Read Huli Iba Gana 64 Bible Online

Iba Gana 64 - Huli bible

Iba Gana 64

¹Ngode Datagaliwabe-o i̱na genda timbuniore howa í̱hondo bi larogo hale habe. I̱ waitigi karu hondowa gi ho kogoni. Tigua i̱ bo waholigo í̱na i̱ handayaho habe laro.

²Agali ko biaga karume ndelalu hariga tai bialu i̱ bo wahole mo mogobu kagoni. Tigua i̱ mo ko nahelo í̱na i̱ handayaho habe.

³Tinaga hége ayu tibu ne gadelehe ale howa tigua bi ko lararume i̱ timume bogole edaho hagadagua kagoni.

⁴Tigua ha do ho howa agali bayale kagoha timu bo pelagadagua ndelalu kagoni. Agali urunime gi nahaga howa ke̱ gibi hararume timu ala baga biagadagua balu kagoni.

⁵Tigua mana ko uruni bulenaga tini mo hongo hagahaga bialu ka. Agali bayale karu gonoha delonaga tigua gono ogoha wimi̱ya laga bialu kagoni. Tigua gono wuwa lo mitangi bialu, O beremagoni mbiralime nahondolebira, laga ka.

⁶Mana ko ngaru bule tigua pongo bo wialu howa lalu, Iname mana ko gibiore mbira bulene hariga handa walia harimagoni, lalu ka. Agalinaga bu habaneha mini wia do ho kago o gibihego iname handabe naheore kamagoni.

⁷Agali korume bi ogonibi laragoyu Ngode Datagaliwabehanda ibunaga timume ti baragola ti abale ibira holebira.

⁸Tigua agali maru karu bo wahole layagonaga Ngode Datagaliwabehanda tini bo wahai holebira. Wali agali maru karume ti de handaya howa mege bialu tinaga ma bonge laga bulebira.

⁹Wali agali bibahendeme Ngode Datagaliwabehondo gi hai holebira. Tigua Ngode Datagaliwabehanda biyarunaga te laga bialu howa mitangi bu haabo holebira.

¹⁰Wali agali tigabi biaga karume Anduane Homogohanda biyarunaga turu holebira. Tigua ibuha ha do ho howa bayale holebira. Wali agali mini bayale karume Ngode Datagaliwabenaga mini yaraga haabo helo laro.