Read Huli Mini Bayale Gigabi 25 Bible Online

Mini Bayale Gigabi 25 - Huli bible

Mini Bayale Gigabi 25

¹Solomonohanda bi maru leneru Yudanaga Kini Hesegaia heangi ibunaga beba gili bia hagarume gilibu wini.

²Anduane Homogo ibugua mbirale dewaore mandabu do heneru ibuni hangume manda bidago ogoninaga iname ibunaga mini yaraga haramali. Anigo kini kagome mbirale dewa ina kamagoha wia do ho ngago ina manda buluma̱ya langiragola iname ibunaga mini yaraga haramali ndobe.

³Iba andaneha ngarubi hari daligaha karubi iname manda biai habe nahe kamadagua kini ibunaga miniha manda bidagobi iname manda nabibehe kama.

⁴Siliba mbira irani delowa dodo aealuru do ereba haragola siliba ogoni bayaleore howa ogonime mbirale bayale wabibehe wiaga.

⁵Ogonidagua dege ko biaga karu kini baba mandagi nahelo bo pelayagua kini ibu mana bayaleore biragola dindi ibugua hondo kagobi mo hongo halu bayale tigabi holebira.

⁶Í̱ kini kagoria íbu keyagua i̱ timbuni mbira kogoni lo mitangi bialu í̱ni mini yaraga nahabe.

⁷Í̱na mbirali timbuni mbiragonaga henge í̱ mia aribia ho bederia tigua í̱hondo dalia layagua ogoni bayale ndo. Í̱ wali agali mini lene ndo karu baba keria tigua í̱ agali mini lene karu baba hole pu layagua bayale ogoni.

⁸Mbiralime mbira bialu karia í̱na deme hondowa ibu ko biya lalu godini abale puwa latagi nahabe. Mendeali manda bayuwa biaihe kagome mani í̱naga bi larigo bope hai haragola í̱na agi buleberebe.

⁹Í̱ nenegehondo mbirale mbiranaga bi mbira lole manda yu keyagua í̱na nenegeali ogoni ibuni karia puwa lo tiga bilibu. Anigo í̱na bi mbira ogoninaga hale harigo mendealihondo lamia nabibe.

¹⁰Marume bi ogoni hale howa í̱ diburibu laga ke lalu í̱ mo taga halu í̱hondo ko mitangi bu wiaabo holebira.

¹¹Mbiralime bi galone mbira lalu ibugua bi laragonaga galone baya hanguore mo wála hayagua bi ogoni moneheore manda hareni gaigulu daradagua bulebira.

¹²Mbirali ala henego ibugua mbirale bigi biyago handaga binime mendeali áyure hene kago mana lalu lamigi biragola mendeali biagome bi ogoni henene galoneoreda manda bialu yamiyagua ogoni ibu nde ibunaga manda teneni ega ubiya iri biradagua bulebira.

¹³Mbirali bi yalu pu lenegome bi lamibe lenedaguaore tigatiga lamiyagua ogoni gaeangi biabe bialu howa hége lebolaho keria iba libule naragola tingini dungu lagadagua bi tigatigaore lamiyiyagua miniha dungulo holebira.

¹⁴Wali agalime mbirale mbira nguliya lowa nami wahalu piyagua ogoni dalu ibule tingi howa hari kulu timbuni lowa dalu naibi ngaligobi holebira.

¹⁵Í̱na keba abale nahe bi hendeore laga bialu hariyagua agali í̱naga bi hale hoa nahagaru mini mo beregedabehe holebere. Agali haguane karunaga minibi mo beregedabehe holebere.

¹⁶Mone irani dedaria de handariyagua í̱ tombe karulape do nabe. Í̱na dewa do nagimbu biriyagua magu tagu tagi holigo.

¹⁷Í̱ mendeali andaga hangu nenege puabo holene nawi. Ibugua í̱ handabe manga halu hame nalolebirago.

¹⁸Mbiralime ibu nenege kago mo hondo halu ndelayagua ogoni timu yandare kangorume baragola tandaga biagadagua bulebira.

¹⁹Í̱ kegoria ko mbira íbu ngangi í̱na manda bialu mbirali ke̱ haga kago ibugua i̱ biamogo bulubadalo manda biriyagua ogoni ne koheme tomo nagadaguabi ge koheme hariga piagadaguabi beregoni.

²⁰Mbirali miniha genda ho kane hondowa í̱na puwa turu helonaga iba gana lariyagua ogonime ibu biamogo ndo bere. Ogoni mbiralime puyabu dagarebi ibirangi ibunaga aga golo wahagago alebi dere bidagoria ibi odope hagadaguabi beregoni.

²¹Í̱naga waitigi kago tomo noaho kayagua tomo nelo mibe. Ibu iba noaho kayagua iba nelo hambu mibe.

²²Í̱na mana bayale ogonidagua berego hondowa ibuni mana ko bigi biyago mitangi halu ibuni taga pani nolebira. Ani bialu í̱na mana bayale beregonaga Anduane Homogo ibugua í̱hondo turu halu yolo bayale ngulebira.

²³Puyabu ibiragome dalu yalu ibagadagua diburibu laragome keba holene mo yu anda ibaga nga.

²⁴Agali mbirali ibu oneme lai laabo hayagua anda mbiraoreha paluene emene bayale lowa agali ibu tagira pu holenego bayaleore nga.

²⁵Mbirali ibu iba noa howa hége lebola haragola iba libule turu howa nagadagua dindi kaundia mbirahayagi howa bi bayale maru yalu ibiragola hale hayagua ogoni turu taraore holene nga.

²⁶Agali tigabi mbira kago ibu ko biaga kagome ko mo bia helo ibuni henge miyagua ogoni ibu iba uli bayale nagane winigo mo ganguluma bia haradagua bira.

²⁷Mone ibane dewa naabo holene bayale ndo nga. Ogonidagua wali agali marume mbirali ibunaga mini yaraga helo lowa mbira bialu kagoni ogoni bayale ndo dege ngagoni.

²⁸Mbiralime ibunaga mini haru nahe howa keba abale haga kayagua marume ibu hengedape holebira. Ogonibigo ibu tano mbiraha pabe nahe ngagola waitigi anda ibuwa mbirale mo ko haganego ale ka.