Read Huli Iba Gana 78 Bible Online

Iba Gana 78 - Huli bible

Iba Gana 78

¹I̱naga wali agaliru-o i̱na tíhondo bi lawai harogo tígua bayuwa hale haiore halimu. I̱na bi larogo hale dugua halu baya hangu hale halimu.

²I̱na bi yobageru hangu lolebero. Mbirale nahendene ale tara tara bamba wia do ho winiru i̱na áyu garea lalu manane walia halu langulebero.

³Bamba ina mamalirume te uruni inahondo langiyagola iname hale howa mandabu harima.

⁴Iname nde bi uruni ina waneiginiruhondo lamia nabi ya do holene nakarulapeore. Anduane Homogonaga hongo timbuniorehe kagonagabi biabe hongohe damene binigonagabi agalime nabiaga ale bigi binigonagabi iname ina waneigini aguanene mani holebiraru lamuleberema.

⁵Ibugua ibunaga bi mana lowinigo Isaraele wali agaliruhondo lamigi bini. Ibunaga mana bulene winigo Yagaba aguanenerume taluwa bialu helo lamini. Ibugua bamba ina mamaliruhondo lalu, Tígua tínaga waneiginihondo i̱naga bi mana ogoni lawai halimu, lalu lamini.

⁶Tí waneigini aguaneru mani holobadarume hale halu lo manda bilo. Tigua ti waneiginiru maniore hama polobadaru lawai hama puabo haragola ti manda biai helobi lawai halimu, lene.

⁷Tigua anidagua lawai hama puabo hayagua nde mani holobadaru tigua Ngode Datagaliwabehondo mini mbiraore wu halu ibugua biabe hongohe bialu henedaru embeda nahe yu haabo holebira. Yu haabo howa tigua ibunaga mana bulene ngaru taluwa bialu haabo holebira.

⁸Tinaga mamalime ala bialu henedagua naholebira. Tinaga mamalime doga haga howa Ngode Datagaliwabenaga bi mo wahalu ibuhondo mini mbiraore hongo howa nawi halu mini bilina nahe hene.

⁹Bamba Eberaimi hameigini tigua danda timu yandarerume wai hongo howa bule pialu hearia baya handala ibida piai hene.

¹⁰Ngode Datagaliwabehanda habo nalolene bi lowinigo tigua habo lalu ibunaga bi mana bulene winirubi talialu bia nabi hene.

¹¹Ibugua tininaga deniore howa mbirale biyaru damenebi agalime nabiagane ale biyaru bibahendebi tigua embeda hai heneya.

¹²Tinaga mamaliru Iyibi dindiha dindi emene mbira mini Soana wiagoria heagola ti de hendeaore dege Ngode Datagaliwabehanda agalime nabiagane ale dewa biniya.

¹³Ibugua iba solowara timbuni bereago mo bira li ni bilowa Isaraele wali agaliru dombeni haru pene. Iba bira li ni biyagola iba ibuni bira amu nana bialu pabe ale hene.

¹⁴Horombe ibuni hari beraliba mbiraha howa ti haru bamba halu mbiraga ibuni ira hungu mbiraha howa ti haru halu pu bamba haga biniya.

¹⁵Ibugua dindi ko iba naibaga wiagoria howa ege to̱le̱ bayagola iba duguatagi helayagola wali agali ti iba ogoni nalu hene.

¹⁶Ibugua ege to̱le̱ha howa iba ibilayagola iba timbuni piagagobi pupe halu piya.

¹⁷Ibugua ani biyagolabi tigua Ngode Datagaliwabe kagohondo mana ko hangu bialu haabo haya. Dindi ko iba dalu naibaga wiagoha howa tigua Daligaorene Daliga kagohondo mine halu doga haabo haya.

¹⁸Tigua Ngode Datagaliwabe ba handalu tomo ti hame timbuni layaru ibuhondo hongo howa ngi lalu haya.

¹⁹Tigua Ngode Datagaliwabe mege bialu lalu, Ngode Datagaliwabehanda ina dindi ko ogoria kamagoha tomo dewa ngia ngulebadabe, lalu heneya.

²⁰Ibugua abale heneneore ege to̱le̱ bayagola iba bayale timbuni tagira ibilayagodago ai dindi ko ogoriabi nogo ega mberediru ngulene karulapedabe, laga bialu hene.

²¹Tigua bi ogoni lalu heago hale howa Anduane Homogo ibu keba ho hene. Ibugua keba halu Yagaba aguane biaru bu heagoha ira hedope hene. Ani buwa ibugua keba ala hayago timbuniore ho hene.

²²Keba henedagoni irane tigua ibuhondo mini mbiraore nawiyagonaga ibu keba hene. Ti bayale holenaga ibuhondo ina pele ngi lalubi mini mbiraorebi nawiore hene.

²³Uruni biyadaruni waha lowa ibugua hari li kagohondo bi layagola hari haedene bialu henge winiya.

²⁴Ibugua hariha howa tomo ibira helayagola tomo ogoni dahuliya andaga tawe mini mena ti nelo mini.

²⁵Tigua dahuliyalinaga tomo ogoni mialu nene. Ngode Datagaliwabehanda tihondo tomo dewaore miyagola ti nalu no karula pene.

²⁶Mani ibugua puyabu hongohe ni tagira ibiragohayagi howa puloyu ibilene. Ibunaga hongome dege puyabu dindi abene unurahayagi howa puloyu ibilene.

²⁷Ibugua ega dewaore be abalu dugupe haradagua bialu iba angeni iba mu wiradagua bialu ti heagoria odo ibira ibira bilene.

²⁸Ngode Datagaliwabehanda ega uruni ti heagoria ibira helalu ti balai anda bu hemigoha manda manda tagira wiaru bibahendeha biru mabu bilene.

²⁹Wali agali tigua tomo uruni nalu no karula pene. Mbirale uruni ngi lalu wali agalime dugu bialu hayaruni Ngode Datagaliwabehanda mini.

³⁰Tigua tomo uruni na nalu hayagoyu tinaga noa holene hame ereba nahe tomo na dege bialu heaore

³¹Ngode Datagaliwabehanda tihondo keba timbuniore ho howa Isaraeleali miniwi hongohe bu hearubi igiri daliahe hearubi bibahende bo wahaiore hene.

³²Ngode Datagaliwabehanda tihondo agalime nabiagane ale uruni biyago hondowa wali agali bu hearume mana ko dege bialu haya. Tigua ibuhondo mini mbiraore nawi dege haya.

³³Tigua ani bialu heagola ibugua ti abaleore ne harigaha howa buhe̱ latagi haradagua bialu bo wahaiore hene. Ibugua ti heagoria ko gibi anda ibilayagome ti dindini holene winigo abaleore mo ereba ho wahai hene.

³⁴Ngode Datagaliwabehanda maru ani bo wahai hayago de hondowa maru hearume ibu mitangibu dai bialu tinaga mini beregedalu mini mbiraore wiai halu ibuhondo bi hongo howaore lalu hene.

³⁵Ngode Datagaliwabe ibunime ti haru hagaore howa tigua ibu tinaga humbi ale ka lo mandabu hene. Ibu Daligaorene Daliga kago ibugua ti biamogo biagaore kalo manda bu hai hene.

³⁶Tigua ani manda biyagoyu tinaga ne harigaha howa ibuhondo bi henene ndo bame bi degeme lalu hene.

³⁷Tinaga bu miniha ibula mini hana haga nabi hene. Tigua ibunaga habo nalolene bi lo wiyaru pugualu ha dege bini.

³⁸Ani biyago bialu helowa Ngode Datagaliwabe ibugua ti dara howa tinaga ko wiago domo wahai halu ti bo wa nahe helene. Tigua ko biyago hondowa ibugua keba ho donge howa ibunaga mini haru haga bialu wahaga bini.

³⁹Ibugua mitangi budai bialu ti wali agali ha kagonigo ti bame puyabu mbira abaleore ibalu pu bolangua hagagobi dege kagonidalo mitangi bini.

⁴⁰Horo bibahendengi tigua dindi ko iba dalu naibaga wiagoha howa ibunaga bi mo wahalu ti doga haga hene. Tigua halu dewaore ibu mo genda haga bialu hene.

⁴¹Tigua Ngode Datagaliwabe ba handalu haabo haga hene. Isaraelealinaga Ngode Datagaliwabe mini tigabi baya burugule kago tigua mo genda haga bini.

⁴²Tigua ibu hongo gibihe kago embeda halu ibugua ti waitigi giha hearia haru dai biyagobi mitangi nabi hene.

⁴³Ogoningi ibugua Iyibi dindiha dindi emene mini Soana wiagoria agalime nabiagane ale dewaore bialu hayagobi ti embeda hene.

⁴⁴Iba bibahende peago ibugua mo darama bume hai helayagola Iyibi wali agali hearume iba nolene nawini.

⁴⁵Bunguna tawalina dewa ibilayarume ti hayaga bini. Yago dewabi ibilayagola yago biarume tinaga mabuha tomo hengearu mo ko hai hene.

⁴⁶Ngode Datagaliwabehanda pagaya ale tara dewa ti hearia ibilayagola Iyibi wali agalirunaga mabuni tomo hengearu damene nai hene.

⁴⁷Ibugua dalu dindiguni timbuni ibilayagome tinaga pu mbira lini daga mini gerebi hearu bibahende bo gindulo wahaiore helene. Ira poge ale bu hearubi kewaro ibirahayagome bo gilo wahai helene.

⁴⁸Dalu dindiguni timbuni ibilayagome tinaga nogo bulumaga bo homelalu hari daba ibilalu nogo sibi damenerubi bo wahaiore helene.

⁴⁹Ibugua Iyibi wali agali biaruhondo keba timbuniore ha ho wiaabo halu dahuliyalirume ti mo ko holene tara tara ibilaga bini.

⁵⁰Ibugua ibunaga keba holene wanahe tiha warago timbuni mbira ibilayagome wali agali homa dege dindi hene.

⁵¹Iyibi wali agalinaga igiri wahene damene bibahende bu hearu ibugua homelo bo wahai hene.

⁵²Mani ibugua ibuni nogo sibi haru haga ale howa ibunaga wali agali biaru haru tagira pialu dindi ko iba dalu naibaga wiagoha howa ibuni bamba halu hariga walia hama pene.

⁵³Ibugua ti haru halu piyagola tiha gi holene mbira nawi howa bayaleore hene. Ti waitigi biaru dege iba solowarame bo nai helene.

⁵⁴Ibugua ti ibunaga dindi loma biaho wiagoha haru halu ibini. Dindi ogoni dindi hari ibuninaga hongomeore mo wini.

⁵⁵Ibunaga wali agaliru haru ibalu howa wali agali tara tara dindi ogoriani hene bu hearu bo talia togolene. Dindi ogoni Isaraele hameigini bibahendehondo tu wa tahalu ibugua dindi andabi ti helo mo migi bini.

⁵⁶Ibugua ogoni biai hayagola Isaraele wali agali tigua Ngode Datagaliwabe Daligaorene Daliga kagohondo doga howa ibu ba hendene. Tigua ibunaga mana bulene winigo talia nabi dege hene.

⁵⁷Tinaga mamalirume bamba bialu henedagua tiguabi nde doga howa ibunaga bi mo wahaga bialu hene. Wali agali uruni ti tiga nabiore timu yole ngaligobi hene.

⁵⁸Dama mitangi bialu mbirale gime wabini wiaruhondo bi pupu wulenaga anda bu helaga biyagome Ngode Datagaliwabe mo keba haya. Tigua dama mitangi bialu mbirale bi pupu wulenaga gime wabigi biyagome Ngode Datagaliwabe mo keba ha haya.

⁵⁹Ngode Datagaliwabehanda tigua mana bialu hearu hondowa ibu keba timbuniore ho howa Isaraele wali agali erembira mialu wahene.

⁶⁰Ibugua ibunaga Balai Anda Silo tanoni heagobi wahene. Anda ogoniha howa ibu wali agali dege dombeneha haabo haga henego wa dege hene.

⁶¹Ina baba waitigi hearume ibunaga Habo Nalolene Bi lo winigonaga Mbogoyi biago mo yalu pelo wahene. Mbogoyi ogoriani howa ibunaga hongo holenebi wá holenebi timbuniore tihondo walia haga wini.

⁶²Ibunaga wali agaliru baba keba timbuniho howa ti waitigime ibalu bo wahai helo yupe ho hene.

⁶³Igiri daliahe hearu waime bo wahai hayagola wandari mabuage berearu ti dabu bulene igiri mbira nahene.

⁶⁴Agali loma binigo mo miaga hearu bo wahai hayagola ti oneme dara howa dugu bialu birulene henge nawini.

⁶⁵Aniore biagola Anduane Homogo ibu agali dagiani palene heyaradagua bialu agali hongoheme waini iba dewa nalu bi hongo howa lagadagua lalu biya.

⁶⁶Ibugua waitigi hearu baba wai bialu ti bo talia dai bini. Ti bopeore hayagola tigua taga timbuni halu wai lone bibe nahe hene.

⁶⁷Yosebe aguanene bu hearu erembira mialu ibugua Eberaimi hameigini hearu ariabi mbira dabo hela nabi wahene.

⁶⁸Ti wahalu ibugua Yuda hameigini aria dabo helalu hari ibuniore gubalini ho haga Saiono biagobi dabene.

⁶⁹Hari hombene ogoriani ibugua ibunaga anda Dahuliya andagaha kagobi bini. Ibunaga anda ogoni hongohe dindi ogo hongohe ngagobi haabo helo ibugua bu helene.

⁷⁰Ngode Datagaliwabehanda ibunaga biabe biahaga helo Debidi dabaya. Ibugua Debidi nogo sibiru haru haga hearia dabo helayiya.

⁷¹Ngode Datagaliwabehanda Debidi ibu Isaraele wali agaliru haru haga kini helo dabo helayiya.

⁷²Debidi ibu mini tigabi howa wali agaliru haru haga hene. Ibugua haru holene mugube yu howa ti baya hangu haru halu handayaho hayiya.