Read Huli Iba Gana 50 Bible Online

Iba Gana 50 - Huli bible

Iba Gana 50

¹Ngode Datagaliwabe Hongo Haiheore Anduane Homogo kago ibugua bi laragoni. Wali agali ni tagira ibiragohayagi karubi ni paliragohayagi karubi dindi bibahendeha ibugua ti olalu kagoni.

²Ngode Datagaliwabe ibu Saiono tano dunini dindi bayaleoreni howa ibugua ibunaga wá holene taraore biago wá haame halu kagoni.

³Inanaga Ngode Datagaliwabe o ibaruagoni. Ibu ebero lalu panigi ibaruagoni. Mbirale ngaru dai helonaga ira dene ala bamba halu puyabu timbuni iba dalu dindi guni heba ibuha ho mabu bialu ibarua.

⁴Ibugua dindibi hari daligabi olowa libuhondo lamialu lalu, I̱naga wali agalime bialu hayarunaga dabaki berogo hondole ibidaba, laruagoni.

⁵Ngode Datagaliwabehanda lalu, I̱naga wali agali i̱nihondo mini mbiraorewi karu tigua i̱hondo nogo bo lomabu delalu howa i̱nila habo nalolene bi lo wiyaru ti i̱ni heba mandagi holoma̱ya mo mogo bialu ibidaba, laruagoni.

⁶Hari daligame latagi halu lalu, Ngode Datagaliwabe ibu tigabiore ka. Ibugua tigatiga dabaki biaga ka leda.

⁷Ngode Datagaliwabehanda lalu, I̱naga wali agali bu kamiru-o bi loleberogo bayuwa hale halimu. Isaraele wali agaliru-o i̱na tíhondo bi lolene yidogo tígua ko birimiru latagi holebero. I̱ni hangu Ngode Datagaliwabe howa tínaga Ngode Datagaliwabeore kogoni.

⁸I̱na tígua lomabu yalu ibirimigonaga ndo dago bero. Horo bibahendengi tígua loma irani dai helaga bialu kamigoni i̱nime de hondo kogoni.

⁹I̱na tínaga nogo pabeha nogo bulumaga memeru wangabe kago i̱ yamulenego burupalia nabi kogoni.

¹⁰Nogo gabua irabuha haga karubi dindi hari daosini dewaore daga labe nahe ngaruha nogo bulumaga karubi bibahendeore i̱ninaga kago ndobe.

¹¹Ega gabua bedaru bibahendebi dindi bibahendeni ema bialu piaga bedarubi uruni bibahende ininagaore beda.

¹²I̱ tomo garibilo koyagua tíhondo mbira ngi nalolebero. Dindi bibahende ngagobi ogoniha wini ngarubi bibahende i̱ninagaore wiai ka.

¹³I̱ bulumaga wangabenaga mbirini naga kobe be nogo memenaga darama naga kobe. Uruni ale i̱ nanagaore ndobe.

¹⁴Tígua i̱hondo ka̱i̱ore lalu lolene nga. Uruniale tígua i̱nihondo lomabu ngulene karulape nga. Ngode Datagaliwabe Daligaorene Daliga kogo i̱nihondo mbirale mbira ngule lalubi lo wirimigo damene nguleneore ngagoni.

¹⁵Tígua tíniha genda tagira ibirangi i̱ni abale olalimu. Olaramigola i̱na hale halu tí biamogo bulebero. I̱na tí biamogo berogola tígua i̱naga mini yaraga halu holeberemi, lalu layagoni.

¹⁶Ngode Datagaliwabehanda wali agali mana ko biaga karuhondo bi ogodagua laragoni. Tígua i̱naga mana lo wini ngoru bame lo payapaya bialu habo nalolene bi lo ngagonaga tebi lalu kamigo aginaga laramibe.

¹⁷I̱na tí mo tiga buliya ha nabi tígua i̱naga bi mo wahalu haabo kamigoni.

¹⁸Tígua agali page biaga karu lola howa abale mo nenege haga kami. Wali agali kayu yama ibaga biaga karu baba mandagi ibagabu haga kami.

¹⁹Tígua ne harigaha howa ke̱ holene lalu bi ko dege lalu haabo haga kamigoni ndobe.

²⁰Tí damene bu karu baba godi lalu tí ai̱ya igini bameore mege bialu kamigoni.

²¹Tígua anidagua bialu kamigonaga i̱na bi mbira nale harugoni ndobe. I̱ ani hewagola tígua mandabu handalu hemiria i̱ nde tí ale dege kabe toba harimi. Ani birimigonaga i̱na tí dago berogoni. I̱na tí panigi handalimulo ko birimiru latagi holebero.

²²Wali agali i̱hondo erembira ngiaga kamiru tí bi o larogo hale hadaba. Tígua hale naharimiyagua nde tíha mo ko holene anda ibiragola tí biamogo bulene mbirali naholebiraore.

²³Mbiralime i̱hondo ka̱i̱ lalu lomabu ngialu kago ibugua i̱naga mini yaraga halu haga kagoni. Wali agali i̱naga bi hale halu i̱ andaneha haga karu ti i̱na pele mulebero, laragoni.