Read Huli Iba Gana 59 Bible Online

Iba Gana 59 - Huli bible

Iba Gana 59

¹I̱naga Ngode Datagaliwabe-o waitigi karunaga giha howa i̱ mo wialu biamogo bibe. Tigua i̱ bo wanahelo í̱na i̱ baya hangu handayaho habe.

²Agali ko karume i̱hondo ko nabilo í̱na i̱ biamogo bialu mo wibe. Ti darama hangu noa haga karunaga giha howa i̱ gingila mialu mo wibe.

³Agali uruni tigua i̱ bo wahole bira do haga bidagoni de handa. I̱na ko mbira birugonaga ndo tigua i̱la bame wai bule kagoni.

⁴Anduane Homogo-o i̱na ko mbira nabi biako henebi nawi kogoyu tigua i̱la wai bialu bo waholeore abale íbu hapara ho kagoni.

⁵Anduane Homogo Hongo Haiheore Ngode Datagaliwabe-o í̱na i̱ biamogo bule abale ibabe. Í̱ Isaraele wali agalirunaga Ngode Datagaliwabeore kego í̱na agali o karu de handabe. Í̱ni abale ibalu agali bu karuni pani mibe. Í̱na ti dara holeni nahabe. Wali agali mana bayale bule kama lalu ha howa tigua mana ko bule mitangi bialu kago manda bibe.

⁶Mbiraga agali uruni tigua tanoha dai bialu wai pabe gibuni gibuni ibagabu howa biangome gi̱gau̱ laradagua lama ibagabu ka.

⁷Uruni tigua bi ko lalu mege biraru hale habe. Tinaga bi nehe howa wai biaga ayu tibu ale laga ka. Tigua bi ko laga bialu, Iname bi laramago aiwa hale holebirabe, lalu ka.

⁸Anigo Anduane Homogo-o í̱na ti hondowa oba haga ke. Dindi tara taranaga hameigini bibahende karu í̱na ti mege biai haga kegoni.

⁹Í̱na hangu i̱ mo hongo halu handayaho haga kegoni. Ngode Datagaliwabe-o í̱ni kegoha ibalu i̱ bira do haruli.

¹⁰I̱naga Ngode Datagaliwabe ibunime i̱ gubalini timbuni ho howa ibugua i̱ biamogo bule ibulebira. Ibugua i̱naga waitigi karu bope halu howa i̱ni de hondoliya walia holebira.

¹¹Ngode Datagaliwabe-o i̱naga wali agalirume mbirale uruni embedaho waholigo waitigi biaru homelo bo waholene nakarulapeda. Anduane Homogo-o í̱ ina wali agali haru haga kego í̱naga hongome waitigi bu karu bo waratagi halu bope hai habe.

¹²Tigua mana ko bulene hangu mo tene halu tinaga ne hambuni howa bi ko dege lalu haabo haga kagoni ndobe. Tigua í̱naga mini mo ko howa bi ko ngaru lalu ke̱ howa bi dewa lalu haga kagonaga í̱na ti mine halu kagoria tini pani nelo ngelabe.

¹³Í̱na bi ko laga karunihondo keba howa ti bo waholene karulape nga. Agali ko uruni bo wahaiore habe. Anidagua beregola wali agali bu karu bibahendeme manda bialu Ngode Datagaliwabe í̱nioreme Isaraele wali agalirunaga haru haga kegoni manda bulebira. Wali agali dindi bibahendeha karubi í̱na dindi bibahendeni haru kegonigo tigua manda biai helo lo yanga lolebira.

¹⁴Mbiraga i̱naga waitigi tigua tanoha dai bialu wai pabe gibuni gibuni ibagabu howa biangome gi̱gau̱ laradagua lama ibagabu ka.

¹⁵Tigua puíbu bialu nolene taya bialu haabo howa tinaga tombeha tomo noa biaabo hayagua nde ti ngiriningerene lalu haga ka.

¹⁶Ti ani biagagoyu i̱na í̱naga hongo timbuni ngegonaga iba gana lalu holebero. I̱na egerebagi bibahendengi í̱na i̱hondo gubalini ho haabo haga kego mitangi bialu iba gana hongo howa lalu holebero. Abale i̱ha genda tara tara ibiyagola í̱na i̱ handayaho haabo howa i̱naga wai pabe ale harigonaga i̱na iba gana ani lolebero.

¹⁷I̱naga hongo holene í̱niore kegoni ndobe. Í̱ ani kegonaga i̱na í̱naga mini yaraga halu iba gana lolebero. Ngode Datagaliwabe-o i̱naga wai pabe hongoheore í̱ni howa í̱na i̱ gubalini ho haabo haga kegoniore laro.