Read Huli Iba Gana 53 Bible Online

Iba Gana 53 - Huli bible

Iba Gana 53

¹Wali agali mitangi yole biaga karume tini miniha mandabu donge halu Ngode Datagaliwabe ogoni nahe laga ka. Wali agali mini urunibi wu karuni tini ko ngubi habane nabuleneore howa ko tara tara ngaru bima polenaga ani lalu ka. Mana tigabi hangu biaga mbirali naheore.

²Ngode Datagaliwabehanda dahuliya andaga howa handadali halu wali agali bibahende bu karu de handai howa mbirali miniwi galone manda biagabi Ngode Datagaliwabe kalo manda bu hagabi au haga bidabe hondole handadali ho ka.

³Ani handalu hearia mbirali naheore ti bibahende ko biai hene ogobi dege dege hoyu pearia hendeda. Hariga tigatiga polene wiadagua pene mbirali naheore bibahende putagi halu piai hene dege hearia hendene. Mana tigabi hangu biaga mbira naheore. Mbiraorebi mbira naheoreya.

⁴Ngode Datagaliwabehanda lalu, Wali agali ko biaga uruni ti mini nawidabe. Ti galone mbira manda nabiagadabe. Wali agali ko biaga urunime i̱naga wali agali bameore ti tomo naradagua budu nalu kagoni. Ani bialu howa tigua i̱hondo bi mbira nalagaore kagoni, laragoni.

⁵Ani bialu ha kagoyu Ngode Datagaliwabe ibugua ti mo gi timbuni taraore holebira. Abale ti gi ogonibi nahenedagua gi ho helo irane ibugua tínaga waitigi karu bo wahai halu tinaga kuni dindini hora nahe bu payapayabu ngelolebira. Ibugua wali agali uruni ti erembira miai hayagome ai ti mo ko howa bo wahai holebira.

⁶I̱na Isaraele wali agali bibahende pele ngialu haru dai biai helo Ngode Datagaliwabehanda mbirali Saiono howa ibi nalara. Ngode Datagaliwabe ibugua ibunaga wali agali biamogo biragola ti bayuwa ho dungulo halu tigua mbirale bigi biraru bayale hangu haga birago hondowa tini turuore au holobadabe.