Read Huli Mini Bayale Gigabi 3 Bible Online

Mini Bayale Gigabi 3 - Huli bible

Mini Bayale Gigabi 3

¹I̱naga wanebi iginibi i̱na í̱hondo bi langigi buleberogo bi uruni embedaore nahabe. Embeda nahe horo bibahendengi i̱na bibe larugoni mitangi biaabo halu habe.

²Ani bialu i̱na bi larodaguaore bialu hariyagua dindini mali luore haabo halu í̱na mbirale bigi bereru baya hangu haga bulebira.

³Wali agali maru gubalini holenegobi mini bilinahe howa nenegeho haabo holenegobi hado waholeni kongi henedagola haabo habe. Mana bayale bulene uruni hado wanahe mani magagua wiradagua wu haabo habe. Í̱naga gubalinini gilibu ngelowa bialu habe.

⁴Aniore bialu hariyagua dindini wali agali karumebi í̱hondo turu halu Ngode Datagaliwabe ibuguabi í̱hondo turuha bigi biragola í̱na mbirale bigi bereru bayale haga bulebira.

⁵Í̱na í̱naga Anduane Homogohondo mini mbiraore hongo howa wu habe. I̱ni hangu miniwi karulape kogo manda nabibe.

⁶Mbirale bibahende bigi bereru bialu howa Anduane Homogo ala mitangi haga bibe. Ani biriyagua í̱ polene hariga tigabigo ibugua walia haga bulebira.

⁷Í̱nime i̱ni mini gigabiwi kobe toba holeni. Ani mitangi nabi Anduane Homogonaga andaneha howa ibugua bia laradagua hale halu bialu mana ko bulene mangaore gibi ho habe.

⁸Ani bialu hariyagua mana ogoni beregonime í̱ni biamogoore bialu tingini mo ko henego marasinime mo dabi halu mo baya hagadagua í̱ni mo bayaore holebira.

⁹Í̱na Anduane Homogonaga mini mo yaraga halu í̱ mabuni tomo hangareru damene bibahendeorenaga hini degedegeru loma bialu ibu bu mibe.

¹⁰Anidagua biriyagua nde Anduane Homogohanda í̱naga mabuni tomo hengederuni bibahende wu dame bilo mo anda helolebira. Í̱ mabuni tomo ani bu payabu ngelaragola tomo biaru namibe nahe maru wiatogo bialu helolebira. Waini iba pingidowa odo berelaga be timbuni a kegonibi waini iba biru to̱lotagi halu odo pebe bulebira.

¹¹I̱ wanebi iginibi Anduane Homogohanda í̱ mo tiga bialu mana layagua handabe manga halu keraho holeni o biagoni í̱ mini wibelonaga biya manda bibe.

¹²Irane abame ibu igini gubalini howa dege mana liahe mbira biragola mana lagadagua dege Anduane Homogohanda wali agali ibuni gubalini ho karu mini wilo mana laga kago í̱ keba nahabe.

¹³Wali agali mbirale bayuwa manda buwa mini gigabi karu ti turuho holene nga.

¹⁴Ani bulene ngago irane mini gigabi holenego ibu mbirale taratara muni daligame miagane ngolobi silibabi ale ndo uruni bolangua howa daligaore ngagoni.

¹⁵Ani bialu dindini mbirale taratara bayaore í̱ hame lagane ale maru ngaru alebi ndo mini gigabi ibu daligaore ngagoni.

¹⁶Mini gigabi holeneme í̱ biamogo biragola í̱ dindini luore haabo holebere. Ani bialu mini gigabi holeneme í̱ mini lene holenebi homogo holenebi ngulebira.

¹⁷Mini giga buleneme í̱ dindini holenego turu howa dungulo bayuwaore hama pobelo haru hama pialu í̱ haru hairi holebira.

¹⁸Mini giga bulenegome holene miaga ira ale nga. Ani ngago wali agali mini gigabi holenego yu tigabu karu ti miniwi howa holene bayaore yu howa turuho ka.

¹⁹Anduane Homogohanda ibunaga mini gigabi wiagome dindi wabini. Ibunaga manda bulene wiagome haribi wabu helene.

²⁰Ani bialu ibunaga mini gigabi wiagome dindi ogoria iba mo dugua halu mo pelaga ka. Hari beralibaha howa iba mo mogo bialu dalubi mo ibila haga ka.

²¹I̱ wanebi iginibi í̱naga manda bayalebi mini gigabi wulenebi baya hanguore yu waholeni hondowa yu habe.

²²Manda bayale mini gigabi wulenela libugua í̱naga holene bayale mo ngialu í̱ yári baya taraore bu haradagua bu holebere.

²³Ani bu howa í̱ poleberegoha mbiraleme í̱naga ge bobidi lolene mbira nawi hariga bayaleni hangu polebere.

²⁴Andaga paleregohabi í̱ gi holene mbira nawi embedaho howa u bayaleore pu paluebere.

²⁵Í̱naga waitigirume í̱ ho mabu bupe halu gono wiradagua bidagoha nadelo Anduane Homogohondo mini mbiraore hongo howa wu habe. Ani beregola ibugua í̱ baya hangu mamage holebira. Ani biragola mo ko holene bu ngarume mbirali ko biaga karuha mo ko holene abaleore iba dalu puyaburu hongohe ibiraligobi ibiyaguabi í̱ gi nahe holebere.

²⁷Mbiralime mbirale mbira buru pale howa í̱hondo ngi lalu hale hayagua nawi nale howa mulene wiagua nde mulene nga.

²⁸Í̱ dameneme í̱hondo mbirale hale harago ale áyu dege mulene wiagua ngelo howa í̱na ibuhondo yawi nguliya mo ibule áyu pu, nalabe.

²⁹Í̱naga nenege maru í̱ni baba handa a̱i̱ na̱i̱ padaru ti í̱naga nenegeore kamagoni lo mitangi bu kago í̱na ti mo ko hole mbira bulene manda nabibe.

³⁰Mbiralime í̱hondo ko mbira nabi kayaguabi í̱la keba nahe kayaguabi bame o biagohondo lai nale holene nga.

³¹Agali wai biaga karu tigua biagadagua ko bule lowa bu miniha kiau nale holene nga. Ani bialu tigua hariga piagadagua polene nawi.

³²Irane Anduane Homogo ibugua agali urunibi karuhondo turu nahaga ka. Anigo maru mana tigabi ngadagua bialu haga karuhondo Anduane Homogohanda turu haga ka.

³³Anduane Homogo ibugua ko biaga dameneru ti mo ko hai holebira. Maru mana bayale biaga karu ti ibunime handayaho halu mo bayale holebira.

³⁴Maru balagala haga karuhondo Anduane Homogohanda mana tinime bialu ka ale dege biadai bulebira. Anigo maru mana tigabi bialu tini mo dindiha haga karuhondo ibugua ti biamogo biaga ka.

³⁵Mini gigabiwi karu hondowa wali agalime ti mini lene ka lolebira. Anigo mini nawi karume tininaga mini nawi howa taga pani nolebira.