Read Huli Iba Gana 81 Bible Online

Iba Gana 81 - Huli bible

Iba Gana 81

¹Ina mo hongo haga Ngode Datagaliwabe kagohondo turu howa bi dalimu lama. Yagabanaga Ngode Datagaliwabe kagonaga mini yaraga halu iba gana lami̱ya.

²Irabitele kilingele lalu bayuwa bami̱ya. Ga̱wa̱ ale yugulelerubi baya hangu hibu howa mo bila hama.

³Ege pigane ngabu laragolabi ege do hanuni haragolabi turu halu mandagi ngoai howa lotu lolene horo tagira ibiragonaga biguliru pu lolene nga.

⁴Ina Isaraele wali agalime mana bulene ngago ogoni. Yagabanaga Ngode Datagaliwabe ibunime mana ogoni bulene inahondo nginigo anidagua bulene nga.

⁵Horo mbiru Ngode Datagaliwabe ibugua Iyibiali baba wai bu piyangi mana ogoni tehinuwa ina Isaraele wali agali kamaruhondo ngiya. Mbiralime bi mbira laruago hale kogo aiwa laruabe i̱ manda nabi ko.

⁶Bi laruagome lalu, Tínaga payani mbirale gendabi yu harimiruni i̱na mo wahai haru. Tígua erekui biabe timbuni biaga kamiru dindini ibiraho ngeladaba laru.

⁷Tígua genda yu howa i̱ olarimingi i̱na tí biamogo birugoni. Hari kilikulu larago dombeneha howa i̱na tínaga bi larimigo hale haru. Bamba tí Meriba iba bereagoria hemingi i̱na tí ba handarugoni.

⁸I̱naga wali agaliru-o i̱na tíhondo bi hongohe mbira langerogo hale halimu. Isaraele wali agaliru-o tígua i̱naga bi larogo hale halimulo hamelo kogoni.

⁹Wali agali tara tara bu karunaga dama mitangi bialu mbirale gime wabini ngaru tígua talima napilimu. Mbirale uruni alehondo bi pupubi nawilimu larogoni.

¹⁰Anduane Homogo tínaga Ngode Datagaliwabe i̱ni hangu kogoni. Tí Iyibi dindiha hemiria i̱nioreme haru tagira ibirugoni. Tínaga ne harigaha tomo yaanda haga buliya ai ne ha̱ladaba larugoni.

¹¹I̱na bi larugola i̱naga wali agalime hale habe manga haya. Isaraele wali agali tigua i̱na bi larugo talialu bia nabi haya.

¹²Tigua ani bialu heagola i̱na ti mini giambe haabo hayagola helo waharu. Wali agali urunime tini hameleago ale bialu helo yupe ho waharugoni.

¹³I̱naga wali agali bu karume i̱naga bi hale helo i̱ hameore ledo. Isaraele wali agali tigua i̱na hameledogo talialu bilo hamelo kogoni.

¹⁴Tigua anidagua bidale nde i̱na ti waitigi karu abaleore bope hai kole. Ti waitigi bibahende karu baba wai bialu bopeore hai kole.

¹⁵Wali agali i̱ handabe manga haga karume i̱hondo gi timbuni howa i̱naga buha ibalu bulu palialu ge duli hanga ho bedale. Tigua ko biyarunaga pani nelo mirugoni nalu haabo kale.

¹⁶I̱na tíhondo ladi ale mini widi bayaleore nalu halimulo ngialu irabuha mone tara dedarunaga ibanerubi nalu halimulo ngia dege berogola tígua karulapeore nalu kamile, lalu layuane hale haru.