Read Huli Iba Gana 68 Bible Online

Iba Gana 68 - Huli bible

Iba Gana 68

¹Ngode Datagaliwabe ibuni abale heyalu ibunaga waitigi bu karu talia togo laragoni. Ibuhondo handabe manga haga karu ti ibida piai haragoni.

²Puyabume hagua pulo yalu purogo lagadagua dege Ngode Datagaliwabehanda waitigi bu karu bo taliatogo lai haragoni. Wagaya ira dene hondowa elalu ereba hagadagua wali agali ko karu Ngode Datagaliwabenaga deni howa mo ko hai haga.

³Wali agali mini tigabi karu ti dege turubiore howa Ngode Datagaliwabenaga deni miniha dungulo halu ti turu timbuni ho haga.

⁴Ngode Datagaliwabehondo iba gana ladaba. Ibunaga mini yaraga halu iba ganaru lalu holene nga. Ibu hari beralibani biralu piaga kago ibilo hariga mo tiga bia holene nga. Ibunaga mini Anduane Homogo ka. Iname ibunaga deni howa turu hami̱ya.

⁵Ngode Datagaliwabe ibu ibuni andagaha howa ibugua waneigini aba ai̱yala homene karubi wali dalo agalini homene bedarubi ti bibahende handayaho haga ka.

⁶Wali agali tini hangu haga karu ti anda mo migi bialu bayale berelaga ka. Wali agali garabaya bu helene karu ti golope howa ibugua tini daluha haru dai bialu ti turu ho helo helaga biaga. Agali doga haga bu karu ti dindi ko yobi iba dalu naibaga ngagoha pu haabobo bu holebira.

⁷Ngode Datagaliwabe-o bamba í̱na í̱naga wali agali haru tagira ibalu ti dindi ko wali agali nahaga wiagoha haru halu ibirigoni.

⁸Horo ogoningi Ngode Datagaliwabe ibu Hari Sainai ala íbu hariligoria áyu íbu kegoni. Isaraele wali agalinaga Ngode Datagaliwabe í̱ni ibirigola dindi dumbirumbi bialu hari daligaha howa iba dalu timbuniore ibiniya.

⁹Ngode Datagaliwabe í̱nime í̱naga dindini iba dalu timbuniore ibilarigola dindi ala ko wiyago lone mo bayale harigoni.

¹⁰Í̱naga wali agali ti dindi ogoni karulayagoni. Í̱ baya gibiore kegome wali agali burupale hearuhondo tomo dabudaburubi migi birigoni.

¹¹Anduane Homogohanda bi layagola wali dewa biru wiarume bi te uruni lamima piyagoni.

¹²Bi te lamima piyadagoni ogodagua, Kini karu heba tinaga ami bu karubi bibahende ibida piai haragoni. Agali tigua wai labuha howa mbirale mo yalu ibiyaru wali andaga berearu baba talebu ta haga biya.

¹³Ega malibu ale silibame wabiniru babagane ngolome hoai laradaguabi wiaru tigua mo tale bigi bini. Ainde irane agome agali maru wai nape pabeha nogo sibi heba hayabe, laga biya.

¹⁴Ngode Datagaliwabe Hongo Haiheore kagome Hari Salamono ogoniha kini hearu bo taliatagi halu purogo lelowa ibugua dalu dindi guni timbuni hari ogoniha ibilaya.

¹⁵Hari Basananaga ibu hari timbuniore weda. Hari ogoninaga hombene bolebolene dalidali bigi bida.

¹⁶Hari timbuni hombene dewa bolebolene hagahagabi kego-o í̱na hari emene Ngode Datagaliwabe ibuni birulenaga dabo heledago de hondowa irane aginaga henge larebe. Anduane Homogo ibu hari ibuni dabenego ogoniha haabobo bu holebira.

¹⁷Anduane Homogo ibuni Hari Sainai wahalu ibuni anda loma bia hene biagoha íbu kagoni ndobe. Ibunaga ami agaliru wai biaga garo ale nogo hosime gililo yalu piaga mini karisiru daosini dagalabe nahe dewaoreni hagahaga bialu ti haru ibiyagoni.

¹⁸Ngode Datagaliwabe ibu ibunaga hari daligaore wiagoria iraga halu agali dewaore minalu haru halu piya. Agali dogahe wai biaga hearume ibu mo turu halu mbirale migi biyaru mo yaya. Anduane Homogo Ngode Datagaliwabe ibuni hari daligaore ogoniha haabo holebira.

¹⁹Iname Anduane Homogonaga mini yaraga hami̱ya. Ibugua inanaga genda ngelo kamaru horo bibahendengi ya haga kagoni. Ina pele ngialu mo wiaga Ngode Datagaliwabe ibuni hanguore kagoni ndobe.

²⁰Inanaga Ngode Datagaliwabe ibunime ina pele ngialu haabo kagome ina bayale kamagoni. Anduane Homogo ibu inanaga Anduane Homogo kago ibugua ina homa nabi bayale holoma̱yanaga pele ngiaga kagoni.

²¹Ngode Datagaliwabehanda ibula waitigi haga karubi mana ko ngaru hangu mo tene haga karubi ti bibahende bo wahai holebira.

²²Anduane Homogohanda lalu, Tínaga waitigi amu Basana dindini bu karu minu yudai bulebero. Ti unuraore iba solowara timbuni bedago andanehaore heaguabi harugo lowa i̱na minu yudaiore bulebero.

²³Tínaga waitigi uruni baiore howa tí bu miniha dungulo halimulo tínaga biango bu karume waitigi uruninaga darama na dege bialu no karulapelobi i̱na ani minu yudai bulebero, laya.

²⁴I̱naga Ngode Datagaliwabe-o í̱na wai bialu wayali harigo de hondowa manda bu kama. Ngode Datagaliwabe i̱naga kini kego í̱ninaga anda loma bia heneha turu halu anda porego ina bibahendeme de handai ho kama.

²⁵Iba gana lagarume bamba halu ngida ale lagaru ti maha ibiragoni. Wandarime irabitele ale maru yuwa tigua bama dombeni ibiragoni.

²⁶Tigua iba gana laraga halu howa lalu, Wali agali íbu ngoaiho kamarume inanaga Ngode Datagaliwabenaga mini yaraga hama. Ina Isaraele wali agali bu kamarume Anduane Homogonaga mini mo yaraga hama, lama ibiragoni.

²⁷Beniyamini hameigini emene hayaru tigua mo bamba hara. Yuda hameigininaga agali haguane bu hearu tigua Beniyamini hameigini erembiraha pora. Sebulunu hameiginibi Nabadali hameigini tinaga haguane bu hearubi tigua o piyaru mama talima poragoni.

²⁸Ngode Datagaliwabe-o í̱ninaga hongo inahondo mo walia habe. Bamba í̱naga hongo ogonime ina mo wirigonigo áyu walia habe.

²⁹Í̱ni anda Yarusalemeha kagoria kini tara tara bu hearume í̱ mo turu hole mbirale mbirale bame í̱hondo ngule mo yalu ibiragoha howa í̱na í̱naga hongo walia habe.

³⁰Nogo gabua timbuni iba puguaha haga biago hongo howa talibe.[2] Nogo bulumaga wangaberu bulumaga igini heba haradagua helaga karubi hongo howa talibe. Tinaga muni siliba yu karu í̱hondo ngialu í̱ni kegoha ibalu bulupalialu ge duli hanga helonagaore í̱na hongo howa talibe. Hameigini tara tara wai bule hamelo karu ibida bilibulu purogo lelo bo taliatagi hai habe.

³¹Iyibinaga kinime ibunaga agali haguane bu karu ti í̱naga bi larego hale helo Yarusalemeni ibilaga bulebira. Idiobialirume gi yaragaho howa í̱hondo bi lolebira.

³²Wali agali dindi tara tarani bu kamiru aibe. Tígua Ngode Datagaliwabehondo iba ganaru lagalaga bidaba. Anduane Homogonaga mini yaraga halu iba gana ladaba.

³³Mbirali ibu hari daligaha beralibani ge halu piaga kago ibunaga mini yaraga hadaba. Ibunaga bi hongo howa hari kulu laradagua biaruago hale hadaba.

³⁴Wali agali bu kamiruni bibahendeme Ngode Datagaliwabenaga hongo timbuni kago lalu latagi halu hadaba. Isaraele wali agalirunaga kini daligaore ibu kagoni. Ibunaga hongo taraore hari daligani walia harane de hondo kama.

³⁵Ngode Datagaliwabe-o í̱ tara baya burugule gibiore howa í̱ninaga anda loma bia heneha kegoni. Isaraele wali agalirunaga Ngode Datagaliwabe ibugua ibunaga wali agali bu karuhondo hongo miaga ka ndobe. Ina Ngode Datagaliwabe mini yaraga hai hami̱ya.