Read Huli Iba Gana 63 Bible Online

Iba Gana 63 - Huli bible

Iba Gana 63

¹Ngode Datagaliwabe-o í̱ i̱naga Ngode Datagaliwabe kegoni. I̱na í̱ handa walia hole lowa miniha hongo howaore hai bialu kogoni. I̱naga minimebi tinginimebi í̱ hebaore hole hame timbuniore lo kogoni. Wali agalime dindi koore yobi iba nabereni howa iba noa timbuni halu hége lebolaho hagadagua i̱ni í̱ hebaore hoa howa hame timbuniore lo kogoni.

²Í̱ í̱ninaga anda loma biahene kagoha haga kego í̱ kegoniore i̱ de hondoa ho kogoni. I̱na í̱naga hongo holene gibiore ngegobi í̱naga wá holene tara baya agiore loabe tobahe ngegobi de hondoleore hameledo.

³Dindini holiyanaga holene ngirigo yuwa bayale dege turuho kogoyu ogoni goyane lowa í̱na i̱ gubalini haho wiaabo hariligo baya daligaore ngegoni. Í̱ ani biaga kegonaga i̱na í̱naga mini mo yaraga holebero.

⁴I̱ dindini emabu kongi í̱hondo ka̱i̱ lalu í̱naga mini mo yaraga haabo halu kone dege i̱ni homalu waholebero. I̱naga gi í̱hondo yaraga halu bi lolebero.

⁵Tomo bayaleru karulapeore nowa tombe howa dungu lo holenedagua i̱naga dininime dinini tomo karulapeore nowa dunguore lowa holebero. Ani bialu i̱na iba gana baya turubiru turuore howa í̱naga mini mo yaraga halu lolebero.

⁶I̱ mbiraga tamuni paluwa í̱ore mitangi biruli. Mbiraga lu biagoniha i̱naga minime í̱ hangu mitangitangi biruli.

⁷Ani mitangitangi biaabo haruligo irane í̱na i̱ biamogo biaaboore hariligonaga i̱na ani mitangitangi biruli. Ega angibunime ibu iginiru ibuninaga babaganeme minu tongo biagadagua í̱naga babagane andane gumba kagoha howa i̱ turu halu iba gana turubiru laruli.

⁸I̱na í̱ni yu paraguabu ngogola í̱naga gime i̱ baya hanguore yaniho haga kegoni.

⁹Agali marume i̱ bo waholeore manda bialu karuni tini homalu humbirini andaga homene dinini pu haga ngagoha pu holebira.

¹⁰Agali odaruni waiangi agali waime homelo bo yongobu wahalu pedaria biango dudurume ti buduyu pugu pugu bulebira.

¹¹Ani bulebiragoyu ai i̱ kini kogoni howa wai bigi berongi Ngode Datagaliwabehanda i̱ wayali holiya biamogo biaganegonaga i̱ turu ho holebero. Wali agali maru Ngode Datagaliwabenaga mini lalu, Í̱ore talima ibule, laga karume turu halu í̱naga mini mo yaraga holebira. Wali agali ke̱ haga karunaga ne hariga í̱na mo ndibu lolebere.