gana 45

¹Bi bayale maru i̱naga miniha yu ko. I̱na iba gana ogoni podo yuwa kini kagohondo mulene manda bido. Beba bayale gili biaganaga peni ale howa i̱naga hégeme bi bayale lalu ko.

²Í̱ agali bayaore kegoni. Agali mende í̱ ale naheore. Í̱na bi laga biriligo baya tigabiore larili. Ngode Datagaliwabehanda í̱ mo bayale halu haabo kagome í̱ ogonibi kegoni.

³Í̱ kini timbuni hongoheore kegoni. Í̱ baya burugule tara howa mini lene timbuni kegoni. Í̱naga wai biagane ayu tibu yaganeha yuwa wai bule manda manda bu habe.

⁴Í̱ kini dunini mbira mini leneore kegoni. Í̱na henene lolene ngagobi mana tigabi dege bulene ngagobi ogoni wayali helonaga wai bule í̱naga nogo hosini biralu pobe. Í̱na wai hongo howa beregome í̱ni wayali holebere.

⁵Í̱naga timu de bi̱a̱o̱le ngerume waitigi bu karunaga gubalinini bolomogo biaga ngegoni. Í̱na dindi tara taranaga hameigini karu baba wai bialu bope haregola ti í̱ andaneha hai holebira.

⁶Ngode Datagaliwabe-o í̱ kini haluhe haabo haga kegoni. Wali agali í̱na hondo hene karu mana tigabi ngagoria helo haru haga kegoni.

⁷Í̱ mana tigabi bulene ngago hamelowa mana ko ngago manga haga kegoni. Irane ogoninaga í̱naga Ngode Datagaliwabe ibugua í̱ dabo helene. Dabo helalu kini maru karu turu hagadagua ndo ti bolangua halu í̱naga haguaneni weli odo wiyagola í̱ mo turu taraore ho helene.

⁸Í̱naga aga bayale luni biagimbu bu kegoni nga baya taraore mini muwe kasiala ngabini mbauleda. Kini andagaru nogo elebeninaga ne gayaneme mo yáribia halu anda uruniha tigua í̱ mo turu holenaga ngida aleru lalu kagoni.

⁹Kini waneru wali mini lene berearu heba í̱ andagaha biru hayua. Í̱naga gi tigahayagi kuini wali ibu bedagoni. Ibu ngolo Obira dindi tawame yári wabini ngaru karulo beda.

¹⁰Kini one wandari mabuage-o i̱na bi o larogo hale halu manda bibe. Í̱ damene bu karubi wali agali maru bu karubi mitangi budai nabibe.

¹¹Í̱na ogonidagua bialu í̱ wandari bayaleoreda de hondowa kini ibugua í̱ gubalini timbuni ho holebira. Ibu í̱naga agali haguane ka manda buwa í̱na ibunaga bi larago hale halu birulene nga.

¹²Taia wali agali bu karume í̱ mo turu holene aleru yalu ibulebira. Wali agali homogo karumebi í̱ mo turu holene marubi yalu ibalu í̱hondo mulebira.

¹³Kininaga wandari mabuage biago kini andaga tamu hobaneha bedago ibu baya gibiore mbira bedagoni. Ibu aga baya taraore pu ngolo aleme wabini mo karulo bedagoni.

¹⁴Wandari o biago ibu aga baya taraore ogoni karula howa tigua ibu kini berearia haru halu piya. Wandari maru ibu baba biraga berearubi ti haru kini andaga pole haru piya.

¹⁵Tigua turu timbuni halu bu miniha dungulo howa kini andaga anda piai haya.

¹⁶Kini-o í̱ igini dewaore holebiraru tigua í̱ mamaliru henedagoria kini ha aribia holebira. Í̱na ti mini leneore helowa tigua wali agali dindi bibahendeha karu haru helo helolebere.

¹⁷Í̱ mini lene timbuni kego lalu i̱na iba gana ogoni latagi harogola wali agali mani holobadarume í̱ mitangi biaabo holebira. Ani mitangi bialu wali agali bibahende bu karume í̱naga mini yaraga ho haabo holebira.