Read Huli Iba Gana 52 Bible Online

Iba Gana 52 - Huli bible

Iba Gana 52

¹Agali timbuni hongohe tingiho kego í̱nime mana ko bialu kegonaga turu howa mine haabo harego irane aginagabe. Ogonibi biaga kego Ngode Datagaliwabenaga deni í̱ koorene ko biaga kegoni. Ngode Datagaliwabe ibu mini bilinahe howa wali agali urunibihondo dara haabo haga kagoni.

²Í̱na horo bibahendengi mendeali kago mo ko holene hangu manda bialu haga kegoni. Í̱naga hége leda ne gadele ale howa wali agali mende kago podaga kegoni ndobe. Ke̱ howa lolene hangu wai hanalu haabo harili.

³Í̱na mana ko bulenego hame lalu mana bayale bulenego manga halu haga ke. Ke̱ holene damenego turu haga howa bi henene lolenego manga haga kegoni.

⁴Í̱ ke̱ hagaore kegoni. Í̱na bi ko laregome wali agali karu mo tandaga haabo haga kegoni.

⁵Ngode Datagaliwabehanda í̱ni andagaha bederia mo ko howa bo gililo batagi holebira. Ibugua í̱ wali agali dindi ogoria karu baba nahabelo bo waholebira.

⁶Wali agali bayale tigabi bu karume í̱ha mbirale uruni birago hondowa ti gi timbuni ho holebira. Tigua í̱ hondo oba halu lalu,

⁷Agali o kagome Ngode Datagaliwabehanda ibu biamogo bialu mo hongo helo ibuha hana nahe ka. Ibugua ibunaga muni mbirale ngaru hangu mo teneho howa mana ko bialu kogome i̱ biamogo biragola karulape holebero lo manda biaga kago de handa, lolebira.

⁸Anigo i̱ ogonibi ndo kogoni. I̱ Ngode Datagaliwabenaga anda haneni ira olibe haradagua bidogoni. Ngode Datagaliwabe ibugua i̱ gubalini ho haabo haga kagonaga i̱na ibuhondo mini mbiraore wu haabo kogoni.

⁹Ngode Datagaliwabe-o í̱na i̱ biamogo bialu haga kegonaga i̱na í̱hondo ka̱i̱ laabo holebero. Í̱naga wali agalirunaga deni howa i̱na í̱naga mini yaraga halu Ngode Datagaliwabehanda bayaleore biaga kagoni lalu latagi halu holebero.