Read Huli Iba Gana 8 Bible Online

Iba Gana 8 - Huli bible

Iba Gana 8

¹Anduane Homogo inanaga Anduane-o wali agali dindi bibahendeni bu karume í̱ hongohe gibiore panigi ke lowa manda biai kagoni ndobe. Mbirale í̱nime wabiriru bibahendeme í̱naga mini mo yaraga haragoni ibalu dahuliya andaga í̱ni kegoria anda ibirane hale ho kegoni.

²Wandari igiri emenemebi gali andu nalu karumebi heba í̱naga mini dege yaraga halu iba gana lo ngialu kagoni. Í̱naga waitigi karu í̱ kegoria naanda ibilonaga wai pabe ndo gibiorego payatagi howa í̱ni handatagi ho kegoni. Mbirali mbirame í̱na bigi berego ha hangai halu í̱la waitigi hole manda biyagua ogoni bulilono hapai haga kegoni.

³I̱na hari daliga í̱na wabini li kagoni de handadaga howa handarogola egebi yakundibi li bu karubi helo í̱nime helenedagoriaore li bu karia hendedogoni.

⁴Ani hondowa nde mitangi bialu koria ai ina wali agali nde emene ko bameore handini o bu kamarunidago í̱na mitangi halu handayaho habe nahego nde agiorenaga ina mitangiho haruadabe lo manda bigi biruli.

⁵Nde abule emene bame ogonibiore kamagoni manda buwa dege ina wali agali í̱ni ale degegoyu ina emeneore nira holoma̱ya wabu heledegoni. Ani wabu helowa í̱ninaga wá holenemebi mini yaraga holenemebi í̱nani manda karulo haradagua karulaho heledegoni.

⁶Ina wali agalime í̱na mbirale bibahende wabini dameneru hondo halu ina haguane holoma̱ya heledegoni.

⁷Nogo sibi bulumagabi hinini damenego bibahendebi gabua tagiraha haga damene bibahendebi

⁸ega damene bibahendebi wenabi ibaha biraga damene bibahendeorebi uruni bibahendeore wali agalime hondo hai helo heledegoni.

⁹Nde aniore bidegome Anduane Homogo inanaga Anduane-o í̱naga hongo holene gibiorehe panigi ke lowa wali agali dindi bibahendeni karume manda biaho kagoni ndobe.