Read Huli Iba Gana 84 Bible Online

Iba Gana 84 - Huli bible

Iba Gana 84

¹Anduane Homogo Hongo Haihe-o i̱na í̱naga andaore gubalini timbuniore ho kogoni.

²Í̱naga anda ogoniha i̱ ho palu holeneore hame timbuni lo kogoni. I̱ mbirale marunaga hame nawigo Anduane Homogo í̱naga andaha holenegoorenaga hame bibahende ogoniha piai helowa kogoni. I̱naga minimebi tinginimebi bibahendeme i̱na turuore halu iba gana turubiru bibahendeorenaga holene tene Ngode Datagaliwabe haluhe kagohondo lo mialu kogoni.

³Anduane Homogo í̱ Hongo Haihe i̱naga kinibi i̱naga Ngode Datagaliwabebi í̱ hangu kegoni. Ngode Datagaliwabe í̱naga andaha bo lomabu miaga dabu ngagoria ega emene yatagoberu anda bia para howa tini palu ngagoni. Tinaga iginiru ogoniha palelonaga ma palia kagoni.

⁴Wali agali í̱naga andaha haga karu ti baya turubiore kagoni. Tigua turu howa í̱naga mini yaraga halu iba ganaru laabo halu kagoni.

⁵Wali agali Hari Saiono kagoria pole turu howa kulo karu tinaga hongo holene tene í̱ kegonigo lowa uruni ti turu haaboho holebira.

⁶Ti Hari Saiono pole pialu Baga dindi ulini iba nabere mbira ngagoria tagira poragola dindi yobi iba nabere wiyagoni ndo iba tagira ibulebira. Dindi ulini ngarunaga iba birumaga ladaga halu iba gendo ngarunaga iba dugutagi hagahaga bulebira.

⁷Ti iba ani bedaria nama pialu ti hongo ho yalu polebira. Ti Hari Saiono anda pialu howa Ngode Datagaliwabe karia hondolebira. Ngode Datagaliwabe ibu wali agalime bi pupu wule mbirale gime wabini heledaru ale ndo ibu daligaore gibi henedane ti hondolebira.

⁸Anduane Homogo Hongo Haihe Ngode Datagaliwabe-o i̱na í̱hondo bi larogo hale habe. Yagabanaga Ngode Datagaliwabe-o i̱na bi larogo bayuwaore hale habe.

⁹Ngode Datagaliwabe-o í̱nime inanaga kini helo dabo helene kagoni ibugua ina de hondo mamage haga kago í̱na ibuhondo bayuwa turubini dege bigi bibe.

¹⁰Í̱naga andaha horo mbiru hangu andapu harogome horo daosini mbira tagira maruha haroruni bolangua hai holebira. Ai wali agali mini kowi karu baba mandagi ti andagani palu holenego i̱ hame nale kogoni. I̱naga Ngode Datagaliwabenaga anda panga harabaniore heyu haabo hole hamelo kogoni.

¹¹Anduane Homogo Ngode Datagaliwabe ibu inanaga mamage haganebi inanaga kini howa wá haganebi kagoni. Ibugua inahondo bayale turubini dege bigi bialu ina mo yaraga halu kagoni. Ibunaga deni wali agali mana tigabi hangu bialu haga karuhondo ibugua mbirale bayale ngaru mbira nangule nalaga kagoni.

¹²Anduane Homogo Hongo Haiheore-o wali agali í̱hondo mini mbiraore wuwa í̱ni hanaho karu ti turuoreho kagoni.