Read Huli Iba Gana 97 Bible Online

Iba Gana 97 - Huli bible

Iba Gana 97

¹Anduane Homogo ibu kiniore howa handame ho ka. Dindi o ngego í̱na turu holene nga. Dindi iba dege dombeneha ngamiru tíguabi turu haga bidaba.

²Beraliba arumalame ibu ho mabu bida. Ibugua wali agali ta nabi karu mana tigabi ngagome haru howa handaya ho haga ka.

³Ira hungu bamba halu puwa waitigi ho mabu bidaru dai helaga ka.

⁴Ibugua hari daba migimege lalu dindi bibahende ngago wá hame helaga ka. Dindi ngarume uruni hondowa duru laga.

⁵Anduane Homogo ibu dindi bibahende ngarunaga Anduane ka. Dindi hari ngarume Anduane Homogonaga deni wagaya do elagadagua do elai haga nga.

⁶Hari daliga li karume ibunaga mini tigabiore nga lalu latagi ka. Hameigini tara tara dindi bibahendeni karume ibunaga wá taraore harago de handai haga ka.

⁷Wali agali mbirale dama mitangi bialu gime wabini ngaruhondo bi pupu wiaga karu ti mo taga timbuniore holebira. Gime wabini ngarume Anduane Homogo hondowa bulu paliai holebire.

⁸Anduane Homogo-o í̱naga mana tigabi hangu ngegome wali agali dabaga kego manda buwa wali agali Saiononi karubi Yuda dindiha tano dewa wima pedaruha bu karubi ti bibahendeme í̱hondo turu halu miniha dungulo haga ka.

⁹Anduane Homogo Hongo Haiheore-o í̱na dindi bibahende handameho kegoni. Í̱ore mini lene daligaorene daliga howa bi pupu wulenaga gime wabu ngaru bibahende bolangua haihe kegoni.

¹⁰Anduane Homogohanda wali agali mana ko ngaru hame nalaga karu tihondo gubalini ho haga ka. Ibunaga wali agali karu handayaho haga ka. Ibugua ti agali ko biaga karunaga giha karia gingila mialu haru dai biaga ka.

¹¹Anduane Homogonaga wá holeneme wali agali mini tigabi karuni wá hadali haga ka. Turu holeneme wali agali bayale biaga karu tinaga bu miniha mo turuho helaga ka.

¹²Wali agali mini tigabiwi kamiru tí turu ho hadaba. Tígua Anduane Homogohanda bayale biyarunaga turuho hadaba. Ngode Datagaliwabe ibu mini baya buruguleore kago ibugua uruni biyaru mitangi bialu tígua ibuhondo turu halu ka̱i̱ ladaba.