Read Huli Iba Gana 89 Bible Online

Iba Gana 89 - Huli bible

Iba Gana 89

¹Anduane Homogo-o í̱na ina gubalini haho wiaaboore haga kegonaga i̱na iba ganaru lalu laaboore holebero. Í̱na mbirale mbira bigi bulebero lalu lowirigo pugua nabi biaiore haga kegonaga lalubi i̱na latagi halu laaboore holebero.

²Í̱naga wali agali gubaliniho haga kegoni haho wiaaboore holebira manda bido. Í̱na bi lo wigi bideruni mbira lo aribia halu mendeale nalagaore hari ema bibe nahe li de hendedemagobi hongohe wiaabo ho ngagoni.

³Í̱na lalu, I̱na agali mbira dabenego ogoni ibula habo nalolene bi mbira lowinigo ngo, lariyagoni. I̱naga biabe biahaga Debidihondo bi lowirigo pugua nabulebiraore lalu lamido, lariyagoni.

⁴Isaraele wali agalinaga kini maha hama polebiraru bibahendeore Debidi í̱ha howa tagira pene hangume haga bulebira. Hameigini mendeme hapugua nabulebiraore, lamiriyagoni.

⁵Ani laga biriyago Anduane Homogo-o dahuliyali dahuliya andagani bu karume í̱na mbirale baya gibi hangu bigi biriligonaga laga bialu turu howa iba ganame í̱naga mini mo yaraga halu kagoni. Anduane Homogo í̱ mini bilinahe howa mbira bulebero lo ngego biagaore kegonaga lalu iba ganaru tigua laga bialu kagoni.

⁶Anduane Homogo-o dahuliya andagani bu karuni í̱ ale mbira nahe. Dahuliyali bu karunibi í̱ ale mbira naheore.

⁷Dahuliyali haguane tini dege dege ngoaiho biruwabi tigua Anduane Homogo í̱ hondowa gi timbuniore haga ka. Dahuliyali Anduane Homogo í̱ ho mabubu haga karu tibi nde gi timbuni howa pandi hinu haga kagoni.

⁸Anduane Homogo Ngode Datagaliwabe Hongo Haiheore-o hongo gibiorehe í̱ kegobi mbirali naheore. Anduane Homogo-o í̱na mbirale mbira bule ledego lo beregeda nabi biaore biaga howa í̱ mini bilinahe kegoni.

⁹Iba solowara hongohe bedaru í̱na de hondo haga kegoni. Iba solowara ibu yaribu hongohe bialu bi lalu li̱le̱ laragola bi nale ema nabi berelo í̱na mo palia haga kegoni.

¹⁰Iyibi wali agalinaga hongo holene tene gibi biago bo podalu bibahende mo ko haiore harigoni. Í̱naga hongo holene gibime í̱naga waitigi hearu bibahende bope hai harigoni.

¹¹Dahuliya andagabi dindi bibahendebi í̱ninaga dege nga. Í̱nime dindi timbuni ogo wabialu mbirale bibahendeore dindini wilo wabu wiriyarunibi í̱ninaga dege o bu ngaruni.

¹²Mbirale uyurayagi ngarubi karubi unurayagi ngarubi karubi bibahendeore í̱nime wabini nga. Hari Tabo Hari Hemonolame Anduane Homogo í̱hondo turuore gibi halu iba gana lo ngiragoni.

¹³Anduane Homogo í̱ hongo gibiorehe kegoni nde aguada. Í̱naga hongo holenego magi manda bibe nahe hongo gibiorehe kegoni aguadabe.

¹⁴Í̱ kini howa wali agali bibahende haru kegonigo mana tigabi bulenenibi mana tigatiga dabolenenibi tiagaho biruwa haru kegoni. Í̱na mbirale bibahende bigi beregoria í̱naga gubalini holenebi mini bilinahe howa bulebero laridagua bulenegobi walia haabo halu haga kegoni.

¹⁵Wali agalime í̱ duniniore kego mitangi bialu í̱hondo iba gana lo ngiaga karu ti í̱naga dara halu biamogo buleneni ibagabu ka. Wali agali uruni ti wá holeneha ibagabu haradagua bidago ti turuore au ho haruadabe.

¹⁶Anigo í̱na tihondo baya turubini dege bigi bialu kegonaga tigua egerebagibi alendobi mbiragabi bibahendengi í̱naga mini mo yaraga halu haabo kagoni.

¹⁷Inanaga hongo holene tene í̱ kegonaga iname í̱hondo turu timbuniore ho kama. Inanaga waitigi karu baba wai bialu kamaria í̱na ina gubalini halu dara howa wai buluma̱ya mo hongo haregola inanaga waitigiru bope halu ina wayali haga beremali.

¹⁸Anduane Homogo-o í̱na waitigime bolilono ina mamage holene mbira í̱nime dabo helariya. Í̱ mana bayale tigabiorego hangu biaga ina Isaraele wali agalinaga Ngode Datagaliwabe baya buruguleore kegoni. Inanaga kini mbira ina haru helogo í̱nime ngirigoni.

¹⁹Ala bambaore í̱na í̱naga biabe biahaga mini bilinaheore heago de gandeba mbira hendelo mialu de gandeba ogoniha howa í̱na bi ogodagua lariya. Wai biagane ami agali mini lene mbira i̱na dabaru. Wali agali bu hearu helowa ibu hangu dabalu ibunaga haguaneni kininaga manda mo karula haru. Karula howa haru haga kininaga dagiani berelaru, lariya.

²⁰I̱naga biabe biahaga Debidi hearia hondowa i̱na ibu tinaga kini helo dabo helalu weli loma binime ibu haguaneni odo wiru.

²¹I̱na ani buwa i̱naga hongo holene ibu heba haaboore helolebero. I̱naga gime ibu mo hongo harogola ibu hongoheore haabo holebira.

²²Ani berogola ibunaga waitigirume ibu baba wai bialu ibu bope halu mo taga habe nahe holebira. Wali agali mini kowi karumebi ibu minupe habe naheore holebira.

²³I̱na ibunaga waitigi karuni geme hengedo mbaraho wahalu i̱naga kini ogoni handabe manga haga karuni bibahende homelo bo wahai holebero.

²⁴I̱na ibu gubalini timbuniore halu ibu heba haho wiaaboore holebero. Ibugua ibunaga waitigiru baba wai bigi birangi ibu wayali hangu haabo helolebero.

²⁵Dindi iba solowara mini Medidereniana bedagoria howa wima pialu iba timbuni mini Yuberedisi poragoria wiape kagoni bibahendeore Kini Debidi ibunaga halu ibugua handa gimbu bilo mulebero.

²⁶I̱na ani berogola ibugua i̱hondo ogodagua lolebira. I̱naga ababi i̱naga Ngode Datagaliwabebi í̱ kegoni. I̱ de handayaho howa mamage hagabi i̱naga pele ngiagabi í̱ hangu kegoni, lolebira.

²⁷I̱na ibu i̱ igini wahene helolebero. Kini maru karubi ndo ibu mo duniniore helolebero.

²⁸I̱naga gubalini haho wiaabo kogome ibu yu wa naholebero. I̱na ibula habo nalolene bi lo wuleberogo bi ogoni pugua nabi wiaabobo bu wilonaga lo wulebero.

²⁹Bibahendengi ibu damene hangume kini haabo holebira. Isaraelenaga kini hameigini mendeme ha pugua nabi Debidi ibuniha howa tagira pene hangume ho aribia haga biaabo holebira. Hari damindini haabo hene li kadagua haaboore hama polebira.

³⁰Ani ani bulebirago ai mani Debidi ibunaga aguanene hama porarume i̱na mana lo ngogo hale halu bia nabi mo wahalu i̱na bilimu lalu bi ledodagua nabiyaguabi

³¹i̱na bi laga berogo hale howa mo yo handaga bialu tigua i̱naga erembira ngialu puguabo hayaguabi

³²nde i̱na tigua ko biraruni ilu wu ha dege buwa pani mulebero. Tigua mana liahe dewaore biyagonaga tandaga nalu howa manda bilo i̱na gewa tibume mana lalu bolebero.

³³Ani ba boleberogoyu i̱na Debidi gubaliniho kogoni nde ogoningibi gubalini haho wiaaboore holebero. I̱na ibu yu wanahe ibuhondo habo nalolene bi lo wirugobi pugua nabulebero.

³⁴I̱na ibula habo nalolene bi lo wirugobi napugulebero. Bulebero lalu lo wirugo ariabi mbiraore hangubi habo nalolebero.

³⁵I̱ Ngode Datagaliwabe mana bayale tigabioreru hangu biaga kogo howa habo nalolene bi ogoni lo wirugoni. I̱na bi halu mbira hangu lo ngogoni mani wia ai̱ai̱ bilonaga lo ngeledogoni. I̱na Debidihondo bi lowirugo ke̱ halu habole naloleberoore.

³⁶Debidinaga aguanene ti ho tawe hama puaboore holebira. Kini Debidinaga haru holene ngagoria ibunaga aguanene maha hararu mbiragome mia aribia haga bima piaho ngane honani dalu haho ngadagua tigua wali agali haru haho wiaaboore holebira. Ti ani haru helonaga i̱na handayaho holebero.

³⁷Kini Debidi ibu ariame dege wali agali haru haho ngane ege mbiraga tagira ibuwa dalu wáho kalidagua haru haaboore holebira. Ege li harini kagonime mbirale bibahende de handai ho howa wali agali bibahendehondo i̱na bi lo ngoruni henene hanguore leda lalu lo pana haga ege ibu li harini kagoni.

³⁸Anigo áyu í̱naga kini í̱nime dabo helarigo ibula kebaho kegoni. Kini ibuni hangu helo wahalu í̱ erembira mialu pedegoni.

³⁹Í̱naga biabe biahaga biagola habo nalolene bi lo wirigoni í̱nime puguarigoni. Pugualu kininaga manda golo muwa waruha ba horo helarigome ai kininaga manda biagoni mebia halu angu to̱lobu wahayagoni.

⁴⁰Ibunaga tanonaga ege pabe biaruni gialo payabu waharigome ai ibunaga anda hongohe bu helearuni bibahende mo ko hai hayada.

⁴¹Ani bidagola ibunaga dabudabu panigi bu payabu ngaria wali agali hariga puíbu birarume mo page yalu pugu bira. Wali agali ibula mandagi handa ai̱ na̱i padarume ani birago handaragola ibuhondo mege bialu oba halu kagoni.

⁴²Í̱na ibunaga waitigirume kini biagoni balu bope helalu waitigi biaru ti miniha turu halu mambolo bama pelariyagoni.

⁴³Kini biagonaga wai biagane ami agali hayarunaga hongobi tinaga wai biagane ale wiaru bibahendenaga hongobi pirilipe hai helariya. Ibu wai bialu hearia bope helalu dari helariyagoni.

⁴⁴Ani helalu ibu kini howa wali agali haru haga hayagoni ogoningi hairi helalu ibuni dindiha minupeho berelariyagoni.

⁴⁵Í̱na ibunaga mali gadia dai bialu ibuni abaleore mo agali wahe helarigome ibu mo taga holene gibioreme dambiho heledegoni.

⁴⁶Anduane Homogo-o í̱ ha do ho kegoni nde ani haaboore hole kebe. Í̱naga keba holene gibi ira daradagua dalu kagoni dairi agoangi holebirabe.

⁴⁷Anduane Homogo-o ina wali agali dindini bu kamaruni nde lu ndo emene tigimandi hangu halu homaga kamagonidago manda bibe laro. Í̱na ina bu kamaruni wabiriyago áyu nde ina bibahende bu kamaruni mini homa biago kamago homalu ereba hai hole kamagonidago manda bibe.

⁴⁸Mbirali nahome haho wiaaboore holego ai kabe. Mbogoyi heba uliha yaanda haragola i̱ mangabago heyalu poro labehe mbirali ai kabe.

⁴⁹Anduane Homogo-o ainde agua berebe. Ai áyu ina gubalini naheore kebe. Debidihondo habo nalolene bi lo wialu ogoale bulebero lo wigi biriruni agua buleberebe.

⁵⁰Anduane Homogo-o í̱naga biabe biahaga o kogo nde mitangi bibe. Wali agali í̱ mitangi nabiaga bu karume i̱ mege bialu kagoni. Tigua i̱hondo bi ko tara tara lalu tandaga ngiragola i̱ genda yu howa dongeho haruli.

⁵¹Anduane Homogo-o í̱na i̱ kini holiya dabo helarigoni kogola í̱naga waitigi karume i̱hondo bi ko lalu ka. I̱ porogoha bayale mbira nawi i̱ mege bialu mo ko haga karia dege iraga haga bialu kogoni.

⁵²Iname Anduane Homogonaga mini mo yaraga haaboore halu hami̱ya hameledo. Ani bilo. Aniore bilo laro.