Read Huli Iba Gana 82 Bible Online

Iba Gana 82 - Huli bible

Iba Gana 82

¹Dahuliya andagani dahuliyali hondo hagaru ngoai ho bedagoria Ngode Datagaliwabe ibuni duniniore howa haru ka. Ibugua dahuliyali o biarume bi lararu hale howa tinaga bi dabaki bialu lamiaga ka.

²Ibugua lalu, Tígua godi dabaramiligo tigatiga ndo ke̱ howa daba ko haramiligo nahalimu. Tígua agali ko biaga karunaga laharamiligo wahalimu.

³Tígua wali agali yagibano karubi waneigini ti ai̱ya abala homene karubi biamogo bialu halimu. Wali agali maru genda yu howa hako karubi hongo nahe karubi ti mitangi bialu tihondo mana bayale bialu halimu.

⁴Wali agali uruni mbirale burupale howa ti agali ko biaga karunaga giha karia haru daibu helalimu.

⁵Tí mini nawi howa manda nabiore bu kamigoni. Tí ko biaga howa arumaha ibagabu kamigola wali agalime mana tigabi talialu bulene ngago nabiaga ka.

⁶Tí dahuliyali howa Daligaorene Daliga i̱ kogonaga iginiore kamigoni ndobe laro.

⁷Tí ani kamigoyu wali agali dindini karu homagadagua dege homoleberemi. Kini waneiginiru homagadagua dege tíbi homoleberemi, lene.

⁸Ngode Datagaliwabe-o dindi bibahendeni wali agali bu karu handameho hole í̱ abale ibabe. Wali agali hameigini tara tara padaru bibahende í̱naga dege kagoni.