Read Huli Iba Gana 99 Bible Online

Iba Gana 99 - Huli bible

Iba Gana 99

¹Anduane Homogo ibu kiniore howa handame ho ka. Wali agalirume ibuhondo gi howa duru lalu haga. Dahuliyali babaganehe kirali kago labo dindiha helowa ibu de handape howa handayaho kagola dindi dumbirumbi bialu haga.

²Anduane Homogo ibu Saiononi howa hongo timbunihe kagoni. Ibugua hameigini tara tara dindi bibahendeha karu handame howa haru hai ka.

³Wali agali bibahendeme ibu kini duniniore howa mini lene ka lalu ibunaga mini yaraga holebira. Ibu mini tigabi baya buruguleore kagoni.

⁴Kini hongo haiheore-o í̱ mana bayale tigabi ngago dege hame laga kegoni. Í̱na mana bayale tigabi lo ngegoni ina Isaraele wali agalirume bialu haabo holoma̱ya ngirigoni. Wali agali tara karume biraru hondowa iname tigatiga mo tale bialu holoma̱ya mo walia hari.

⁵Anduane Homogo inanaga Ngode Datagaliwabe kagonaga mini yaraga holene nga. Ibuni kagoha hapara howa ibu mitangi bialu lotu lalimu. Ibu mini tigabi baya buruguleore kagoni.

⁶Mosese Aronola libu Anduane Homogonaga loma binigo mo miaga agali hene. Samuele ibugua ibuhondo bi laga hene. Uruni tigua Anduane Homogo olayagola ibugua tinaga bi hale haga hene.

⁷Ibuni hari beraliba timbuni heagoha howa ibugua tihondo bi lamigi bini. Ibugua ibunaga mana bulene winiru ti lamigi biyagola tigua hale halu biai haga hene.

⁸Anduane Homogo inanaga Ngode Datagaliwabe-o í̱naga wali agalirume í̱hondo bi layaru hale halu ladai birigoni. Tigua mana ko birarunaga pani nelo miaga kego howa dege í̱ni Ngode Datagaliwabeore howa ko uruni domo wahai haga kego ti walia harigoni.

⁹Anduane Homogo inanaga Ngode Datagaliwabe kagonaga mini yaraga hama. Ibunaga hari loma bini kagoria howa ibu mitangi bialu lotu lama. Anduane Homogo inanaga Ngode Datagaliwabe ibu tigabi howa baya buruguleore kagoni.