Read Huli Iba Gana 9 Bible Online

Iba Gana 9 - Huli bible

Iba Gana 9

¹Anduane Homogo-o i̱naga bu miniha i̱na í̱hondo ka̱i̱ timbuniore lo kogoni. Í̱na baya taraore bialu harigonaga i̱na wali agali bu karu lamigi bulebero.

²I̱na í̱ mitangi bialu turu ho holebero. Anduane Homogo Daligaorene Daliga kego i̱na í̱ mini yaraga halu iba gana lolebero.

³Agali i̱ baba waitigi hayaru í̱ de handalu ti ibida piai haya. Ti pilalu homai haya.

⁴Í̱na dabagane dagiani biruwa mana mo tale biagadagua tigatiga hangu mo tale biaga kegoni. I̱na bialu hewaru hondowa í̱na mo tale bialu heria i̱ tigabi bolanguahe hewaria handari.

⁵Wali agali í̱ mitangi nahaga hearu í̱na ti mo dabaki harigoni. Wali agali ko biaga o biaru ti abogo ogoria hene lalu mani te mbira nalelo í̱na bo wahai harigoni.

⁶Ngode Datagaliwabe í̱na inanaga waitigi uruni bo wahai halu tinaga tano wiaru bibahende bo gialo wahai harigoni. Uruni bibahende mo ko hene wiaabobo bu ngago manibi mitangi bulene mbira naholebiraore.

⁷Anduane Homogo ibu kiniore haluhe haabo ka. Ibugua godi hale hole dagiani birule manda manda bu ka.

⁸Ibugua mana tigabiore biaga halu wali agali bibahende handayaho howa haru hai ka. Ibugua mana tigabiore ngagoria howa hameigini tara tara karume bialu hayaru bibahende mo talebuki bulebira.

⁹Anduane Homogo ibuniore anda hongohe kaligobi kagoni. Mbirali ibunaga waitigime bole taliragola ibu kagoha pu holebira. Genda tagira ibirangi ibu kagoha pialu ha do holebira.

¹⁰Anduane Homogo-o wali agali í̱ni keria ibiraru erembira mialu napiaga kegoni. Í̱ ogonibi kegonigo wali agali í̱ mini manda bu karume í̱hondo mini mbiraore wu holebira.

¹¹Anduane Homogo ibu Saiono tanoni kini kago ibunaga mini yaraga halu ibuhondo iba gana lolene nga. Ibugua biabe hongohe tara biyarunaga wali agali hameigini tara tara karume hale hai helo bi loyogo lolene nga.

¹²Wali agali genda yu karu Anduane Homogo ibugua ti mitangi ho haga kagoni. Ibugua wali agalime dugu bialu karu helalu handa tara nahaga kagoni. Wali agali uruni mo ko haga karu ibugua ti pani nelo miaga ka.

¹³Anduane Homogo-o í̱na i̱ dara habe. Genda tandagala i̱ waitigime mo ngirago í̱na de handabe. I̱ homolene kaware wiagoria pu hewaria í̱na i̱ haru dai bialu mo wirigoni.

¹⁴Í̱na uruni bibahende biai haga kegonaga i̱na bi te loyogo lai halu í̱naga mini mo yaraga holebero. I̱na Saiono tanonaga pabe haraba ngagoria heyu howa í̱na biriru bibahende latagi halu i̱ mo wirigonaga turuho holebero.

¹⁵Wali agali hameigini tara tara í̱ mitangi nahaga karume I̱ uli pelonaga uli tombo wu hearia habolo puwa tini ogoniha pilaya. Tigua wena nuha minule nu wiaho hearia tini nu ogoniha do wiya.

¹⁶Anduane Homogohanda manani tigatiga mo tale birangi ibunaga mini tigabi ngago mo walia haga ka. Wali agali ko biaga bu karume maru mo ko hole lowa wai hanalu bu karu mo habo lalu tini mo ko henego polebira.

¹⁷Wali agali hameigini tara tara mana ko biagaru Ngode Datagaliwabe erembira miaga bu karu ti bibahende humbirini andaga pu hai holebira.

¹⁸Ngode Datagaliwabehanda wali agali yagibano bu karu embeda nahe mitangi biaabo haga ka. Genda yu karu Ngode Datagaliwabehanda ti biamogo bilo ibuhondo mini dunu biaho kagola ibugua ti genda yuwa lu helowa naholebira.

¹⁹Anduane Homogo-o dindini wali agali bu karume í̱hondo ngui higi buyu helo wanahe í̱ni abale heyalu ibabe. Wali agali hameigini tara tara í̱ mitangi nabiaga karu ti í̱naga deni íbu helowa í̱ni manani tigatiga mo dabaki habe.

²⁰Anduane Homogo-o í̱na wali agali uruni mo gi hai habe. Wali agali hameigini tara tara bu karu tini habane nabulene kamarunida lo manda bilo helabe.