Read Huli Iba Gana 79 Bible Online

Iba Gana 79 - Huli bible

Iba Gana 79

¹Ngode Datagaliwabe-o wali agali tara tara í̱ mitangi nabiaga karume í̱naga dindi wai bialu karulole íbu ka. Tigua anda í̱nagaore helo loma biaho helarigoha anda puwa mebia haya. Yarusalemebi mo ko halu bo gialo wahai haya.

²Tigua í̱naga wali agali bo wahalu ega bodo hariawe aleme nelo tinaga tingini ngelalu pene. Í̱naga biabe biahaga wali agali hearu bo wahai hayagola nogo gabua bu hearume tinaga tingini nalu kagoni ndobe.

³Waitigi biarume í̱naga wali agali biaru bo wahayagola uruninaga darama Yarusaleme tanoha iba poradagua pialu kagoni. Homayaru mo horo holene agali mbira naheoreya.

⁴Hameigini tara tara ina kamagoria kaware bu karume ina mege buwa hondo oba halu bi koru laga bialu ka.

⁵Anduane Homogo í̱na inahondo keba ho haabo holeberebe. Í̱naga kebago hongohe ira hungu ale dalu hundia nabulene kebe be agua bidebe.

⁶Hameigini tara tara í̱ mitangi bialu lotu nalagabi í̱nihondo bi nalagabi karu tihondo keba hariyagua nde karulapeda.

⁷Wali agali uruni tigua í̱naga wali agali hearu bo wahai halu í̱naga dindi andaru mo ko halu mo labu hai haya.

⁸Inanaga mamalirume mana ko bialu hayagonaga pani nolene winigo inahondo nguleni nangibe. Ina mini dege dindi ho kamago hondowa dara halu inanaga mini mbiraore ngamago mo hongo habe.

⁹Ngode Datagaliwabe-o ina pele ngiaga í̱ore kegoni. Í̱ mini leneore kegome ina mitangi bialu biamogo bibe. Iname ko birimaru domo wahalu ina haru dai bibe.

¹⁰Hameigini tara tara bu karume lalu, Tínaga Ngode Datagaliwabe agoha kabe, laga bialu kago irane aginaga í̱na ti ani leledebe. Hameigini tara tara uruni tigua wali agali í̱naga biabe biahaga bu hearu bo wahai halu tinaga darama piyadagua tininaga darama ani pelo í̱na tini bo waharego ina hondole hamelo kama.

¹¹Garabaya andaha bu karume dugu biaruago hale habe. Waitigi bu karume inanaga wali agali garabaya karu ti homelo bolene nga layago nahomelo í̱ninaga hongo timbuni ngegome ti haru dai bibe.

¹²Anduane Homogo-o waitigi agali uruni tigua í̱hondo bi ko laabo hayagonaga í̱na tihondo pani ka halu miadai bibe.

¹³Í̱na ani beregola ina nogo sibi ale howa í̱naga wali agali bu kamarume í̱hondo ka̱i̱ laabo holeberema. Inanaga waneigini aguaneneru mani hama polobadaru tiguabi í̱naga mini yaraga halu hadege bulebira.