Read Huli Iba Gana 6 Bible Online

Iba Gana 6 - Huli bible

Iba Gana 6

¹Anduane Homogo-o í̱naga keba ho kegome i̱hondo keba nahabe. Í̱ miniha keba ho kegonigo i̱ pani nolene na mo ngibe.

²Anduane Homogo-o i̱ hongo nahe kogo í̱na i̱ dara howa biamogo bibe. I̱naga hongo biba halu ereba hayago í̱nime i̱ lone mo hongo habe.

³I̱ miniha genda timbuniore ho kogo Anduane Homogo-o ai agua bidebe. I̱ genda yu agiru holiya karulapedabe.

⁴Anduane Homogo-o í̱na i̱ biamogo bialu gi mibe. I̱ nahomoliya í̱na dara howa abale pele ngibe.

⁵Homene dindiha karume í̱ mitangi nabiagaya Tini haga haga bidagoha howa í̱naga mini yaraga nahagaya.

⁶I̱na olalu haabo kogola i̱naga hongo biba hai haya. Mbiraga bibahendengi i̱naga de ibame dagia goba ho wiaga. I̱na dugu bialu haabo kogola i̱naga haguanda de ibame goba ka.

⁷I̱naga waitigi dewaore bu kagola i̱na dugu bialu haabo kogome i̱naga de to howa mbirale mbira bayuwa handabe nahe kogoni.

⁸Anduane Homogo ibugua i̱na dugu berogo hale ho kagoni. Wali agali mana ko biaga kamiru tí i̱ kogoria hapara nahe purogo ladaba.

⁹I̱na Anduane Homogo olalu i̱ biamogo bia larogola ibugua hale halu i̱ biamogo biaga ka.

¹⁰I̱naga waitigi bu karu ti genda timbuni yu holebira. Gi timbuniore howa ti taga timbuni ho holebira. Tigua i̱ abale yu wahalu puwa tini pu luluya hama ibaga bulebira.