Read Huli Iba Gana 60 Bible Online

Iba Gana 60 - Huli bible

Iba Gana 60

¹Ngode Datagaliwabe-o í̱na ina bo taliatagi halu inanaga waitigime bo podahana helo yu wahai harigoni ndobe. Í̱na inahondo keba timbuniore ho harigonigo áyu ina kamagoha abale dai bialu ina pele ngibe.

²Í̱na inanaga dindi wiago mo dumbirumbi bia halu gai buki bilalu dindi hadene biyagola uli timbuni wupe helarigoni. Ai áyu dindi mo ko hai habehe ngago í̱na lone motiga bibe.

³Í̱naga wali agali bu kamaru í̱nime genda timbuniore mo ngidegoni. Í̱na waini iba timbuni hambu ngidegola no howa ina luluyu ibagabu haradagua bidamagoni ndobe.

⁴Wali agali í̱ni andaneha karume waitigi ibira handala ti abale í̱ni kegoha hole ibilo walia holenaga í̱na hagua delagadagua delalu walia harigoni.

⁵Í̱na ina gubalini timbuni ho haga kegonigo bayale hai holoma̱ya i̱naga bi larogo hale habe. Í̱naga hongo timbuni ho kegome ina pele ngibe laro.

⁶Ngode Datagaliwabehanda ibuni andaga howa lalu, I̱na wai bialu bo podahana hai halu wayali harugo Segeme dindibi Sugodo dindiha dindi ulini bugubugu wuyu pedarubi dindi uruni i̱naga wali agaliru ti helo i̱na ti tuwu ta hai holebero.

⁷Gileada dindibi Manase dindibi i̱ninagaore nga. Eberaimi ibu i̱naga ege manda ale nga. Yuda ibu kininaga haru haga gewa ale nga.

⁸Moaba dindi i̱naga wayawaya bulene ndisibe ale wialu Idomo dindi i̱nagaore ngo lalu i̱na i̱naga ge su golowa dindi ogoriani ba amu holebero.[1] I̱na Pilidialiru balu wayali howa turu halu ga̱ lalu harogoni, laya.

⁹Ngode Datagaliwabe-o ege pabe hongohe bu mabubi tano ngagoha i̱ aiwa haru anda polobadabe. Idomo dindiha i̱ aiwa haru polobadabe.

¹⁰Ngode Datagaliwabe í̱na ina erembira ngiribe. Í̱na inanaga ami agali karu biamogo nabuleorebe.

¹¹Agalinaga hongome ina biamogo bulene nakarulapego iname waitigi bu karu baba wai buluma̱ya í̱nioreme ina biamogo bibe.

¹²Ngode Datagaliwabe ibu ina heba kayagua nde iname wai bialu wayali holeberema. Ibunime waitigi karu bope hai holebira.