Read Huli Iba Gana 56 Bible Online

Iba Gana 56 - Huli bible

Iba Gana 56

¹Ngode Datagaliwabe-o í̱na i̱ dara howa biamogo bibe. Agali bu karume i̱ talima ibaga bialu bo wahole kagoni. Waitigime i̱ mo ko hole manda bialu haabo kagoni.

²Waitigi karume egerebagi howa i̱ bole bialu heane alendo haga bialu haabo kagoni ndobe. Ti dewalioreme i̱ baba waitigi ho ka.

³Anduane Homogo Daligaorene Daliga kego-o i̱ha gi holene anda ibirangi i̱na í̱hondo mini mbiraore wialu haabo haruli.

⁴I̱na Ngode Datagaliwabehondo mini mbiraore wu kogome mbirale ngaru hondowa i̱ gi naharuli. I̱na ibunaga bi henene lo ngaru mitangi bialu ibunaga mini yaraga haabo halu kogoni. Agali karume i̱hondo bulene mbira nawigo agi bulubadabe.

⁵I̱na mbira bule kogola waitigi karume mo ko hole manda biaabo haga ka. Tigua i̱ mo tandaga hole hariga taya bialu haabo ka.

⁶Ti mo ngoai halu ha do howa i̱na mbira bule bialu koria de yu howa tigua i̱ bo wahole hamelalu ani biaabo haga ka.

⁷Ngode Datagaliwabe-o tigua mana ko bialu kagonaga pani nelo mibe. Í̱na tihondo keba timbuni howa bope habe.

⁸I̱naga genda yu kogobi bu miniha mo ko hene kogobi í̱ manda bu kegoni. I̱na dugu birugonaga de iba ibiyago í̱na í̱naga iba beha berelo kegoni. Í̱na uruni mitangi bu haabo howa í̱naga mbugaha gilibu ngegoni.

⁹I̱na í̱ olarongi i̱naga waitigi ibida piai holebira. Ngode Datagaliwabe-o ti ani biragola i̱na mbira manda bidogoore ogo í̱na i̱hayagi haabo kegoni mandabu kogoni.

¹⁰I̱na Ngode Datagaliwabenaga bi henene lo ngaru mitangi bialu ibu mini yaraga halu kogoni. I̱na Anduane Homogonaga bi lo ngarunaga ibu mini yaraga halu kogoni.

¹¹I̱na ibuhondo mini mbiraore wu kogome mbirale ngaru hondowa gi naholebero. Agali uruni tigua i̱hondo mbira bulene nawigo agi bulubadabe.

¹²Ngode Datagaliwabe-o i̱na mbira bule lalu í̱hondo lo wirugoni biaore bulebero. I̱na í̱hondo turu howa ka̱i̱ lolenaga loma mbira ngulebero.

¹³Irane i̱ homole hewaria í̱na pele ngialu mo wirigonagabi waitigirume i̱ bope nahelo i̱ handaya halu biamogo birigonagabi i̱na loma ogoni ani ngulebero. Ngode Datagaliwabe-o í̱ heba ibagabu kogome i̱na í̱naga wá holene ngegoria í̱naga deni haaboore holebero.