Read Huli Iba Gana 48 Bible Online

Iba Gana 48 - Huli bible

Iba Gana 48

¹Anduane Homogo ibu mini leneore kagonigo ibunaga mini yaraga holene nga. Ngode Datagaliwabenaga tano ngagoria anda puwa ibunaga hari loma bia hene ngagoria ibunaga mini yaraga hami̱ya.

²Ngode Datagaliwabenaga hari loma bia hene ogoni daliga timbuniore bayale nga. Dindi abene uyurahayagi Saiono tano ogoni kini dunini kagonaga ngago lalu wali agali dindi bibahendeha karume turu timbuni ho kagoni.

³Ngode Datagaliwabenaga tano ogoniha wai anda ibiragola ibugua wali agali ibu heba haga karu abale biamogo bialu ti bayale haga ka.

⁴Bamba kini tara tara bu hearume mo mogo bialu Saiono tanoha hearu baba wai bule ibiya.

⁵Ti ibalu tano biago de hondowa mogolo handaya. Mogolo hondowa gi halu ibida pugupugu biai haya.

⁶Ti mogo timbuni lalu walime gali taba honole tandaga timbuniore hagagobi hayagoni.

⁷Puyabu timbuniore ni tagira ibiragohayagi howa ibiragome Tasisi tanonaga iba sibi timbuni bu ngaru bo gingirulo wahai hagadagua Ngode Datagaliwabe ibugua waitigi uruni bo amo lai hayagoni.

⁸Ngode Datagaliwabehanda bamba biniyago ina haleme hale ho harimagoni. Anduane Homogo Hongo Haiheore kagome ibuninaga tanoha mbirale uruni biniyago ai ina deme handai harima. Ibugua ibunaga tano ogoni mo hongo haragome bayale wiaabo holebira.

⁹Ngode Datagaliwabe-o ina í̱naga andaha biruwa í̱naga gubalini haabo holene mana ngego mitangi bialu bedema.

¹⁰Wali agali dindi bibahendeha bu karume í̱naga mini yaraga halu kagoni. Í̱ mini leneore kegonaga dindi bibahendeha wali agali karume loyogo leda. Í̱na í̱naga mana tigabi ngegome wali agali bu karu handayaho haga kegoni.

¹¹Hari Saiononi wali agali bu karu ti bibahende turu hai helo helabe. Wali agali tinime mana biragobi í̱na tigatiga ngadaguaore mo tale biaga kegoni. Yuda dindiha tano ngaruha karu ti bibahende turu hai helo helabe.

¹²Ngode Datagaliwabenaga wali agaliru tígua Hari Saiono kagoria tanonaga ege pabe kadagua pu mabu bilimu. Pu mabu bialu pabe daligani mamagealinaga anda lu bima iraga halu bu heledaru bibahende dagalai halimu.

¹³Tígua Saiononaga ege pabe kagobi anda hongohe bu karubi bayuwa handa kia bu helalimu. Wali agali mani holobadaru te lamulenaga baya hanguore handalimu.

¹⁴Tígua mani holobadaruhondo ogodagua lamilimu. Ngode Datagaliwabe ibu inanagaore kagoni. Ibu inanaga Ngode Datagaliwabeore haluhe haabo holebira. Horo bibahendengi ibugua bamba halu ina hariga poloma̱yago walia halu haaboboore holebira, lalu lamilimu.