Read Huli Mini Bayale Gigabi 23 Bible Online

Mini Bayale Gigabi 23 - Huli bible

Mini Bayale Gigabi 23

¹Í̱ agali homogo kago baba tomo nalu biruwa í̱ miniha mitangi ala bayuwa bu biruwa nabe.

²Í̱ tomo timbuni naga keyagua í̱naga noa holene haru howa haru narugo mangaba labe.

³Tomo timbuni nabelo ngiragome bu mini bamialu ibugua í̱ mo hondo holigo de hondo habe.

⁴Homogo hole lowa erekui biabe bereria í̱ni abale wahe halu mo ko holigo de hondo habe.

⁵Muni dewa bu hombedo yu ha hariyaguabi abaleore ereba hai holebira. Babaganehe ega bodo hariawe yagalo yalu hariha iraga haradagua muni yidegoni babaganehego de handaya haregola abaleore yagalalu polebira.

⁶Agali tomo ibuni hangu nole habua biaga karu heba mandagi tomo nalu nahabe. Ibunaga tomo bayale dendebiore ngago hondowa dimagoli nahabe.

⁷Í̱na ibu heba tomo nalu birariyagua ibugua í̱hondo ogodagua lolebira. Ae tomo bayale dewa ngaruni í̱ni hameme noa biradagua narene, lalu bame lope howa ibugua í̱ henemane mitangi bialu mo turu halu ndo lara. Ibuni miniha mitangi ko bidagobi lolebira.

⁸Í̱na agali ogoninaga mana hondo manda berengi abale o narigo magu tagu tagi hoa holebere. Ani buwa í̱na ibuhondo bi la debodebo bialu larigobi bame galone ndo laruda manda bulebere.

⁹Wali agali mini nawi karuhondo bi bayale nalabe. Í̱na bi bayale manda bulene lamiriyagua ibugua mo himu bagabu waholebira.

¹⁰Dindi tu bamba wini ngago dugu a̱i̱ na̱i̱ nabibe. Waneigini hono wahene aba ai̱ya nahe karunaga dindi ngarubi page karu nalabe.

¹¹Irane Anduane Homogo ibu hongo gibihe kagome dindi ogoninaga lalu bi laramingi waneigini hono wahene uruninaga bi Anduane Homogo ibunime la holebirago haya nahabe.

¹²Marume mana bayale í̱ lawai haragola o lawai haragoni í̱na bayuwa hangu hale mia howa manda bialu mo yai habe.

¹³Wandari igiribi kagua biragola tígua boliya hondo ha dege nalalimu. Abale mini wilo babe.

¹⁴Mini wilo bolene ogonime ibu homolenehayagi napelo holenehayagi helonaga biamogo buleberami.

¹⁵I̱ igini-o í̱ mini bayale gigabiwi hariyagua i̱ turuore holebero.

¹⁶Í̱na mini bayale gigabiwi howa bi larego hale halu i̱na i̱naga miniha turu taraore ho holebero

¹⁷Agali ko biagarume mana biagago í̱ hame nalabe. Í̱ Anduane Homogonaga andaneha hole hongo haabo habe.

¹⁸Í̱na ogonidagua biriyagua mani bayale halu í̱ abale homa nabi mini dunubiahe holebere.

¹⁹I̱ igini-o i̱na bi larogo hale halu mini bayale gigabiwi habe. Í̱ ibagabu kego baya hanguore minila haru ibagabu habe.

²⁰Agali waini iba timbuni nagimbu biaga bababi tombegene yabagi howa tomo timbuni nagimbu biaga bababi mandagi ibagabu holeni.

²¹Lulu iba nowa lulu yaga karubi tomo timbuni nagimbu biaga karubi áyu dege yagibanoore holebira. Tomo timbuni nolenegobi iba mbia naabo holenegobi nowa bame u hangu palima ibaga biriyagua aga ko budu pugubigo bu holebere.

²²Í̱ aba nahenedale í̱ áyu kegoni nakelego í̱ abahanda laradaguaore bayuwa hale halu bibe. Í̱ ai̱ya wahe bedangi í̱ áyu kego habelo hondo heneyagonaga turu halu biamogo bigi bibe.

²³Henene loleneru mini bayale gigabi wuleneru mbirale bibahende manda taratara buleneru miniwi holeneru mana uruni alego yu hole hongo habe. Mana uruni ale yu howa bulenerunaga yolo agi ale mibehebe.

²⁴Waneigini ti mini bayale gigabiwi howa mana bayale hangu biaga kayagua ti ai̱ya abala libu miniha turu timbuniore holene irane nga.

²⁵Í̱ aba ai̱yalame í̱ hondowa miniha turuho helo mana baya o langiruruni bialu habe. Í̱ ai̱yahanda í̱ taba henegonaga embeda holeni ibu turu ho berelabe.

²⁶I̱ igini-o i̱na bi laga berogo baya hanguore hale halu mana i̱na bigi berogo handalu í̱na i̱hondo turu halu i̱ berodagua bigi bibe.

²⁷Bayanda walibi wali maru agali page biagabi bedaruni hinawai uli ale ngagoha igiri agali ogoniha pilope haga biraru wialu tongolo migi bulebira.

²⁸Pagealime mbirale page bule haradagua wali ogoni aleme agali au bolangua harabe hondole lowa deyu haga biaga beda. Wali ogoni aleme agali dewa mo gabua henego ti one waneigini wahowa wali ogoni ale bedagoha taya bima ibaga bialu kagoni.

²⁹Agali maru genda timbuniore yu howa agi bule birudabe lowa tini dara halu hearuni agali aruyabe. Bi timbuni lagimbu bialu hearuni agali aruyabe. Dongone motudu wuwa dege haabo hearuni agali aruyabe. Agali de daramabi hearuni agali aruyabe.

³⁰Uruni bibahende ti agali iba mbiabi waini ibabi lulu iba taratara ngaru naga hearuni agali uruni ndoyabe.

³¹Waini ibame í̱ mo pila holani de hondo habe. Deme handaregola baya de hondoabi wialu naregola bame kembobeha heyolope holene awadaga wulebira.

³²Ani anigoyu mani howa handalu keria puya tomia palegome í̱ hayalu piyabe toba holebere.

³³Í̱naga mitangi bulenego mo ko henedago mbirale taratara í̱naga denguini bilingi bolangua biraria hondolebere. Ani bialu ne harigaha howa bi taratara ngagoni la dege dindi halu lulu bi dewa iba duguaradagua bulebere.

³⁴U palialu keria í̱ni tamuni ndo garo mo liahaga bima pialu kagoria erembirani palirube toba holebere.

³⁵Ani bialu í̱na bi agua lolebere. Agalime i̱ balu piyago nahende paliruda, lolebere. I̱ padogo heyabe nahedagoni irane aginagadabe. Ai i̱ heyalu iba mbia mbira lone nolebero, lolebere.