Read Huli Iba Gana 88 Bible Online

Iba Gana 88 - Huli bible

Iba Gana 88

¹Anduane Homogo Ngode Datagaliwabe-o i̱naga pele ngiagaore í̱ni kegoni. Horo bibahendengi i̱ biamogo bia lalu olaabo haruli. Mbiraga ngagoha howabi í̱hondo bi laabo haruli.

²I̱naga bi larogo hale ha. I̱ pele ngi lowa olalu kogoni hale habe.

³I̱ha genda damene dewaore íbu ngagome i̱ homolene kawareni pu kogoni ndobe.

⁴I̱naga hongo holene ereba hai halu i̱ agali áyu dege homole bu karu ale homole kogonida.

⁵Tigua i̱ yu wahayagola agali homeneru baba mandagi kogonida. I̱ agali marume bo wahalu pene ale howa homaliha wiradagua bidogoni. Agali mbira mbirali abogo lalu embedaho wahene biamogo bibe nahe aibe tobahe hagadagua i̱ haruda laro.

⁶Í̱na i̱ gundu uli timbuni unuraore arumahe wiagoha bape ho waharigonida.

⁷Í̱naga keba holene timbuni wigome i̱ dambi halu iba solowara timbuni bedagome dambi haradagua bu heledegonida.

⁸Í̱na i̱naga nenegerume i̱ erembira ngialu piai heledegonida. Í̱na i̱ mo koorene ko howa hiriri bini heledegola tigua i̱ handa tara haga ka. Í̱na ani bidegome i̱ dariba ho heledegola hadalu pobe nahe kogoni.

⁹I̱ genda yu kogome i̱naga de ko halu au hara. Anduane Homogo-o i̱na horo bibahendengi i̱naga gi yaraga howa í̱ olalu i̱ biamogo bia lalu haabo kogoni.

¹⁰Í̱na wali agali homene ngaru mo heya halu agalime nabiagane aleru birilibe. Wali agali homenerume lone heyu howa í̱naga mini yaraga hagabe.

¹¹Wali agali homaliha ngarume, Í̱na gubaliniore ho kegoni, lagabe. Dindi mo ko heneha karume, Í̱ mini bilinahe kego, lagabe.

¹²Arumaha karume í̱na agalime nabiaga ale biriliru de handagabe. Dindi ina embedaho waheneha pu karume í̱na mana bayale tigabi bereru de handagabe.

¹³Anduane Homogo-o í̱na i̱ biamogo bibelo í̱ olalu ko. Egerebagi bibahendengi i̱na í̱hondo bi lalu haabo haruli.

¹⁴Bi ani laruligo Anduane Homogo í̱na irane aginaga i̱ erembira ngialu kebe. Í̱na irane aginaga i̱ handa tara halu ha do kebe.

¹⁵Bamba i̱ igiri emeneni hewangi genda dege yama ibalu henego áyu nde homolene kawareni haabo kogoni. Í̱na i̱ pani ngirirume i̱naga hongo holene bo pirilape henego kogoni ndobe.

¹⁶Í̱naga keba holene timbuni ngegome i̱ bo dambi henego kogoni. Í̱na i̱hondo pani ngirigo nguwa dege babi bo baulo waharigoni ndobe.

¹⁷Horombe mbiragabi urunidagua biaabo harigola iba li timbuni ibalu bibahende dambi hai hagadagua kome i̱ bo dambi helarigoni. Dindi bibahendeha howa waitigime i̱ bole ho mabu bu hagadagua ko dewa uruni i̱ koria ibaabo haga.

¹⁸I̱naga nenegealiore hearume i̱ erembira ngialu í̱na piai helarigola ainde i̱naga nenege aruma holene dege ngeledegonida.