Read Huli Iba Gana 66 Bible Online

Iba Gana 66 - Huli bible

Iba Gana 66

¹Wali agali dindi bibahendeni bu kamiru-o tí turu halu hongo howa ladaga halu Ngode Datagaliwabenaga mini yaraga halimu.

²Iba ganaru lalu ibu mini leneore kago lalu latagi holene nga. Ibunaga mini timbuni ngago mo yaragaore holene nga.

³Tígua Ngode Datagaliwabehondo lamialu lalu, Mbirale í̱na biagago damene bibahende dunini hangu biai haga kegoni. Í̱ hongo timbuni daligaore kego hondowa í̱naga waitigi bu karume mogo lalu í̱ wanakuihayagi ibalu bulupaligi bialu haga ka.

⁴Wali agali dindi bibahendeha bu karume í̱ mitangi bialu lotu lalu ka. Tigua í̱hondo iba ganaru lalu í̱naga mini yaraga halu ka, lalu lamilimu.

⁵Ngode Datagaliwabehanda biyadaru tí de hondole ibidaba. Wali agali bu hearu dombeneha howa tarale timbuni biyadaru de handadaba.

⁶Ibugua iba solowara timbuni bereago hundiai helalu dindi mo yobia haya. Dindi yobialu pani helayagola inanaga mamaliru ti geni dindi dindi ibiyagoni. Ibugua biyagonaga iname ogoriani ibuhondo turu timbuni hene.

⁷Ngode Datagaliwabe ibu hongo gibihe howa ibu kini haluhe haabo haga ka. Ibugua hameigini tara tara hama pedaru bibahende ibunaga deme de handa amu haga ka. Wali agali maru ibunaga mana hale howa doga haga karu ti mini timbuni bolanguahe kama loligo henge namilimu.

⁸Wali agali hameigini tara tarani palima pedemiru tí bibahendeme inanaga Ngode Datagaliwabe kagonaga mini yaraga hadaba. Wali agali bibahendeme hale hai helo tígua ibunaga mini mo yaraga hai hadaba.

⁹Ina koha pi naloloma̱ya ibunimeore baya hangu handayaho hayagome ina homa nabi bayale kamagoni.

¹⁰Ngode Datagaliwabe í̱nime ina ba handarigoni. Agalime siliba dodo para kago do taulo wahelonaga irani deledagola baya tara wiagadagua í̱na ina kamaruhondo ani biridagoni.

¹¹Í̱nime ina wena nu aleha minu hanarigoni. Inanaga erembirani genda timbuni mo ya harigoni.

¹²Waitigi bu hearume ina bo hengedelo waharigoni. Ina ira deagoriabi iba li timbuni peagohabi ibagabu harimagoni. Í̱na ani birigoyu ai ina dindi bayale ngagoria haru íbu heledegoni.

¹³Bamba genda i̱ha tagira ibiyangi i̱na í̱hondo loma mbira irani dai helo bo delole lalu bi lo wirugoni. I̱na bi ogoni larugo mitangi bialu ai loma uruni bu yalu ibulebero. I̱na nogoru í̱naga andaha haru ibalu irani bo delolebero.

¹⁵Nogo sibi habatigiru i̱na í̱nihondo lomabu ngialu irani bo delolebero. I̱na bulumaga wangabe karubi meme wangabe karubi í̱hondo loma bialu irani bo delolebero. Uruni delarogola nga bayale birago í̱ nga ho holebere.

¹⁶Wali agali Ngode Datagaliwabe andaneha haga bu kamiru-o tí i̱na bi larogo hale hole ibidaba. Ngode Datagaliwabehanda i̱ biamogo biyaru bibahende langiai holiya ibidaba.

¹⁷I̱na ibuhondo i̱ biamogo bia lalu olalu harugoni. Ibunaga mini yaraga halu i̱na iba ganarubi larugoni.

¹⁸Mana ko birugo bu donge ho kole nde Anduane Homogohanda i̱naga bi larugo hale nakale.

¹⁹Ngode Datagaliwabehanda i̱na ibuhondo bi larugo haleore haya. Ibugua i̱naga bi larugo heneneore hale howa ladai biya.

²⁰Ngode Datagaliwabehanda i̱ erembira nangi. Ibugua i̱naga bi larugo hale halu i̱ gubalini hayago wanahe haabo hayagonaga i̱na ibu mini yaraga harogoni.