Read Huli Iba Gana 92 Bible Online

Iba Gana 92 - Huli bible

Iba Gana 92

¹Anduane Homogo-o í̱hondo ka̱i̱ lolene bayaleoreda. Í̱ Ngode Datagaliwabe Daligaorene Daliga kegoni lalu í̱ mini yaraga halu iba gana lolene bayaleore ngagoni.

²Egerebagi bibahendengi í̱na i̱ gubalini ho haabo kegonaga lolene karulape ogoni. Mbiraga bibahendengi i̱na í̱ mini bilinahe kegonaga lolebero.

³I̱na ngida ale tara tararu balu í̱naga mini yaraga holebero.

⁴Anduane Homogo-o í̱na biabe hongohe biriru mitangi bialu i̱ turuho kogoni. Í̱na bayaleore dewa birigonaga i̱na turuore halu iba ganaru lolebero.

⁵Anduane Homogo-o í̱na biabe biriliru timbuniore hongohe biaga ke. Í̱naga miniha mitangi bideru iname manda bibe nahe kamagoni.

⁶Wali agali mini nawi karumebi mini giga nabi karumebi mbirale uru manda nabibehe ka.

⁷Wali agali mini kowi bu karu ti datani bu hagagobi ka. Ko biaga bu karume mbirale ngago damene yu howa homogo ha holebira. Ani bulebiragoyu ti mo ko hai halu erebaore holebira.

⁸Anduane Homogo-o í̱ni kini haluhe haabobo hagaore kegome ti ani bulebira.

⁹Agali í̱la waitigiho karu ti homalu agali mini kowi karu bope hai holeberego ina mandabu kamagoni.

¹⁰Í̱na nogo bulumaga wangabe gabuanaga hongo kaligobi i̱ha hongo timbuni helari. Í̱na i̱hondo bayale birigonaga turuore ho kogoni.

¹¹I̱ waitigi bu hearu mo ko hai harigo de handalu agali ko hearu yiya lalu dugu biayuago hale haru.

¹²Wali agali mini tigabi bu karu ti ayage timbuni andaho karubi holebira. Ti Lebanono irabuha ira tamia bayale timbuni bu karubi holebira.

¹³Ti Anduane Homogonaga anda haneni ira hengene mbira haradagua bida. Inanaga Ngode Datagaliwabe ibunaga andaha howa ti bayaleore holebira.

¹⁴Ti lu ho waheneore heaguabi lini bayale daabo haga kagoni. Tinaga yuniru gahenge halu ti hongohe haabo howa gabu nahaga ka.

¹⁵Ti ogonibi kagome Anduane Homogo ibu mini tigabiore kago hendelo mo walia ka. I̱naga hapai haga kago ibuha lehe mbira nawiore.