Read Huli Mini Bayale Gigabi 15 Bible Online

Mini Bayale Gigabi 15 - Huli bible

Mini Bayale Gigabi 15

¹Mbiralime í̱hondo keba gibiore hayagua í̱na ibuhondo bi hendore tabilego ladai beregola ibunaga keba hayago hadolebira. Ai í̱naga bi larego kahe tandagabi lariyagua ibu mo keba holebere.

²Wali agali mini bayale gigabiwi kagome bi laragola maru karume hale howa bi ogonime manda tigabi bulene mo hamela haga. Ai wali agali mini nawi karume bi latagi haganego galone napale lulu bi ale lalu haga.

³Anduane Homogohanda dindi bibahendeni biragoni damenego ibunaga deme handaiore ho ka. Ibugua iname beremaruni ko birimayaguabi bayale birimayaguabi bibahende ibu de handayaho ka.

⁴Bi mbira turubi laga biragola hale haragome miniha turu holenebi dungu lolenebi anda ibiragola hongo hodaibu hagane. Ai bi ko tandagabigo hale howa bu miniha timu ale ho yu ibagabu haga.

⁵Í̱ ai̱ya abalame bi langigi biyago hale halu bia nabi mo wahariyagua í̱ mini nawi kegoni. Ai mo tiga bialu mana laragola hale hariyagua í̱ miniwi kegoni.

⁶Wali agali mini tigabiwi karu ti andagani mbirale dewa bu payabu wulebira. Ai wali agali mini kowi karu tinaga mbirale ngarume tini genda dege mo migi bulebira.

⁷Wali agali mini bayale gigabiwi karume wali agali maru karubi mini bayale gigabi degewi helo bi lamiaga ka. Ai wali agali mini bayale gigabi nawi karume ogonidagua nabulebira.

⁸Wali agali mini tigabiwi karume Anduane Homogo ibuhondo bi larago hale howa ibugua turu timbuniore ho haga ka. Ai wali agali mana ko biaga karume ibuhondo mbirale loma bialu mule yalu ibiragoni ibu hame nalagaore kagoni.

⁹Anduane Homogo ibu wali agali mana tigabi hangu biaga karu gubalini ho haga ka. Ai wali agali mana ko biaga karu tinaga mana birago hondowa ibu hame nalagaore kagoni.

¹⁰Hariga bayale pedagoria yu wahalu piaga kago ibu yolo koore mulebira. Wali agali karu ti marume mo tiga bilo hame nalaga kayagua ti homolebira.

¹¹Anduane Homogohanda wali agali homeneru haga dindi ngago de handai ho kagoni. Ogonigo ibugua ina wali agali dindini kamarunaga miniha mitangi bidamarubi hame ngamarubi manda biaiore ho kago ndobe.

¹²Mine haga karu ti mendealime ti mo tiga bilo hame nalaga ka. Tigua mbirali mini bayale gigabiwi kagome mitangi bayale tihondo talebu ngilobi hale halu ngi nalaga ka.

¹³Mbiralime ibunaga miniha turuho kayagua ibunaga wanakuini bayale wále holebira. Anigo ibunaga miniha genda ngagola wanakui hila dalihe holebira.

¹⁴Wali agali mini dingidangiale karume manda tara tara bua halu hai biaabo holebira. Wali agali mini boga nabi karume bi bame nagalone dege laabo holebira.

¹⁵Wali agali yagibano karu ti mbirale burupale ko howa genda timbuni wiaabo haga ka. Anigo wali agali turu halu miniha dungulo haga karu ti horo bibahendengi tomo timbuni dawa wuwa nalu hagagobi holebira.

¹⁶Í̱na mbirale emeneru wu howa Anduane Homogo andaneha hariyagua nde í̱naga holeneme homogo muni dewawi karunaga holene bolangua ho ke.

¹⁷Wali agali í̱ gubalini haga karu heba howa tígua nema hangu nalu kamigome wali agali maru í̱ handabe manga haga karu heba howa nogo mbirini nalu hagago bolangua ka.

¹⁸Kera poboyogobi haga kago ibugua maru mo kera haga. Anigo ema nabi hibu lalu hondo kagome mo palia holene yu anda ibaga.

¹⁹Í̱ mangahe keyagua gendabi mangabibi bibahende handa walia holebere. Anigo í̱ henene mini bilinahe keyagua í̱ kegoria genda nawulebira.

²⁰Waneigini mini bayale gigabiwi karume ti ai̱ya abala mo turu haga. Waneigini mini nawiore karume ti ai̱ya abala yo handaga ka.

²¹Mbirali mini nawi lulu ale kagome mana nagalone bialu ibuni turuho haga. Mbirali mini bayale gigabiwi kagome mana tigabi hangu biaga ka.

²²Í̱na biabe maru bule mitangibu keyagua mbirali mandabi kagohondo manda bayale talebu ngilo hale holene nga. Ani biriyagua í̱naga biabe berego bayale holebira. Ani nabiriyagua nde í̱na biabe berego bame erekuibi bu waholebere.

²³Wali agalime bi lalu kagola henge wilo hondo howa í̱na tihondo bi bayale tigabi mbira ogoningi lariyagua ogoninaga í̱ turu holebere.

²⁴Wali agali mini bayale gigabiwi karume homolene hariga ubadali kadagua ndo haabo holene hariga ubadaga kadagua pialu haga ka.

²⁵Anduane Homogohanda agali tini mini mo yaraga haga karunaga anda mo ko holebira. Anigo ibugua wali dalo agalini homene bedaru biamogo bialu wali ogoninaga dindi ngaru mendealime nakarulelo handaya ho holebira.

²⁶Mitangi ko tara tara biaganeru uruni Anduane Homogonaga deni mbirale homene ngubi wiagagobi nga. Anigo bi bayale ina laramaru Anduane Homogo deni bayalego ibu turu holebira.

²⁷Mbiralime muni dimagoli howa ko tara tara bialu miyagua ani biragome ibu one waneiginiruha genda tara tara yu anda ibulebira. Mbirali ibugua mana ko mbira bilo mendealime muni ohowa mirago wahayagua ogoni ibu bayale haabo holebira.

²⁸Wali agali mini bayalewi karume mitangi ala buwa mani maruhondo bi ladai biaga. Ko biaga karume bi ladai bialu bayuwa mitangi nabi ala laga biragome ko yu anda ibaga.

²⁹Wali agali ko biaga karu ti kagoria Anduane Homogo ibu kaware nahaga ka. Anigo wali agali mini tigabi karume Anduane Homogohondo bi laragola ibugua hale ho haga ka.

³⁰Í̱na mbirali ibunaga wanakui wále howa turuho kane handariyagua í̱bi dungulo holebere. Í̱na te bibi bayale mbira hale hariyagua ogonime í̱ mo turu howa í̱naga tingini mo hongo holebira.

³¹Marume í̱ mo tiga bialu bi laragola hale howa miniha mo peho hariyagua í̱ mini bayale gigabiwi kegoni.

³²Í̱na mbira birigonaga marume mo tiga biragola hale nahariyagua í̱nime í̱ni mo ko haregoni. Marume í̱ mo tiga biragola bi hale hariyagua í̱ mini bayale gigabiwi holebere.

³³Anduane Homogo andaneha holene ogoni mini bayale gigabiwi holenenagabi manda bulenenagabi hariga ogoni. Í̱nime ala í̱ni mo dindiha hariyagua mani í̱ mini yaraga hene holebere.