Read Huli Iba Gana 65 Bible Online

Iba Gana 65 - Huli bible

Iba Gana 65

¹Ngode Datagaliwabe-o iname Saiono tanoni í̱naga mini yaraga holene karulapeore nga. Iname í̱hondo bi laramago hale halu ladai biaga kegonaga í̱hondo buleore lalu lo wirimaru biaore buleberama. Wali agali dindi tara tarani karume ko bigi biyarunaga í̱ keria ibugu bulebira. Iname ko beremarume inane bope haga biragola kamaria í̱na domo wahaga biriligoni.

⁴Wali agali í̱nime dabaga bialu í̱naga andaha í̱ni kegoria helo dabaga bereru ti turuore ho ka. Í̱na ti haru anda eberegola mbirale bayale tara tara damene í̱naga anda loma binigo kagoha bu ngaru hondowa ina miniha hina ale tombe howa dungulo holeberema.

⁵Ngode Datagaliwabe-o iname í̱hondo bi laramago hale halu í̱na gi migi biriligoni. Í̱na ina pele ngulenaga mbirale baya tara tara nahendene aleru bigi biriligoni. Wali agali dindi bibahendeni paluyu pedarubi iba solowara domalu dindi kaundiani bu karubi ti bibahendeme í̱hondo mini mbiraore wialu í̱ha mini hana ho haga ka.

⁶Í̱ hongo gibihe kegome dindi hari gibi wa yu pedaruni í̱na wene wedagoni. Í̱naga hongo timbuni ngego mo walia halu ani wedagoni.

⁷Iba solowarame bi timbuni tigi tugua lararubi yaribu bialu lararubi mo hundia halu wali agalime bi timbuni awa lalu ladagadaga bialu karu mo hundia haga kegoni.

⁸Í̱na gibi urunidagua bigi bialu kego hondowa ina wali agali dindi bibahendeni bu hama pedamarunaga bi nawidagola í̱na bigi berego dege hondole bame ne angala howa de handaya ho hama pedamagoni. Í̱na bigi berego handalu turu halu ogodagua biya lalu loyogo laramagola wali agali pali maro bidarumebi heba bi ladagadaga bialu holebira.

⁹Í̱na wali agali palu ngamaru handaya ho ko lalu hariha howa dalu ngialu inanaga dindiru mo baya halu mo ibane berela halu kegoni. Iba nagane gendo ngamaruha iba duguaho wiaabo helalu iba maru piagaru hundia nabi pia ho wiaabo heledagoni. Inanaga tomo hengedamarubi baya gumbile wiaabo heledegola bu dawalu naabo haramagolabi tene haho wiaabo kagoni. Urunidagua bialu kegome ina wali agali dara howa biamogo bule handaya ho ko lalu walia halu kegoni.

¹⁰Tomo hongole howa dindi alu ngamaria hariha howa daluore ngigi birili. Dalu ibilaregome dindi damiai haga. Dalu emene haburalu ibilaga biriligomebi dindi ibane biralu mo gomba haga beregola tomo hengedamaru bayuwa anda haga.

¹¹Í̱na ani bigi beregome tomo au lolebe tara gibi bu ngaria bu hono puwa dawaga beramali. Í̱na biamogo berego damene bibahende ani biai haregola tomo nolene bu payabu wiaabo haga.

¹²Nogo sibi bulumagaru hagaha nogo wabuni haabo halu dindi hombenerunaga wá hondo holene bayaore ngagoni.

¹³Tagira nogo sibiru tanini bu haame halu dindi ulini guagua ngaruha tomo tara tara anda halu gumbilo tagiho ngagoni. Uruni bibahendeore inahondo ngiridarumebi wali agali bibahendemebi í̱hondo turu timbuniore howa iba gana dalimu ladaga halu í̱hondo lo ngeremagoni.