Read Huli Iba Gana 47 Bible Online

Iba Gana 47 - Huli bible

Iba Gana 47

¹Wali agali bu kamiru bibahendeme Ngode Datagaliwabehondo turu halu gi habe bo midaba. Turu howa ibunaga mini mo yaraga halu iba gana dalimu lo midaba.

²Anduane Homogo Daligaorene Daliga gibiore kagohondo iname gi habehe kamagoni. Ibu kini timbuni gibiore howa wali agali dindi bibahendeni bu kamaru de handa gimbu buwa haru kagoni.

³Iname wali agali maru karu bope halu wayali holoma̱ya ibugua ina mo wayali helaya. Hameigini tara tara palu ngaru iname de hondo howa haru holoma̱ya helayagoni.

⁴Ina dindi kamagonibi ibugua dege, Tí ogoria hadaba, lalu mo ngiyagoria bu kama. Ibugua ina gubalini howa ani mo ngiyagome ina nde dindi bayaore ogoriani howa miniha turu halu yangalo kamagoni.

⁵Ngode Datagaliwabe ibu handame haga kini howa ibuninaga biragane dagiani birule iraga haragoni. Anduane Homogo ibu ani iraga harago hondowa wali agalime turuore gibi howa bi timbuni ga̱ lowa ladaga daga bialu mbelo biguliru bibe̱ laga biragoni.

⁶Ngode Datagaliwabenaga mini yaraga halu ibuhondo iba gana lo midaba. Inanaga kini ibu hangu kago ibunaga mini yaraga halu iba gana lo midaba.

⁷Ngode Datagaliwabe ibu wali agali dindi bibahendeni bu karunaga kini kago ibunaga mini mo yaraga halu iba gana laga bialu halimu.

⁸Ngode Datagaliwabe ibu kini kago howa kininaga biragane dagia loma bia heneni biruwa ibugua mana tigabi dege lalu biraga. Ogoriani biruwa ibugua hameigini tara tara dindi bibahendeni bu kamaru haru haga kagoni.

⁹Hameigini bibahende dindi tara tarani karunaga haru haga dameneru bibahendebi Abarahamanaga Ngode Datagaliwabe hene kago ogoni ibunaga wali agali bu karubi heba ti mandagi mo ngoaiho haga. Ngode Datagaliwabe ibu ami hongohe dindini bu karubi ndo hongo gibiorehe howa haru haga ka. Ibu haru haga hongohe daligaore kagoni.