Read Huli Iba Gana 93 Bible Online

Iba Gana 93 - Huli bible

Iba Gana 93

¹Anduane Homogo ibu kini kagoni. Ibunaga mini mo yaraga holenebi hongo gibihe holenebi karulowa kagoni. Dindi timbuni o ngagoni ibunime wabu winiyadagua ema bialu girigurabi mbira bule ndoore ngagoni.

²Anduane Homogo-o bambaore mbirale bibahende nawiangi í̱na handame ho haabo hene kegoni. Í̱ ala henerunagabi áyu kamarunagabi mani holebirarunagabi kini haluhe haabo kegoni.

³Anduane Homogo-o iba solowararu uli unuraoreha berenerume ai áyu bi timbuniore hongo howa tilitula lalu la ho nga.

⁴Anduane Homogo í̱na mbirale bibahende dahuliya andagani ngagoni í̱naga hongo gibihe kegome yani howa handayaho kegoni. Iba solowara tilitula lalu kadu bararaga bialu karuni hongo emene bamedago lowa í̱ hongo gibiorehe kegoni. Iba solowara yaribu buyu ibalu iba angeni hongo howa haealo bade haga bialu karuni emene bamedago lowa í̱ hongo gibiorehe kegoni.

⁵Anduane Homogo í̱naga mana lo ngeruni bibahendeore wialu wiaabobore bulebira. Í̱naga anda loma biniore kagoni ibu haho wiaaboore holebira.