Read Huli Iba Gana 91 Bible Online

Iba Gana 91 - Huli bible

Iba Gana 91

¹Mbirali Anduane Homogo Daligaorene Daliga kagoha ha do hole porago ibu Anduane Homogo Bibahende Hongo Haiheore kagonaga tuha puwa baya turubini pu holebira.

²Anduane Homogonaga tuha howa ibugua ibuhondo ogodagua lolebira. Í̱na i̱ bu dambi halu i̱naga pabe tigila í̱ howa i̱ baya hangu handayaho hariligoni. I̱naga Ngode Datagaliwabe í̱ kegoni. I̱na í̱ni hanaho kogoni, lolebira.

³Heneneore Ngode Datagaliwabe ibugua í̱ baya hangu handayaho halu mamage holebira. Damame agalimeyaguabi gono wia do hene ngaruha í̱ do wia nabulebere. Warago hiriribi tara tara wali agali bo home laganeale ngarumebi í̱ ela naholebira.

⁴Ega angibunime ibunaga babaganeme ibu igini bu dambi hagadagua Anduane Homogo ibugua í̱ bu dambiho holebira. Ani biragola í̱ ibunaga tuha howa bayaleore holebere. Anduane Homogohanda bule ledago biaga mini bilinahe kago ibugua í̱naga humbi howa ibu erembiraha mo ngelowa hatali wu holebira.

⁵Mbirale mbira mbiraga bulubada lowa í̱ miniha gigi howa palulene nawi. Horombe howabi í̱ nahende keria abale ibuwa í̱ balu polobada lowa í̱ gigi howabi holene nawi.

⁶Dama ko tara tara bu karume mbiraga horombebi wali agali bo wahama ibaga bialu kago í̱na dama uruni hondowabi gi holene nawi.

⁷Áyu dege í̱ deni wali agali daosini mbira (1,000) bibahende homa hilayaguabi daosini pira (10,000) í̱ kegohayagi homai hayaguabi í̱ ela naholebirago giho holene nawi.

⁸Anduane Homogohanda wali agali ko biaga karume mana ko biyagonaga pani mirago í̱ni deme handalu hondolebere.

⁹Í̱na Anduane Homogo í̱naga mamage haga helalu í̱naga Ngode Datagaliwabe Daligaorene Daliga kago hatali wiagane humbi helarigoni.

¹⁰Ani helo waharigome mo ko holene tara tara ngarume í̱ kegoria anda naibulebira. Warago ko tara tara gendabi ngarubi í̱ andagani anda naibulebira.

¹¹Ngode Datagaliwabe ibugua ibunaga dahuliyaliru lamialu í̱ ibagabu kegoha, Tí mamage hama ibagabu hole pudaba, lalu lamulebira.

¹²Ege to̱le̱ ngagome í̱naga ge nabehedagola dahuliyali uruni tinaga gime í̱ taba yaraga holebira.

¹³Í̱naga geme laionobi nogombibi laiono hungubaluabi puya tomia palebi bibahende hengeda hai holebere.

¹⁴Ngode Datagaliwabehanda ogodagua larago, Wali agali i̱ gubalini heneneore ho karu i̱nime ti haru dai bialu pele mulebero. I̱ tinaga Anduane Homogo ka lowa henene yu tigabu karu tinaga hatali wiaga humbi i̱nime holebero.

¹⁵Tigua i̱ olaragola i̱na tinaga bi larago hale halu ladai bulebero. Ti kagoria gendabi íbu ngangi i̱ni ti heba haabo holebero. Ina ti gi mialu haru dai bialu ti mo yaragaho helolebero.

¹⁶Tinaga holene lu hama pelo tinaga mali mo tago holebero. Tigua bima ibiyagonaga yolo uruni mulebero. Ina ti pele mialu i̱ni ti heba haabo holebero, lene.