Read Huli Iba Gana 86 Bible Online

Iba Gana 86 - Huli bible

Iba Gana 86

¹Anduane Homogo-o i̱na bi larogo hale howa ladai bibe. I̱ hongo nahe howa i̱ni biamogo bibe naheore kogo í̱na i̱ biamogo bibelo hamelo ko.

²I̱na í̱ talima ibalu haga kogonigo i̱ homoligo pele ngialu abale gi mibe. I̱ í̱naga biabe biahaga howa í̱hondo mini mbiraore wu kogonigo í̱nime i̱ pele ngibe laro.

³I̱naga Anduane Homogo í̱ni hangu kego í̱na i̱ dara howa biamogo bia habe laro. Egerebagi alendobi bibahendengi howa i̱na í̱hondo bi laabo haruli.

⁴Anduane Homogo-o i̱na í̱hondo bi laabo haga kogonigo í̱naga biabe biahaga i̱ kogo mo turu habe.

⁵Í̱ni bayale biaga howa iname ko birimaru domo wahaga ke. Wali agali í̱hondo bi laga karu tihondo í̱na gubalini timbuni haabo ho kegoni.

⁶Anduane Homogo-o i̱naga bi larogo bayuwa hale haore bibe. I̱ biamogo bia lalu í̱ olalu kogo hale habe.

⁷I̱ biamogo bia larogola í̱na i̱ biamogo biaga kego mitangi bialu i̱ genda yu kongi biamogo bia lalu í̱nihondo bi laruli.

⁸Anduane Homogo-o í̱ni ale mende naheore bibahende bolangua haiheore kegoni. Biabe í̱na biriligodagua bulene agali mbira naheore.

⁹Hameigini tara tara í̱nime wabu helariru bibahendeme í̱nihondo ge duli hanga hole ibuwa tigua í̱ timbuniore kego lalu í̱ninaga mini yaraga halu holebira.

¹⁰Í̱ni hanguore hongo timbunihe howa mbirale baya gibi tara tara ngaru í̱nime biaga kegoni. Ngode Datagaliwabe henene í̱ni hanguore kegoni.

¹¹Anduane Homogo-o mana i̱na bialu holiya hamelo kego biawai habe. I̱na horo bibahendengi mini bilinahe howa í̱na laredagua bialu holiya ani biawai habe. I̱naga mini í̱ha paga howa í̱naga biabe biaabo halu holiyabi í̱na i̱ biamogo bigi bibe.

¹²Anduane Homogo i̱naga Ngode Datagaliwabe-o i̱naga miniha howa í̱naga mini yaraga haabo holebero. Ngode Datagaliwabe í̱ timbuniorebi mini lenebi kego, lalu i̱na wali agali karuhondo lamiaabo holebero.

¹³Bibahendengi í̱na i̱hondo gubalini ho haabo kegoni. Í̱nime i̱ homolilono pele ngialu haru dai birigome i̱ homalu humbirini andaga nape kogoni.

¹⁴Ngode Datagaliwabe-o wali agali minehe bu karume i̱la wai bule íbu kagoni ndobe. Agali ko mendeali kago dara nahaga karume i̱ homelo bo wahole bialu kagoni. Uruni tigua í̱naga bi hale habe manga haga kagoni.

¹⁵Tigua ani biagagoyu Anduane Homogo í̱na dara holene irane nawini dara holene timbuni í̱ha to̱ledagome keba abale nahaga kegoni. Í̱na ina gubalini timbuniore ho howa bi ledego lone lo iriari nabiagaore í̱ mini bilinahe kegoni.

¹⁶Í̱na i̱ koria dai bialu dara habe. I̱ ai̱yahanda biabe biaga wiyadagua bialu kogonigo i̱ mo hongo halu pele ngibe.

¹⁷Anduane Homogo-o í̱naga mana bayaleore biaga ngego i̱hondo walia habe. I̱ waitigi bu karume manane ogoni de hondowa í̱nime i̱ biamogo bialu mo hongo ho heledagonida lo manda bialu tini taga timbuniore ho holebirago helo ani bibe.