Read Huli Iba Gana 83 Bible Online

Iba Gana 83 - Huli bible

Iba Gana 83

¹Ngode Datagaliwabe-o í̱naga ne ndibulo nahabe. Í̱ore bi nale nahabe. Í̱ ema nabi nahabe.

²Í̱ waitigi biarume í̱la wai bule kagoni de handa. Agali í̱ handabe manga haga karume í̱hondo doga halu kagoni.

³Tigua bira do howa í̱naga wali agali mo ko holenaga ohowa ndindelalu kagoni. Í̱naga wali agali uruni í̱na handayaho haga kego mo ko hole miniha magoyu kagoni ndobe.

⁴Tigua lalu, Isaraele wali agali bu karuni mani holobadarume abogo hene lalu manda nabilo bo wahai hami̱ya, lalu ka.

⁵Tigua ogonidagua bulenaga mini mo mbiraore ho ka. Ti mandagiore howa í̱ bope hole kagoni.

⁶Urunidagua bule haruaruni Idomoalirubi Isimaelealirubi Moabalirubi Hagarialirubi

⁷Gebalailirubi Amonoalirubi Amalegealirubi Pilidialirubi Taialibi uruni bibahendeme í̱ bope hole kagoni.

⁸Asiria wali agali tibi nde uruni baba hamagamagabu dege ka. Hameigini hongohe uruni tigua Lode aguanene Amonoalibi Moabalibi biamogo bule hamagamagabu ka.

⁹Tigua anidagua bule kago í̱na uruni pani mialu bamba Midianalihondo biridaguabi Sisera Yabinialilahondo Iba Kisono poragoria howa biridaguabi bialu ti bo wahai habe.

¹⁰Í̱na ogoningi Endoni tano howa agali bo wahai harigola tinaga tingini dindini wu togo bialu ngu biai haya.

¹¹Tinaga ami agali haru haga bu karuhondo í̱na abale agali Orebe Sebelahondo biridagua bibe. Tinaga agali haguane bu karuhondo í̱na Seba Salamunala bo waharidagua bo wahabe.

¹²Agali uruni tigua lalu, Iname Ngode Datagaliwabenaga dindi ogo inanaga dindi dege ngelo karulami̱ya, layago bo waharigoni.

¹³I̱naga Ngode Datagaliwabe-o agali uruni bo purogo lelalu be abalu taulotogo laradaguabi puyabume widi aeane yuniru pu lo yu purogo laradaguabi bialu bo taliatogo lelabe.

¹⁴Irame irabu ngaru bo dai hagadaguabi dindi hombeneni dangi bu karu bo dagadaguabi

¹⁵agali o bu karuni ti gi halu ibida purogo lelo í̱na iba dalu timbuni ibilalu puyabu hongohe ti kagoha pelo pelabe.

¹⁶Anduane Homogo-o tigua í̱naga hongo hondowa taga halu í̱ni kegoha dai bilo í̱na ti bope hai habe.

¹⁷Tigua í̱hondo gi timbuni ho haabo helo í̱na ti bope habelo hamelo kogoni. Tigua taga timbuni halu tini homade helo hameledogoni.

¹⁸Í̱ni hanguore Anduane Homogo howa Daligaorene Daligabi kego manda bilobi í̱na dindi bibahendeha handameho howa í̱ni hanguore heneda lomanda biai helobi hame timbuni lo kogoni.