Read Huli Iba Gana 7 Bible Online

Iba Gana 7 - Huli bible

Iba Gana 7

¹Anduane Homogo i̱naga Ngode Datagaliwabe-o waitigi bu karume i̱ handa walia nahelo í̱niha ha do hole eberogoni. Agali i̱ minule talima ibalu karume i̱ bo wa nahelo biamogo bialu i̱ mo ko nahelo í̱na i̱ pele ngibe.

²Laiono gabuame wali agali bo budabaga biagadagua i̱naga waitigi karume i̱ bo budabagabu waholani. Tigua dindi ko mbirali i̱ biamogo bulene nahe ngagoha minu waholigo i̱ pele ngibe.

³Anduane Homogo i̱naga Ngode Datagaliwabe-o i̱ha biako hene mbira wiaguabi i̱na mbirali kagohondo ko mbira bini wiaguabi

⁴i̱na i̱naga nenege mendeali kago ndelene wiaguabi waitigi karuhondo bame ko biaede hene wiaguabi urunidagua i̱na bini wiagua nde

⁵waitigime i̱ minilo wahabe laro. Tigua i̱ bo hengedo wahalu i̱naga tingini bo budabaga bialu dindini bame baa̱i̱ halu pelo wahabe.

⁶Anduane Homogo-o í̱nime keba howa heyabelo hamelo ko. I̱naga waitigime i̱la wai hongo howa bialu karu ti mo ko halu bai habe. Í̱na mana tigabi hangu biaga kegoni ndobe. Ani kego ai í̱na abale ibalu i̱ biamogo bibe.

⁷Í̱ni dahuliya andaga biragane dagia ngegoriani biruwa í̱na wali agali bibahende karu í̱ni kegoha mo ngoai halu handame ho habe.

⁸Anduane Homogo-o í̱na wali agali bibahendeme mana ko birago mo tale bialu dabaga ke. I̱na mana bayale tigabi wiago bialu haabo halu harugo manda buwa í̱nime i̱ dababe.

⁹Ngode Datagaliwabe-o í̱ bayale tigabi biaga kegoni. Í̱na wali agali bibahendenaga bu miniha manda buwa mo tale bialu dabaki biaga kegoni. Wali agali mini kowi karume mana ko biraru í̱nime mo wahai habe. Dabaki bialu wali agali tigabi karu ti bayale helo í̱na ti biamogo bigi bibe.

¹⁰Ngode Datagaliwabe ibu i̱naga haru hagaore kagoni. Ibugua wali agali mana tigabi biaga karu biamogo biaga kagoni.

¹¹Ngode Datagaliwabe ibu mana tigabi ngadagua tigatigaore mo tale bialu dabaga ka. Wali agali mana ko biaga karu ibugua ti bope haabo haga ka.

¹²Wali agali ko biaga karu tigua mana ko wahai halu mini beregeda nabi heagua nde Ngode Datagaliwabe ibugua ibunaga wai biagane ayu tibu baya hangu nage wialu ne holebira. Ibugua ibunaga danda ngago wai bule manda manda bu wulebira.

¹³Ibugua wali agali uruni bo waholenaga manda manda bialu timu edaho kagoni.

¹⁴Wali agali ko biaga karume ogobi ka manda bidaba. Tigua mana ko ngaru bulenaga buleore lalu miniha hongo haga ka. Tigua mana ko ngaru hangu bialu haabo holenaga ke̱ haabo haga kagoni.

¹⁵Agali mende kago minule lowa gundu uli tombo wu haga ka. Uli ogoni tombo wu kagoha tini pu aribia holebira.

¹⁶Anidagua dege ko tigua biyagome tiniha wiadambi hai holebira. Agali mende kagola keba howa lai lalu gungu bule mandabu heagua nde o biagohondo bule mandabu kago tiniha biadai bulebira.

¹⁷Anduane Homogo ibugua tigabiore bialu haabo haga kagonaga i̱na ibuhondo ka̱i̱ lalu ko. Anduane Homogo Daligaorene Daliga kagonaga mini yaraga halu i̱na iba gana bayaleru laga bialu holebero.