Read Huli Iba Gana 85 Bible Online

Iba Gana 85 - Huli bible

Iba Gana 85

¹Anduane Homogo-o í̱ninaga dindi ngago hondowa dara halu biamogo birigoni. Isaraele wali agali bayaleore helo í̱na ti mo bayale hodai bilarigoni.

²Tiha ko wiaru domo wahalu tigua mana ko biyarubi domo wahai harigoni.

³Bamba í̱na tihondo keba timbuni ho harigo wahalu í̱na tandagaore ala harigobi ai nahe kegoni.

⁴Ngode Datagaliwabe-o inanaga Pele Ngiaga í̱ kego ina haru dai bibe. Inahondo kebaore holeni nahabe.

⁵Inahondo keba ho haabo holeberebe. Í̱ keba ho kegoni ereba naholebirabe.

⁶Ina wali agali kamaru turu holoma̱ya inanaga holene mo hongo habe. Í̱na ani beregola iname í̱naga mini yaraga halu holeberema.

⁷Anduane Homogo-o í̱nime ina gubalini ho haabo kego hondoloma̱ya walia habe. Ina bayale holoma̱yabi í̱na pele ngialu haru dai bibe.

⁸Anduane Homogo Ngode Datagaliwabehanda bi larago i̱na hale ho haga kogoni. Iname mana ko ala bialu harimadagua lone biadai nabi harimayagua ibugua ibunaga wali agali ina kamaruhondo mo paliaho holene ngialu bayale holoma̱ya helolebira.

⁹Wali agali ibunaga mini mo dunini ho haga karu ibugua ti pele mialu haru dai buleore mandabu kagoni ndobe. Ibugua ina haru dai bialu inanaga dindi ngagoria ibunaga pele mulene ina heba mandagi wiaabo holebira.

¹⁰Horo ogoningi Anduane Homogonaga gubalini holenebi mini bilinahe holenebi lola halu hogimbu bialu mbiraore holebira. Anduane Homogonaga mini tigabi wulenebi mo palia holenebi biamaga howa tiha wulebira.

¹¹Wali agali Anduane Homogohondo mini bilina ho haragome dindini howa hama iraga holebira. Ngode Datagaliwabenaga mini tigabiwi kagome dahuliya andaga howa handadali holebira.

¹²Anduane Homogohanda ina mo bayale ho helaragola mbirale iname beremaru bayale hai holebira. Inanaga dindiha tomoru bayale andaho hai holebira.

¹³Wali agali tigua mana tigabi biragome Anduane Homogo ibilonaga hariga mo manda mandabu wulebira.