Read Huli Mini Bayale Gigabi 2 Bible Online

Mini Bayale Gigabi 2 - Huli bible

Mini Bayale Gigabi 2

¹I̱ igini-o i̱na mana lawai haga berogo embeda nahe í̱naga bu miniha baya hangu mo yai habe.

²Mini bayale gigabi wulene bi larago bibahende hale halu mo yai hole manda bibe.

³Í̱na mini bayale gigabiwi holenebi manda bulenebi tai bibe.

⁴Muni silibarubi mbirale wia do hene ngaru deborebo buwa taya birilidagua mini gigabi wulene galoneorego baya hangu taya bibe.

⁵Anidagua biriyagua Anduane Homogo ibu gibiore ka manda bu holenego agua holene wiarua lowa bayuwaore manda bulebere.

⁶Mini gigabi wulene Anduane Homogo ibugua ngiaga. Mbirale tara tara manda bu kamarubi galone ogo aleda lalu miniha wálo holenebi uruni Anduane Homogo ibugua ngiaga. Anduane Homogo ibugua mo manda bia haga ka.

⁷Wali agali mini tigabiwi ko mbira miniha do nahe karu Anduane Homogo ibunime biamogo bialu pabe tigila ibunime hatagiho haga ka.

⁸Wali agali maru karuhondo mana tigabi bulene ngadaguaore biaga karuhondo Anduane Homogo ibunime ti mamage haga ka. Ani bialu Anduane Homogo ibunaga heneneore karu ibunaga erembiraha mo ngelowa ibuni mamage howa handa tagiho haga ka.

⁹Ani biaga kago áyu i̱na bi larogo hale halu larodagua biriyagua mana tigabi henene hanunigoria bulene wigi bidago manda bulebere. Agua buabe tobatoba ndo miniha ogo ale bulene wiyada lo manda bulebere.

¹⁰Í̱ mini bayale gigabiwi howa í̱naga manda bulene ngegome í̱ mo dungula holebira.

¹¹Mitangi bayale buleneme í̱ pabe bianda halu manda bayale buleneme í̱ mamage holebira.

¹²Ani biragola í̱na agali mana ko biaga karubi bi ko tiga nabi laga karubi talima napolebere.

¹³Agali uruni tigua hariga tigabi pedago yu wahalu hariga arumahe ngagoria pialu ka.

¹⁴Ti mana ko tara tara habane nabulene ngaru bule turu haga ka.

¹⁵Agali uruni tigua birago mana tigabi ndo mo hondo howa biaga ka.

¹⁶Anigo agali mendeali oneme í̱la kayu yaba lole í̱ kegoha ladebodebo bima ibiragola mini gigabi wuleneme í̱ pabe bu yaanda kagola wali ogoninaga bi larago hale halu bibe nahe holebere.

¹⁷Wali ogonibime ibu wandarini agali pene biago wahene biraga. Libu wahalu nambaliya lalu Ngode Datagaliwabenaga deni habo nalolene bi lo wiyago mitangi nabi biraga.

¹⁸Anigo í̱na wali ogonibi bedago andaga pialu hariyagua í̱ agali homenerunaga harigani pialu haradagua bulebere.

¹⁹Agali wali ogoni heba nenege hagaru ti dai nabiaga. Ti bayale holenenaga harigani pobe nahe holebira.

²⁰Anigo í̱na agali bayale biaga karunaga harigani pialu howa agali mini tigabiwi karume biradagua bialu habe.

²¹Wali agali mini tigabi karubi mana tigatiga biaga karubi ti dindi ogoria bayale haabo holebira.

²²Anigo Ngode Datagaliwabehanda wali agali ibu talima naibaga karubi mana ko biaga karubi uruni ti agalime ibuninaga mabuha datani anda harago dugu wahagadagua dugu waholebira.