Read Huli Iba Gana 69 Bible Online

Iba Gana 69 - Huli bible

Iba Gana 69

¹Ngode Datagaliwabe-o i̱ gi mibe. Iba birama irayagola ai ibame namu lelo ma paho kogonigo gi mibe.

²Waru lumburani hewaria unura waruha yalu anda porane kogoni. Ge hade holene dindi giambe mbira nawida. Iba uli bereagoha ge hape halu ko. Ani bialu koria iba yaribu bu yu ibalu i̱ bu dambi haragola iba nalu homole kogoni.

³Ai homaore biruda handala Ngode Datagaliwabe-o í̱na i̱ biamogo bibelonaga i̱na í̱ o dege lalu hewane ai i̱naga kembobe pu kagoni. Í̱ eberebe hondole lowa de handayaho wia dege biwane ai i̱naga de tandaga bialu hongo bibahende pirilipe kagoni.

⁴Wali agalime irane nawioreni i̱ bame handabe manga haga karu ti dewaore daga labe nahe kagoni. I̱naga haguaneni mandari li bu karuni goyane lowa ti dewaore daga labe nahe kagoni. I̱naga waitigi urunime tindule i̱na agua biya lalu ti bi degeme mo para halu kagoni. Tigua hongo gibi howa i̱ bo waore hole manda bialu kagoni. Ti bi degeme i̱ kayu nabini wiwago tindule, Í̱ kayu biri, lalu ka. Ti bime mo para hayagola mbirale i̱naga wiwago irane nawini bameore ti mirugoni.

⁵Ngode Datagaliwabe-o i̱na i̱ ko nabiaga kogoni lalu ndo laro. I̱ ko biaga dege ha kogonigoyu nde i̱na ko biruruni mbira í̱ deni wia do hene nawi tigatiga binigobi lapani hai harugoni ndobe. I̱ mini nawi howa birurubi í̱ manda biai ho kegoni.

⁶Anduane Homogo í̱ Hongo Haiheore howa Bibahende Haru Haame Ho Haga kegoni. I̱na mana ko mbira berogome wali agali í̱ni hana ho karu taga helo mbira buligo í̱naga gime i̱ yaniore habe. Isaraele wali agalinaga Ngode Datagaliwabe í̱ kegonigo i̱na mana ko berorume wali agali í̱ mitangi bialu lotu laga karu taga halu de handa dindi hai helo i̱na mbira buligo í̱na i̱ mamage habe.

⁷I̱na í̱ talima ibalu kogonaga wali agalime i̱ lo guralu mege bialu i̱ mo taga halu kagoni.

⁸I̱ninaga hameneorerume i̱ kogoni agali tara dindi tarali ka manda bidagola kogoni. I̱ninaga aba ai̱ya hamene mbalinirume i̱ kogoni tiha howa tagira peneda ndo agali tara mbira dindi kaundiali íbu kagoni ledaha kogoni.

⁹Í̱naga anda bayale haabo helo i̱na hame timbuni lalu kogome i̱naga bu habaneha ira daradagua biragola haruli. Wali agali karume í̱ mege bialu bi laga biragoni i̱ni laba halu kagoni.

¹⁰Í̱naga deni i̱nime i̱ni mo dindiha halu tomo nane haruli. Ani berogola wali agalime hondowa i̱ mege bialu lo guraga.

¹¹Dara howa duguanda howa aga biaganedagua bu kogola tigua i̱ hondo oba halu lo guraga.

¹²Ti hariga hariga mo mogobu kago howa i̱ kedalu dege lalu kagoni. Lulu iba nowa tibaga lowa karumebi ti ne harigaha howa iba gana ende haga bialu laga birago i̱ lo guralu hangu laga biragoni.

¹³Ti ani lo helowa i̱na Anduane Homogo í̱hondo bi lolebero. Ani larogo hale halu Ngode Datagaliwabe-o í̱nime ogoangi ladai bule lo manda bidengi ladai bibe. Í̱na hale halu ladai bulebeda lo manda bidogo irane í̱na i̱ gubalini timbuniore ho kego manda bidogome. Ani bialu í̱ ke̱ nahagaore kego manda buwa heneneore i̱ pele ngulebereda lo manda bu kogoni.

¹⁴Waru lumburani kogola ge namulai halu i̱ni waruha anda piai habehe bu hinarago í̱na i̱ gi mibe. I̱naga waitigirume i̱ bo waholigo í̱na i̱ de hondo habe. Iba uli ngagoha i̱ ibaha namulai holigo í̱na i̱ de hondo habe.

¹⁵Iba li timbuni ibiragome i̱ namu lalu hilu yalu poligo í̱na i̱ de hondo habe. Iba uli bedagoha i̱ namu lolani í̱na i̱ de hondo habe. Homalime i̱ mo mbedogo buligo í̱na i̱ de hondo habe laro.

¹⁶Anduane Homogo í̱na i̱ horo bibahendengi gubalini haho wiaaboore haga kegome i̱na bibe larogo hale halu ladai bibe. Í̱naga gubalini haho wiaabo holene ogoni mana bayaore gibi ogoniya. Í̱naga dara holene gibi ngegome i̱ handaya halu i̱na bibe larogo hale halu ladai bibe.

¹⁷Í̱naga biabe bia haga o kogo ko handala í̱ ha do nahabe. I̱ genda timbuniore yu kogonigo i̱na bi larogo hale halu áyu ogoni abale ladai bibe.

¹⁸Áyu ogoni i̱ kogoria kaware ibalu i̱ gini mibe. I̱naga waitigi karume ibalu i̱ yani nakaore í̱na abale ibalu i̱ gini mibe.

¹⁹Agali bu karume i̱ mege bialu lo guralu karu í̱ mandabide. Tigua i̱ mo taga halu mo yo hondo wahalu ti ge waraha heledagoni í̱ de hendedegoni. I̱naga waitigi bibahende karu í̱ de handaiore ho kegoni.

²⁰Tigua i̱ mege biyago mitangi bialu hewaria i̱naga miniha genda gibi halu i̱naga gubaliniore tumbudu bidagoni. Hongo mbira hole ndo aiore hongo pirilipe haiho kogoni. Ai i̱ darahe mbiraorebi nde holebira lo manda biwaria mbira naholeoreya. I̱naga mini mo dungulo dai bulene bi lolene mbira holebirabe toba hewaria mbiraoreorebi mbira naholeoreyane handaru.

²¹I̱ tomo garibilo hewaria tomo kaubi tara mbira na lalu ngiya. Iba noaho harugola waini iba ko kaubi na lalu hambu ngiya.

²²Ani biyago ti turu halu tomo timbuni dawa payabu nalu bedaria tini ogoningi homai nahara. Turu ogoriani hairi halu tomo loma bini ngaru narolo manda bidaria bibahende homa hilai nahara.

²³Uruni bibahende arumaha luluyu helo ti bibahendenaga de mo ndibulai habe. Ti bibahende ere pode ulahe helo tinaga erene kuni mo gedaore haabo habe.

²⁴Í̱na tihondo keba timbuniore halu ti mini wilo mana halu mbira labe. Í̱naga keba holeneme ti bo ereba hai helabe.

²⁵Ti balai anda karuha mbiraorebi mbira yu waheloleni. Bibahende bo mburi labe. Balai andaru ti haradago bame dabulu ngelabe.

²⁶Agali maru ti ala ko biyagola í̱na ti pani mini hayaruni ai agali ko biaga karume agali o biaruni lone áyu mo tandaga halu ka. Ani bialu agali maru ala ko biyagola í̱na ti pani mialu tinginini motudu wilarigo agali biaruni áyu agali ko biaga karu tigua lone mege bialu mo tandaga halu ka.

²⁷Agali ko biaga uruni tigua ko biraru bibahende í̱na baya hangu de hondo howa ilu wigi bibe. Ko biaga uruni mbiraligo í̱naga waneigini pele miniyi karuhayagi anda ibulani.

²⁸Ko biaga uruni tinaga mini haabo holenenaga mbugani gilibu wulani domo wahabe. Í̱naga wali agali mini tigabiwi karunaga mini gilibu ngegoria ko biaga uruninaga miniore mbira mbuga ogoriani gilibu wulani.

²⁹Ai i̱ genda timbuniore yuwa tandaga nalu kogoni. Ngode Datagaliwabe-o í̱na i̱ gini mialu lone mo heyu helabe.

³⁰I̱na iba gana mbira lalu Ngode Datagaliwabenaga mini mo yaraga holebero. I̱na ibuhondo ka̱i̱ lalu ibu timbuni daligaore gibi ogobi ka lalu maru lamulebero.

³¹Ogonidagua berogo hondowa Anduane Homogo ibu turuore holebira. Nogo bulumaga dewaru bo lomabu merogo hondowa turu hagadagua ndo ibugua turu timbuniore holebira. Bulumaga wangabe habaheore timbunigo bo lomabu mialu delaruyaguabi hondowa ibugua turu emene holebirago o larogodaguaore biruyagua turu timbuniore holebira.

³²Wali agali gendayu karume ogonidagua berogo hondowa ti turu holebira. Wali agali Ngode Datagaliwabe dunini kago mitangi bialu lotu laga karu ti turu halu miniha elahe holebira.

³³Anduane Homogo ibugua wali agali mbirale buru pale karume ibuhondo bi larago hale halu biamogo biaga ka. Ibugua ibunaga waneigini garabaya andaha karubi embeda nahaga ka.

³⁴Hari daligabi dindibi iba solowarabi mbirale iba solowaraha bedarubi tí bibahendeme Ngode Datagaliwabenaga mini mo yaraga hai halimu.

³⁵Ngode Datagaliwabehanda ibunaga Yarusaleme wali agali pele mialu Yudanaga tano mo ko hene ngaru lone bia aribia holebiragonaga tigua ibunaga mini mo yaraga holene nga. Ibunaga wali agali ti turu halu tano odaruniha ho halu dindi ogoni ti karulalu tinagaore holebira.

³⁶Ibunaga biabe biaga karunaga waneigini aguane mani hararume dindi ogoni karulolebira. Wali agali ibu gubalini heneneore haga karume dindi ogoni karulowa haabo holebira.