Read Huli Iba Gana 51 Bible Online

Iba Gana 51 - Huli bible

Iba Gana 51

¹Ngode Datagaliwabe-o gubalini haho wiaabo haga kego í̱na i̱ore dara howa biamogo bibe. Í̱na wali agali dara nahabeheorego dara hagayagodago i̱ dara halu ko biruru domo wahabe.

²I̱na ko biruru bibahende domo wahalu i̱ dodo nahe helabe.

³Ko ngubiore birulo manda bialu miniha tagaore biaabo haragola haruli.

⁴I̱na ko biruruni í̱hondo birugoni. Mendealihondo biru lole ndo í̱hondoore birugoni. Í̱naga deni ko ngubiore birugoni. Ani birugonaga í̱na i̱hondo i̱ mana pugualu ko birigo pani nolene nga larego nde tigatiga labehedaguaore larego i̱ balolene henge nawiore manda bido.

⁵I̱ pigane i̱ ai̱yahanda taba hanayangi howa ko hangu bialu haho winigo áyubi bialu dege kogoni. I̱ ai̱yanaga tombeha biruwabi mini kowi dege biraru.

⁶Í̱na henene hangu lagabi miniha ko do nahebi kago hondowa turu haga kegoni. Ani biaga kego í̱naga mini giga buleneme i̱naga miniha to̱lotagi helabe.

⁷Dodo nahe holiya ko biruru domo wahabe. Bu miniha peweleore holiya i̱ wayawaya bia habe.

⁸Bi baya turubiru halu mbira hale holiyanaga henge ngialu i̱na ko biruru domo wahabe. Í̱na i̱ hengedo mbaralo wahalu i̱naga kuniru minu bu̱ larigoyu i̱ lone heyalu turuho holebero.

⁹I̱na ko ngubi biruruni í̱ de handa tara howa í̱na bibahendeore domo wahai habe.

¹⁰Ngode Datagaliwabe-o i̱naga bu habaneha mini gahenge wabu wia habe. Í̱naga bi larego hale halu bua holenego gahenge i̱ha wabu wia habe.

¹¹Í̱na i̱ kodago wahalu pu lowa bo batagi holeni. Í̱naga Dinini tigabi i̱ha heledego tagira peloleni.

¹²Pele ngini kogoni manda buwa turu ho haruligo turu biagoni ereba hayago lone ngiadai bibe. Bi larego hale halu biaga holiya biamogo bibe.

¹³Ani beregola i̱na ko biaga karuhondo í̱naga bi lo ngedagua tihondo lawai holiya. Lawai harogola hale halu tigua í̱ni keria dai bulebirago bilo.

¹⁴I̱na ko birurunaga homolenego hame naledogo Ngode Datagaliwabe-o i̱ pele ngibe. Ani beregola i̱na turu halu í̱ tigabi biaga ke lalu wali agali bi mana lamuliya.

¹⁵I̱na í̱naga bi mana loliyabi Anduane Homogo í̱nime lamogo bibe. Ani berego handalu i̱na í̱naga mini mo yaraga holebero.

¹⁶Í̱na mbirale bo lomabu ngilo hame lagadale i̱na bo lomabu ngidolego ai í̱ hame nalagayago. Mbirale ngabi í̱ nga habelo lowa bo lomabu delaga dabuni delarogomebi í̱ mo turu nahagaya. Aniyagodago i̱na í̱hondo loma ngiradagua i̱ni í̱hondo ngerogoni.

¹⁷Ngode Datagaliwabe-o í̱naga bi larego hale halu biaore bule lalu i̱ni áyu ngerogoni. I̱ni mo yadindi halu bu mini henene beregedalu i̱ni ngerogola í̱na nayamia nabulebere manda buwa áyu ngerogoni.

¹⁸Ngode Datagaliwabe-o Saiono tano podope hayadago wali agali karu dara halu biamogo bibe. Yarusaleme wai pabe biago podo bagabu ibira ho ngago waitigi anda ibuligo í̱na ege pabe ogoni lone biadai bibe.

¹⁹Anidagua bu howa mbirale bo lomabu ngulene ngadagua ngirimayaguabi mbirale bo lomabu delaga dabuni delarimayaguabi í̱ turu holebere. Nogo bulumaga wangaberubi í̱naga bo lomabu delaga dabuni bo deloleberema.