Read Huli Iba Gana 96 Bible Online

Iba Gana 96 - Huli bible

Iba Gana 96

¹Anduane Homogohondo iba gana gahenge lo mulene nga. Dindi bibahendeni bu kamirume Anduane Homogohondo iba gana lo mulene nga.

²Anduane Homogohondo iba gana lo mialu ibunaga mini mo yaraga halimu. Ibugua ina haru dai bialu pele ngiyagoni lalu horo bibahendengi wali agali bibahendeme hale hai helo lamiaaboore halimu.

³Ibu daliga gibiore ka lalu hameigini bibahende paluyu pedaru hale hai helo lamilimu. Ibugua biabe timbuni bayale bima piyarunaga lalu wali agali bibahende lamiai halimu.

⁴Anduane Homogo ibu daliga gibiore kagoni. Iname ibunaga mini uyura mo yaraga haabo halu hami̱ya. Mbirale wali agalime dama mitangi bialu gime wabini ngaru hondowa ina gi holene nawi. Anduane Homogo ibu dege daliga gibi kago iname ibu hondowa dege giho holene nga.

⁵Wali agali hameigini tara tarame mbirale dama mitangi bialu tini gime wabiniruhondo bi pupu wiagaru uruni bibahende ke̱ howa hangu bialu kagoni. Inanaga Anduane Homogo ibugua hari daligabi mbirale bibahende hariha karubi ngarubi wabinigo ibuni hangu daliga gibiore kagoni.

⁶Anduane Homogo ibu kini howa wá holenebi mini mo yaraga holenebi ibunaga hangu ngagoni. Ibunaga anda lomabu heleneni mbirale bu ngarume Anduane Homogo ibuni hongohe howa ibuni baya buruguleore gibi agi loabe tobahe kagobi walia ho nga.

⁷Wali agali dindini bu kamiru bibahendeme Anduane Homogonaga mini mo yaraga halimu. Ibunaga wá holenebi hongo holenebi daliga gibiore nga lalu ibunaga miniore mo yaraga halimu.

⁸Anduane Homogonaga mini timbuni daligaore ngago mo yaraga halimu. Ibuhondo mbirale mbira lomabu migi bule giha yaga bialu ibunaga andaha anda ibugu bilimu.

⁹Wali agali bibahende kamiru Anduane Homogo ibu baya buruguleore kagoria ibalu bulu palialu ibunaga lotu lalu halimu. Wali agali dindi bibahendeni kamiru tígua ibu gibiore kago hondowa duru ala lalu halimu.

¹⁰Wali agali hameigini tara tara bibahende bu hama pedaru lamialu, Anduane Homogo ibu kini ka, lalimu. Dindi timbuni o ngagoni ibunime wabu winidagua ema bialu girigurabi mbira nabuleore ngagoni. Ani kago howa mani ibugua ibalu wali agali bibahende baba godi lalu tigatigaore dabolebira, lalu lamilimu.

¹¹Dindi timbuni ogo í̱bi hari li kego í̱bi libu nde turu halibu. Iba solowara í̱nde tigitugu lalu í̱ninaga bi dalimu labe. Mbirale iba solowaraha biru ngamiru tínde bi ladagadaga bialu tíninaga bi ladaba.

¹²Mabu wima pedamirubi mbirale mabuni andaho hama pedamirubi tí bibahende turu timbuniore ho halimu. Anduane Homogo ibuni dindi ogo bibahende handagimbu buwa haru hole ibulene tu harangi mbirale urunime bi urunidagua lagalaga bulebira. Ira teha ira bu karume turu gibiore howa tininaga bi lalu bi dalimu lagalaga bulebira. Ibugua dindini wali agali bu kamaru mana tigabiore buleneni haru holebira. Bi heneneore loleneni howa ti dabolebira.