Read Huli Iba Gana 71 Bible Online

Iba Gana 71 - Huli bible

Iba Gana 71

¹Anduane Homogo-o i̱ í̱la mandagi haabo kogola waitigi karume i̱ mo ko habe nahe ko. Tigua i̱ bope halu wayali helo yupe nahabe.

²Í̱ tigabiore kegonigo i̱ waitigirunaga giha koria pele ngialu haru dai bibe. I̱na bi larogo hale halu i̱ pele ngibe.

³I̱naga wai pabe hongohe alebi anda hongohe alebi í̱ habe. I̱ ibida pialu í̱ha dege ha do hole eberogola handayaho habe. Í̱nime dege i̱ baya hangu handayaho kegola i̱ bayale holebero.

⁴I̱naga Ngode Datagaliwabe-o agali mini kowi karunaga giha koria i̱ haru dai bibe. Agali hongoheore tara howa mana koorene ko ngago biaga karunaga giha kogola pele ngibe.

⁵Anduane Homogo Bibahende Haru Hame Ho Haga-o i̱ í̱ha mini dunubia ho kogoni. I̱na igiri daliaheni howa í̱hondo mini mbiraore wu henego kogoni.

⁶Bibahendengi i̱na í̱ha hanaho harugo kogoni. I̱ ai̱yahanda taba hanayangi howa í̱na i̱ handayaho haabo harigoni. Ani harigonaga i̱na í̱naga mini yaraga halu haabo holebero.

⁷Wali agali bu hearu dewalime i̱ de hondowabi í̱na i̱hondo biriru hondowabi í̱na i̱ hongo howaore handayaho kagonida lomanda biai ho ka.

⁸Horo bibahendengi i̱na wali agali bu karu hendelo í̱naga mini yaraga halu í̱ mini leneore kegoni latagi halu haabo haruli.

⁹Áyu i̱ agali waheore howa hongo hodai bule ndo biru ngogo í̱na i̱ erembira ngialu yu waholeni nahabe laro.

¹⁰I̱ waitigi bu hearu tigua i̱ bo waholenaga mo mogobu howa ndelalu kagoni.

¹¹Tigua lalu, Ngode Datagaliwabehanda agali ogoni yu wahayadago abale minami̱ya. Ibu biamogo bulene mbira naheoredago iname abale talima pugupugu bialu minu yania hami̱ya, laga bialu kagoni.

¹²Ngode Datagaliwabe-o i̱ hangu helalu í̱ kaundia nahabe. I̱naga Ngode Datagaliwabe-o í̱na i̱ biamogo bule abale ibabe.

¹³Agali i̱hondo bi laedede bialu karuni í̱nime ti bope halu ereba hai helabe. Tigua i̱ mo ko hole wai hanalu kago ai tini taga helo mo ko hai halu mo luluya ho helabe.

¹⁴Anigo í̱na i̱ biamogo bibelonaga í̱hondo mini dunubia ho kogoni. I̱na í̱naga mini yaragaore haabo holebero.

¹⁵Í̱na mana tigabi bigi biriruni wali agali bu karu lamialu holebero. Í̱na pele ngialu haru dai biriruninaga tene i̱ manda biai nahego nde harugo lowa te ogoni horo bibahendengi tihondo lamiaabo holebero.

¹⁶Anduane Homogo Ngode Datagaliwabe kego í̱ hongo timbuniore kegonaga i̱na í̱naga mini yaraga halu holebero. Í̱ni hangu mana bayale tigabiore biaga kego lalu i̱na latagi halu holebero.

¹⁷Ngode Datagaliwabe-o i̱ bamba igiri emeneni hewangi í̱na i̱ lawai haabo hariligoni. Áyubi nde í̱na mbirale bayale tara tara bererunaga i̱na latagi halu haabo kogoni.

¹⁸Ainde i̱ agali waheore halu i̱naga mandariru daguame be duguame haradagua biyadago Ngode Datagaliwabe-o í̱na i̱ yu wanahabe laro. I̱na wali agali mani holobadaruhondo í̱naga hongo timbuni ogobiore ka lalu lamigi buliya í̱ni i̱la haabo habe.

¹⁹Ngode Datagaliwabe-o í̱na mana bayale tigabi biriruni wali agali bibahendenaga deni panigi wiai ka. Í̱na biabe hongohe timbuniore bini ngegoni ndobe. Agali dindini hene karu í̱ ale mbira nahe í̱ni hangu bolangua haiheore kegoni.

²⁰Í̱na i̱ha genda tandagabi tara tara ibilaga birigoni. Í̱nime i̱ lone mo hongo holebere lo manda bu kogoni. I̱ homaliha ngoria í̱nime i̱ lone mo heya holebere.

²¹Í̱na i̱ mini lene winigo mo yaragaore ho ngelalu i̱naga bu miniha mo palia holebere.

²²I̱naga Ngode Datagaliwabe-o í̱naga mini bilinahe haabo kegonaga i̱na ngida ale balu í̱naga mini yaraga halu iba gana lolebero. Isaraele wali agalinaga Ngode Datagaliwabe baya buruguleore kego i̱na ngida ale balu í̱naga mini yaraga halu iba ganaru lalu holebero.

²³I̱na lalu howa turu timbuniore halu bi hongo howa ladaga holebero. Í̱na i̱ pele ngialu mo wirigonaga i̱na ne hariga hangume ndo i̱naga minimebi gubalinimebi í̱hondo iba gana lalu latagi holebero.

²⁴Agalime i̱ mo ko hole wai hanalu henego ai tini ko halu mo taga hai hayagonaga i̱na horo bibahendengi í̱naga mana bayale tigabi biaga kego lalu wali agali bu karuhondo lamiai holebero.