Read Huli Iba Gana 61 Bible Online

Iba Gana 61 - Huli bible

Iba Gana 61

¹Ngode Datagaliwabe-o i̱na í̱ olarogo hale habe. I̱na bi larogo baya hangu hale habe.

²I̱ dindi kaundiaha pu koria i̱naga miniha genda timbuni yu kogo í̱na i̱ biamogo bibelonaga í̱ olalu kogoni. Waitigi bu karume i̱ bo wanahelo i̱ ha do holiya bayuwa haru pu helabe.

³Í̱nime i̱ handayaho haga kegonigo ani bibe laro. Í̱ i̱naga wai pabe hongoheore kego waitigirume ibalu i̱ bo wanaholebira.

⁴Í̱naga anda kegoha i̱ bayale haabo halu homolene hame timbuni lo kogoni. Ega bawali iginime ti angibuni babaganeha bayale bira do hagadagua i̱ í̱ni andaneha bayale holene hamelo kogoni.

⁵Ngode Datagaliwabe-o i̱na í̱hondo ogoale bule lalu lowigi birugo bibahende í̱ hale hai harigoni. Wali agali í̱naga mini yaraga haga karuhondo migi biaga birilidagua í̱na i̱bi karulape ngiaga kegoni.

⁶Kini ibu dindini tubagi helo ndo mali dewaore helo helabe. Ibu dindini luore helo helabe.

⁷Ngode Datagaliwabe-o kini ibu í̱naga deni luore haabo helo helabe. Í̱na gubaliniore ho haabo haga kegome ibu baya hangu handayaho haabo habe.

⁸I̱na bamba í̱hondo ogoale buleore lalu bi lowirugo damene horo bibahendengi i̱na talialu bialu í̱naga mini yaraga halu iba ganaru lalu haabo holebero.