Read Huli Iba Gana 73 Bible Online

Iba Gana 73 - Huli bible

Iba Gana 73

¹Ngode Datagaliwabehanda Isaraele wali agalihondo bayaore gibi turubini hangu biaga kagoni. Ibugua wali agali tinaga bu habaneha mana ko mbira nawi tigabiore karuhondo baya turubiniore bigi biaga kagoni.

²Ibugua ani biaga kagoyu ai i̱ore mana ko bialu pilalu penego habo laru. I̱ ge gundu lalu pilope halu mini mbiraore wu harugoni hadogoea lowa yu wahalu tagira pobehe haru.

³Ani harudagoni irane i̱na handalu hewaria wali agali mini kowi hearu tigua mbirale bigi biyaru bayale haga bialu ti homogo hama piyago hondowa ani haru. Tigua biyago handarugola tinaga wiago degeni i̱naga miniha i̱ nayido agini henge lolenego hongohe tagira ibiya. Ani biyagome i̱ mini mbiraore wu harugoni yu wahalu tagira pobehe haru.

⁴Ani handalu hewariabi wali agali ko biaga uruni ti warago bolenebi tandaga nolenebi mbira nahende tinaga tinginibi bayaore hongohe hearia handaru.

⁵Wali agali maru karume tandaga nalu kadagua wali agali ko biaga uruni ti kagoria tandaga nane kane handaga biruli. Wali agali maru kagoria genda bulene tara tara íbu wigi biagadagua wali agali ko biaga uruni ti kagoria naíbu wiraya.

⁶Ti genda mbira nahende howa mine timbuni halu tinaga tingini ganini wialu balagala hama ibaga biaga ka. Ani bialu tigua wali agali maru karu bame irane nawinini motudu wini balu mo ko haga ka.

⁷Tinaga bu miniha mana ko ngubi tara tara buleneru hangu wai hanalu tinaga bu habaneha ko buleneme to̱lotagihe ka.

⁸Tigua wali agali maru karu mege bialu hondo oba halu bi ko tara tara biaga ka. Tigua mine gibiore halu wali agali maru karu hengedope halu mo tandaga holenego agua habehedabe hondole hariga hai bialu haga ka.

⁹Ani bialu tigua Ngode Datagaliwabe dahuliya andaga kago lalubi lo guralu haga ka. Tininaga mini mo yaraga halu tigua hame ledadagua hangu wali agali marume bilo bidaba lalu hongo howa lamiaga ka.

¹⁰Anidagua lamiragola nde Ngode Datagaliwabenaga wali agali karumebi heba mini kowi urunime bi larago hale halu turu howa yu tiga biaga ka.

¹¹Agali ko urunime bi urudagua laga ka. Iname mbirale bigi beremaruni Ngode Datagaliwabe ibu manda nabulebira. Ngode Datagaliwabe Daligaorene Daliga kago ibugua iname beremarubi laramarubi goarialu handa walia holenego hariga nawiore laga ka.

¹²Wali agali mini kowi karu tigua mana urunibi bigi biaga ka. Tinaga mbirale dewa bu payabu wia ngagoyu uruni ngelowa dege maru lone mo te dege bule hai bialu kagoni.

¹³Ko biaga uruni ti ani bialu kagodago ai i̱ mana ko mbira nabiore i̱nime i̱ni mini haru halu ko nabi tigabi harugoni o kogoni. Ai ti ko biyadagua i̱ nde bua nale hogoralebu harudagoni nde irane nawini aginaga haruyabe.

¹⁴Ngode Datagaliwabe-o í̱na mbiraga horombebi i̱ tandaga dege ngiaho wialu egerebagi bibahendengi í̱na i̱ minu baho ngegoni irane aginagabe.

¹⁵Wali agali mini kowi biaru tigua layadagua i̱na mbira lenedale i̱na í̱naga wali agalime lolenedagua ndo ledole.

¹⁶Ko biaga uruni tigua mbirale bigi biragonaga teneorego agidabe hondole lowa handalu hewaria i̱na handa walia habe nahe erekuibioreyane handaru.

¹⁷Mitangi bialu tenego minime daba dege bialu howa handa walia nahe henego maniore Ngode Datagaliwabe í̱naga andaha anda pirugola tenego handa walia haru. Í̱naga andaha anda pirugola i̱naga mini biagoni wá layagola mbirale bayuwa manda bibehe haru. Wali agali ko biaga uruni tibi nde mani ogobini tagira polobada lalubi mitangi tagira íbu dege biya.

¹⁸Ngode Datagaliwabe í̱na wali agali mini kowi uruni ti hariga gindigunduleore ngarunaga pelo pelolebere. Hariga gindigundule uruninaga pialu karia ge kundu lowa mo paraho pilope halu homo tongolo milolebere.

¹⁹Ti abaleore homo tongolo mu daga holebira. Agali homaradagua ndo mo koore howa homolebira.

²⁰Anduane Homogo-o ko biaga uruni ti bame mbiraga emaga andaha mbaria dange harigi yu haganedagua yu kago egerebagi gao laragola ereba haganedagua yu karu ereba hai holebira.

²¹I̱naga miniha tandaga bialu tinibi toga layagola

²²i̱ bu habaneha keba dege dindi halu nogo gabua mini nawi hagadagua howa í̱ mitangi bulene ereba halu i̱na mana biruru í̱ deni ogonibi bialu harugoni.

²³Ani bialu howa dege i̱na Ngode Datagaliwabe í̱ yu wanahe í̱ hegoha kaware haparaho harugola í̱na nde i̱naga gini yaniho hariligoni.

²⁴Í̱na i̱ aguaore habe lalu í̱naga bi mana bayaoreru langialu mo tiga bialu kegoni. Ani mo tiga bialu howa i̱ hamaro berongi nde í̱na i̱hondo turu halu habiya íbu lole kegoni.

²⁵I̱ de handayaho haga dahuliya andagani mende ai kabe. Mendeali nahe Ngode Datagaliwabe í̱ hangu kegoni. Í̱ hangu kego manda buwa i̱na í̱ gubalini timbuniore ho kogoni. Mbirale dindini bu payabu ngaru gubalini holene agi ngabe. I̱na í̱ore gubaliniho kogoni.

²⁶I̱naga minibi tinginibi hongo nahe gedaore hayaguabi Ngode Datagaliwabe í̱ i̱naga hongo holene tene kegome i̱ karulapeore haabo holebero.

²⁷Ngode Datagaliwabe í̱ yu wahalu piaga karu ti pu erebaho wahalu homolebira. Wali agali ala í̱hondo mini mbiraore wuwa í̱ talima ibaga howa áyu í̱ erembira ngialu tagira pu karu heneneore pani mialu ereba hai helolebere.

²⁸Uruni ani buleberegoyu i̱ dege Ngode Datagaliwabe í̱ kegoha hapara ho kogome bayaore turubi i̱ hoale ngagoria kogoni. Anduane Homogo Bibahende Haru Haame Ho Haga-o i̱naga pabe tigila í̱ni kegome kogoni howa mbirale í̱na bigi biriru agua biri lalu latagi hai holebero.