Read Huli Iba Gana 94 Bible Online

Iba Gana 94 - Huli bible

Iba Gana 94

¹Anduane Homogo í̱ Ngode Datagaliwabeore howa wali agali mana ko biaga karume biyarunaga pani nelo mirili. Áyu í̱naga lembo holene ngego tihondo mo walia habe.

²Wali agali bibahende í̱naga deni íbu hai helolebere. Wali agali mine haga karume mana ko biyarunaga pani nelo abale mule ibabe.

³Mana ko biaga bu karume mana ko bialu turuho helo henge agua agima muleberebe. Anduane Homogo-o tinaga henge agira ngabe.

⁴Agali ko biaga karume mana ko biyagonaga turu haga bialu mine ho helo horo agiru heloleberebe.

⁵Anduane Homogo-o uruni tigua í̱naga wali agali bo hengedape halu genda timbuni mo mialu kagoni ndobe.

⁶Wali dalo berearubi waneigini ai̱ya abala homene karubi tigua bo wahai haga ka. Wali agali dindi taraha howa inanaga dindini íbu hene karu homelo bo wahai halu biaga.

⁷Tigua lalu, Anduane Homogohanda ina de nahendeda. Isaraele wali agalinaga Ngode Datagaliwabehanda iname bialu kamarunaga manda nabi bame kago waha, laga ka.

⁸I̱naga wali agaliru-o tígua mana ko dege biaabo halu kamigo agua beremibe. Tí wali agali mini nawi lulu ale kamigo angi mini wiadai buleberemibe.

⁹Ngode Datagaliwabehanda inanaga hale wabu helenego ibu bi hale habe nahe kabe. Ibugua inanaga de wabinigo ai ibu de handabe nahedabe.

¹⁰Hameigini tara tara dindi bibahendeha karume ko biragola ibugua ti mo tiga bialu pani namulebirabe. Ibugua wali agali lawai haga kago ibuha manda mbira nawi kabe.

¹¹Anduane Homogo ibugua wali agalinaga miniha bibahende ngaru manda biaiho ka. Tigua ogoale bule lomanda manda bu kago hondowa ibugua mbirale uruni bibahende tagira napolebira mandabu ka.

¹²Anduane Homogo-o í̱na wali agali mo tiga biriru ti turuho ka. Í̱naga mana lowini ngego lawai hene karu tibi turuho ka.

¹³Í̱na ogonidagua bini karu ti miniha dungulo kane dege agali ko biaga karu ti homai halu homaliha piai helo í̱ maliaho haga ke.

¹⁴Anduane Homogohanda ibunaga wali agali yu wa nahaga ka. Heneneore ibugua ibunaga wali agali bu karu erembira mialu yu wanahagaore ka.

¹⁵Mani howa agali godi lararume tigatiga dege lolebira. Ani laragola hale howa wali agali tigabi karume bi ogoni talialu bialu holebira.

¹⁶Mbiralime i̱ biamogo bialu agali ko hearu bope hayago aibe. Mbirali i̱la mandagi howa agali ko biaga hearu ko nabilonaga i̱ biamogo biyago aiwabe.

¹⁷Anduane Homogohanda i̱ biamogo nabinidale nde i̱ homene dininiru piagagoha abale pu kole.

¹⁸I̱na lomanda bialu koria i̱ ge harogoria gondo lalu i̱ pilarogonigo laru. Ai Anduane Homogo-o í̱naga gubalini haabo hariligome í̱naga gime yania harigola i̱ pi nale bayale kogoni.

¹⁹Horo i̱ genda ho kongi howabi ko ngarunaga mini dege dindiho hewagolabi í̱nime i̱naga mini mo palia halu i̱ turuho helarigoni.

²⁰Agali haguane tigabi ndo ko dabaga karu baba í̱ biabe mandagi nabiaga kegoni. Agali ko uruni tigua wali agalime mana ko biraru hondowa karulape dege bira lalu ani bialu helo wahaga ka.

²¹Tigua wali agali ko nabi bayale biaga karu mo ko hole ndinde laga ka. Wali agali tiha ko nawi karu homelo bo wahole ko biaga urunime manani helalu kagua dabaga ka.

²²Anigo Anduane Homogohanda hongoheore howa i̱ biamogo biaga ka. I̱naga Ngode Datagaliwabehanda i̱ baya hanguore handayaho haga kagoni.

²³Tigua mana ko dewaore biyagonaga ibugua emena ko ngaru tihondo mo mulebira. Tinaga ko biyaru mitangi bialu tini homelo ibugua ti bo wahai holebira. Anduane Homogo inanaga Ngode Datagaliwabehanda ti bo wahaiore holebira.