Read Huli Iba Gana 90 Bible Online

Iba Gana 90 - Huli bible

Iba Gana 90

¹Anduane Homogo-o í̱ inanaga andaore haradagua bidegoni. Inanaga mamali heneyaru tibi í̱ha dege howa heneyago ai áyu inabi í̱ha dege howa bu kamagoni.

²Dindini hari wedarubi nawe howa mbirale bibahende dindini ngarubi nawabi howa Ngode Datagaliwabe í̱niore ala haabo heneyago áyubi haabo kego manibi haho wiaaboore hole kegoni.

³Wali agali bu kamaruni homalu lone dindi tagobi lelariligoni. Í̱na inahondo, Dindi wali agali bu kamiruni tí dindime wabinigo homalu lone dindiho dai bilimu, lalu kegoni.

⁴Iname mali daosini (1,000) mbira bolangua hayago lu laramaligo í̱na ogoni lu ndo bame abe harimago handaradagua birili. Mbiraga agalime mamage ho ariari bialu mbiraoregome mamage tigimandi haraligobi tigimandidane handaga kegoni.

⁵Iba li ibalu wali agali hiliyalu poragola iba nalu homagadagua í̱na wali agali hiliyalu pirili. Ina emene tigimandi hanguni emaga handaradagua bialu halu homaramali. Ina egerebagi tani mbira áyu dege delatagi howa

⁶ala anda haga bialu lini dalu ni handaragola yo bialu alendo gaulo daga hagadagua ina ani bialu kamagoni.

⁷Í̱na inahondo handabe mangaho kegonaga iname í̱ hondowa gi timbuniore ho kamagoni. Í̱naga keba holeneme ina handayaho kegome ina bibahende do ereba hai haramagoni.

⁸Inanaga mana ko tara tara beramaliruni bibahendeore í̱ de handaiho kegoni. Mana ko maru ohowa bia do hene birimarubi bibahendeore í̱ deni panigi mo ngelowa kegoni.

⁹Ina wali agali dindini lu holenego í̱naga keba holeneme mo tubagi halu inanaga bu̱he bame halu mbira hangu laradagua abaleore lalu bolangua haragoni.

¹⁰Ina wali agali dindini mali pira karia hangu haramali. Hongohe harimayagua nde mali pira halira haramali. Anigo áyu o haramadagoniha genda bulene erekui biabe bulenela dege ngaria handalu haramali. Mali podo nginidadagua hai halu bialu inane abaleore pu ereba haramali.

¹¹Í̱naga keba holenenaga hongo gibi ngegoni de handai hene ai kabe. Wali agalime mana ko biraru hondowa í̱na handabe mangaho kegola wali agalinaga bu miniha gi timbuni bulene tagira ibaganego aiwa manda bidabe.

¹²Ina dindini lu ndo emene tigimandi hangu hole harimada manda buluma̱ya í̱na lawaiha biawaiha bibe. Inanaga horo dagalo wia heneni harimada manda bialu miniwi holoma̱ya í̱naga mini dingi dangia lolenego inanaga bu habaneha wia habe.

¹³Anduane Homogo-o í̱na inahondo kebaho haabo kegoni agoangi hairi hole kebe. Ina í̱naga biabe biahaga kamaru hondowa dara habe.

¹⁴Ina horo bibahendengi dindini hama poramangi miniha turu halu dungu lowa iba gana lalu haabo holoma̱ya í̱na egerebagi bibahendengi í̱naga gubalini haho wiaabo holeneme inaha to̱lotagiho helaga bibe.

¹⁵Í̱na mali dewani ina genda yu dindihaore warapeho helarigonigo ai áyu ina lone mo turuho helabe. Ina genda yu hemane mali piyago daga lowa mali o biagoni taheni turuho hama poloma̱ya ina mo turu habe.

¹⁶Í̱na biabe hongohe gibi beredaru í̱naga biabe biahaga kamaru ina hondoloma̱ya walia habe. Inanaga waneigini maha hararu tibi í̱naga hongo holene baya tara tara ngeru hendelo mo walia habe.

¹⁷Anduane Homogo inanaga Ngode Datagaliwabe-o iname í̱ duniniore ke mitangi bialu haramaligo í̱na inahondo dara halu baya turubini bigi bibe. Iname mbirale bigi beramaru bayale haga bialu lini daga bilo buluma̱ya mo hongo habe.