Read Huli Mini Bayale Gigabi 22 Bible Online

Mini Bayale Gigabi 22 - Huli bible

Mini Bayale Gigabi 22

¹Mbirale dindi dabudabu bu payabu wuwa homogo holenego nagalone lowa wali agalime abogo mini tigabi mana baya gibi biaga ka lene holenego bayaore gibi duniniorego ogoni dabolene nga.

²Wali agali homogo karubi yagibano karubi bibahende Anduane Homogohanda wabini dege bu ka.

³Wali agali miniwi dehe karume handalu karia genda bulene ti kagoria anda ibaruane handalu ti ala igilo mialu haga ka. Ai mini nawi karume genda bulene ti kagoria anda ibule ibiraria handa hondowa dege o ibiragoniha porabu ya howa mani tini genda yu haga ka.

⁴Í̱nime í̱ni mo dindiha halu Anduane Homogohanda laradagua bialu ibu andaneha hariyagua homogo holenebi mini mo yaraga holenebi bayale holenebi uruni yu holebere.

⁵Í̱ holene bayale hame lariyagua wali agali mini kowi mana ko biaga karu minigi biaga gono harigani waga bidago uruniha ti do wiagadagua í̱ gono uruniha do wuleni hariga balalu pugu bibe.

⁶Waneigini emene bidaore mana bayale bulene abale biawai habe. Ani biriyagua awe wahe haragolabi mana bayale bulene ogoni yu wanaholebira.

⁷Wali agali yagibano karume ti homogo karunaga garabaya biabe ale biahaga ka. Wali agali muni danoho karu ti muni anduane kagonaga garabaya biabe ale biahaga ka.

⁸Mbiralime mana tigabi ndo bialu hayagua ibu kagoria genda dewa anda ibulebira. Ani ibiragola ibugua wali agali maruhondo ko bibe nahe holebira.

⁹Mbiralime mbirale ngaru yagibano karuhondo turu halu miyagua Anduane Homogohanda o biagohondo turu howa bayaleore biaga kagoni.

¹⁰Wali agali mine haga karuni bo batagi hariyagua lai lolenebi bi ko lolenebi mege bulenebi ereba holebira.

¹¹Mbiralime horo bibahendengi Anduane Homogonaga deni howa ko mbira nawi tigabi hangu hole hame lagabi ibunaga bi bayale lagabi kayagua kini kagome ibu nenege bu hinulebira.

¹²Anduane Homogohanda mbirali manda bayale bidaru baya hangu mamage haga ka. Ibugua mbirali ke̱ haga kagome bi lararu mo nahabane haga ka.

¹³Wali agali mangahe karume andaga hangu biraabo haga ka. Tigua ogodagua mitangi biaga. I̱ tagira pialu koria laiono gabua mbira harigani kagome i̱ bo nolebira, lo mitangi biaga ka.

¹⁴Wali ko biaga bedagome de duguyu agali hangu tai bima ibaga bialu howa ibunaga bi larago gundu uli mbira unuraore handape habe nahe ngagobi laga. Anduane Homogohanda agali mbiralihondo keba howa pani mule kago ogoni ibu uli ogoniha pilope helolebira.

¹⁵Waneiginirume bayuwa mitangi nabi howa mana ko bialu haga bulebira. Anigo í̱na ti mini wilo tibume bariyagua tigua mana ko ogoni nabi waholebira.

¹⁶Mbiralime yagibano karunaga mbirale ngaru ibu mo yayaguabi homogo karuhondo turu halu mbirale miyaguabi ani biragome ibuni yagibano holebira.

¹⁷I̱na áyu agali mini bayale gigabiwi karubi mandabi karubi tigua bi lenego lawai hole hameledo. I̱na bi ogoni langerogo baya hangu hale howa mitangi bibe.

¹⁸Bi ogoni í̱naga miniha mo yu hariyagua í̱na maruhondo lamialu howa í̱ miniha dungulo holebere.

¹⁹I̱na í̱ Anduane Homogohondo mini mbiraore wibelonaga hamelowa áyu ogoni bi mbira hale habelo larogoni.

²⁰Í̱ mini bayale gigabiwi halu manda bayalebi habelonaga i̱na bi bayale pira tebira (30) uru í̱ lawai hole gilibu wero.

²¹Bi ogoni hale howa í̱ henene lolenenaga irane manda bulebere. Agali marume bi henene agodabe dabole pu larangi í̱na handa walia howa bi tigabigo tihondo ladai bibehe holebere.

²²Í̱na manda bialu yagibano karu ti habane nabulene ka lowa tinaga emene ngaru namo yabe. Ti godi lo piyagua godime ti hengedape helo manda buleni.

²³Ogoninaga irane Anduane Homogohanda yagibano ti dara howa biamogo bulebira. Mbiralime yagibano karuhondo ko biyagua Anduane Homogohanda o biagohondo pani miadai bulebira.

²⁴Í̱na wali agali keba abale haga karu heba nenege nahabe.

²⁵Ti heba nenege haabo hariyagua mana ko tigua biaga ngarume í̱bi dariba halu mani í̱ mo ko holebira.

²⁶Wali agali mbirame dano henego ibuni namibehedagola í̱na mia holiya lowa habo nalolene bi nalowibe.

²⁷Í̱na dano biago yadai nabibehe kegola tigua í̱naga mbirale bibahende ngeru mo yai halu paliaga dagia heba ungu yuligo dege manda bibe.

²⁸Í̱naga mamalirume dindi tu bamba winigo í̱na mo ya a̱i̱ na̱i̱ nabibe.

²⁹Agali mbira biabe bayale monehe biaga kago ogoni ibugua kininaga biabe bia holene karulapeore holebira. Agali ogonibigome agali mini nalene karunaga biabe biahabe nahe holebira.