Read Huli Iba Gana 80 Bible Online

Iba Gana 80 - Huli bible

Iba Gana 80

¹Isaraele wali agalinaga Haru Haga-o iname bi langeremaru hale habe. Ina nogo sibi ale bu kamarunaga haru haga í̱ni kegonigo iname dugu bialu laramaru hale habe. Dahuliyali babaganehe kirali kago labo dindiha helowa í̱ni de handape howa handayaho kegoni.

²Ina Eberaimi hameiginibi Beniyamini hameiginibi Manase hameiginibi bu kamaruhondo í̱ni mo walia halu í̱naga dara holene ogoni inahondo mo walia habe. I̱naga hongo holene timbuniore ngegoni mo walia halu ina bayale holoma̱ya biamogo bibe.

³Ngode Datagaliwabe-o ina lone í̱ni keria haru dai bibe. Ina bayuwa holoma̱ya í̱naga dara holene walia halu ina biamogo bibe.

⁴Anduane Homogo Ngode Datagaliwabe Hongo Haiheore-o i̱naga wali agali kamarume í̱hondo bi laramago hale howa í̱ dara nahe handa taraho kegoni dege keba haho wiaaboore hole kebe.

⁵Dara holene ngirigo tomo ale nalu de iba ngirigo iba ale nalu kamagoni.

⁶Hameigini tara tara ina baba mandagi handa a̱i na̱i palearume anda ibalu inanaga dindi wimago ti i̱ hole lowa garere bilo í̱na mo garere bia harigoni. Ani biyago handayagola inanaga waitigi bu hearume inanaga dongone hondo wahalu mege bialu hondo oba hayagoni.

⁷Ani biyago Ngode Datagaliwabe Hongo Haiheore-o í̱naga dara holene walia halu ina lone haru dai bibe. Í̱na ina dara halu lone pu ereba naholoma̱ya haru daibu helabe.

⁸Pu mbira lini daga mini gerebi mbira Iyibi dindini hearia egene dogodo yalu ibuwa maru dindi ogoriani hene hearu dugu ba tagitagi buwa gerebi lini daga pu ogoni dugu ba tagi hariru henedagoria hongo aribia harigoni.

⁹Gerebi lini daga pu ogoni ibu bayuwa anda helonaga hama ba a̱i̱ na̱i̱ buwa hangarigoni. Hengegola pu o biagoni anda halu pini dindiha unuraore dalipe halu bayaore anda hayagoni. Pu biagonaga yuni maganeru yulume hayagola dindi bibahende namulai hayagoni.

¹⁰Ibunaga maganerume hari wiaru angua hai halu ibunaga maganeme ira tamia timbuni gibi hearu angua hai hayagoni.

¹¹Gerebi lini daga pu ogoni ibunaga magane yulu yalu pialu amu iba solowara mini Medidereniana bedagoria dogolo paga hayagoni. Ani bialu hoyulo yalu pialu puni Iba Yuberedisi poragoria yulu paga hayagoni.

¹²Bayaore ani anda hayagoyu ai gerebi lini mabu ogoninaga pabe ho mabu biago aginaga podope haribe. Pabe biagoni podope hariyagome ai wali agali ti hariga o biagoniha pume halu gerebi lini do wiaruni bame gi dege palia habehe ngagoni.

¹³Nogo gabua bu karume geme hengedo ngagola ema bialu piaga ale karume nama aribia halu kagoni.

¹⁴Ani bidago Ngode Datagaliwabe Hongo Haiheore-o ainde lone mini wiadai bialu ina darabi o bu kamagoni lone daraho dai bibe. Í̱na Dahuliya andagani kegoni howa ina kamago de handadali halu ina biamogo bule ibabe. Irane ina í̱naga pu gerebi lini daga ale í̱nime hangarigo kamagoni.

¹⁵Pu mbira lini daga mini gerebi biago í̱ninaga hongome hangarigoni ina o bu kamagonigo ina pele ngule ibabe. Pu o biagoni áyu dege hongone hongo halu anda helo mo anda harigonibi kamagoni.

¹⁶Inanaga waitigi hearume gerebi lini daga pu biagoni dibupe howa ira bo delalu kagoni. Tigua ani bialu kago Ngode Datagaliwabe í̱na inanaga waitigi uruni handabe manga halu bibahendeore bo mburilai habe.

¹⁷Uruni ani bo mburi lalu ina í̱ninaga waneigini holoma̱ya dabene biago kamaruni ina mo anda halu mo hongo harigoni kamago ai áyu ina de hondo halu biamogoore bibe.

¹⁸Í̱na ani biamogo biriyagua iname í̱ helo wahalu lone napoleore beremagoni. Ani buleberemago í̱na ina hongohe helabe. Í̱na ani heledegola iname í̱naga mini mo yaraga halu haabo holeberema.

¹⁹Anduane Homogo Ngode Datagaliwabe Hongo Haiheore-o í̱na í̱ni keria ina haru dai bibe. Ina nahome yo pialu poloma̱ya ina dara halu biamogo bibe.